లైఫ్లో రిస్క్ తీసుకోవాలంటే.. ‘గట్స్’ ఉండాలి.. యూపీఎస్సీ టాపర్ IAS స్మితా సబర్వాల్
ఐఏఎస్ స్మితా సబర్వాల్ యూపీఎస్సీ ఆశావహులకు విలువైన సలహాలు అందించారు. రెండు అటెంప్ట్ల తర్వాత కూడా విజయం సాధించకపోతే, ఇతర మార్గాలను అన్వేషించాలని సూచించారు. జీవితంలో రిస్క్ తీసుకోవడం, ఆత్మస్థైర్యంతో ఉండటం, అలాగే వ్యక్తిగత ఆరోగ్యం, ఆనందం కోసం స్వీయ దయను అలవరచుకోవడం వంటి అంశాలపై ఆమె తన అభిప్రాయాలను పంచుకున్నారు. భవిష్యత్తు అగమ్యగోచరమని, వర్తమానంలో జీవించడమే ముఖ్యమని ఆమె నొక్కిచెప్పారు.పరీక్షల ఒత్తిడిని తగ్గించుకోవాలని, రెండు అటెంప్ట్ల తర్వాత కూడా విజయం సాధించకపోతే ఇతర అవకాశాలను అన్వేషించాలని ఆమె సూచించారు. ప్రపంచంలో అవకాశాలకు కొదవ లేదని, సివిల్ సర్వీస్ ఒక్కటే ఏకైక మార్గం కాదని ఆమె స్పష్టం చేశారు. యూపీఎస్సీ ప్రిపరేషన్ ఏ కెరీర్లోనైనా సక్సెను ఇస్తుంది.. అయితే నిరవధికంగా కష్టపడటం సరికాదని అన్నారు..
Updated on: Aug 06, 2026 | 4:53 PM
ప్రముఖ ఐఏఎస్ అధికారిణి స్మితా సబర్వాల్.. సివిల్ సర్వీస్ ఆశావహులు, సాధారణ ప్రజలకు కెరీర్, జీవితం, వ్యక్తిగత ఎదుగుదలపై ఎప్పటికప్పుడు సమగ్రమైన, ఆచరణాత్మకమైన సలహాలు అందిస్తుంటారు. యూపీఎస్సీ పరీక్షల ఒత్తిడిని, దాని చుట్టూ అల్లుకున్న అపోహలను తొలగించుకోవాల్సిన అవసరాన్ని ఆమె నొక్కి చెప్పారు. ‘ఇది మీ జీవితంలో ఒక అందమైన సమయం. కొన్ని విషయాల గురించి అధిక ఒత్తిడికి గురికాకూడదు’ అని ఆమె ఆశావహులకు భరోసా ఇచ్చారు. యూపీఎస్సీ ప్రిపరేషన్లో తమ వంతు కృషి చేసిన తర్వాత, రెండు పూర్తి ప్రయత్నాల తర్వాత కూడా ఫలితం రాకపోతే, ఆ తలుపును మూసివేసి.. ఇతర అవకాశాల వైపు చూడాలని ఆమె సలహా ఇచ్చారు. ప్రపంచంలో అవకాశాలకు కొరత లేదని, యూపీఎస్సీ ఒక్కటే జీవితానికి ఆరంభం.. అంతం.. కాదని స్పష్టం చేశారు. యూపీఎస్సీ ప్రిపరేషన్, అది ఇచ్చే జ్ఞానం ఏ కెరీర్లోనైనా అదనపు ప్రయోజనాన్ని ఇస్తుందని ఆమె విశ్వాసం వ్యక్తం చేశారు. అయితే ‘కొన్ని విషయాలు మన కోసం కాదు’ అని గుర్తించి, నిరవధికంగా ప్రయత్నిస్తూ ఒత్తిడికి గురికావద్దని సూచించారు. నిజమైన ఒత్తిడి, నిజమైన ప్రయాణం ఉద్యోగంలో చేరిన తర్వాతే మొదలవుతుందని గుర్తుచేశారు. అందుకు మానసికంగా సిద్ధంగా ఉండాలని, శక్తిని ఆదా చేసుకోవాలని ఆమె చెప్పారు.
రాజకీయాల్లో యువత పాత్ర, భవిష్యత్తు కెరీర్ ఎంపికలపై స్మితా సబర్వాల్ విభిన్నమైన దృక్పథాన్ని పంచుకున్నారు. నేటి తరుణంలో రాజకీయం ఒక అందమైన రంగం. ఇక్కడ క్రమశిక్షణ, వాస్తవికత కలిగిన యువ, విద్యావంతులు ఎంతగానో కృషి చేయగలరు అని ఆమె అన్నారు. సివిల్ సర్వీస్ ఒక్కటే ఏకైక మార్గం కాదని, ఎన్నో ఇతర కెరీర్ అవకాశాలు ఉన్నాయని పునరుద్ఘాటించారు. రిటైర్ అయిన లేదా స్వచ్ఛంద పదవీ విరమణ చేసిన చాలామంది సివిల్ సర్వెంట్లు రాజకీయాల్లోకి వస్తున్నారని ప్రస్తావించారు. అయితే తన భవిష్యత్తు ప్రణాళికల గురించి ఆమె ఆచితూచి మాట్లాడారు. భవిష్యత్తును ఎవరూ చూడలేరు అని చెబుతూ.. జీవితం నన్ను ఎప్పుడూ దేని గురించి ఖచ్చితంగా ఉండకూడదని నేర్పింది. ప్రస్తుత క్షణంలో జీవించడం, తమ వంతు కృషి చేయడం, అవకాశాలను సద్వినియోగం చేసుకోవడం మాత్రమే సాధ్యమని ఆమె వివరించారు. ప్రజల కోసం పనిచేసే, వారికి సేవ చేసే, తన పని వారి జీవితాలపై ప్రభావం చూపే అవకాశం ఉన్నంతకాలం తాను సంతోషంగా ఉంటానని, ప్లాట్ఫాం గురించి తాను ఆలోచించనని ఆమె స్పష్టం చేశారు. మాజీ ఐపీఎస్ అధికారి జేడీ లక్ష్మీనారాయణ వంటివారు రాజకీయాల్లోకి రావడం ఉదాహరణగా చూపిస్తూ, కంఫర్ట్ జోన్ నుంచి బయటపడి రిస్క్ తీసుకోవడానికి ఎంతో ‘గట్స్’ కావాలని అన్నారు. రాజకీయం ఈ భూమిపైనే అత్యంత కష్టమైన ఉద్యోగమని, దానికి ప్రత్యేకమైన ఆప్టిట్యూడ్ అవసరమని, అది తనకు ఉందని తాను అనుకోవడం లేదని ఆమె అన్నారు.
స్మితా సబర్వాల్ తన వ్యక్తిగత జీవితం, ఫిట్నెస్ అలవాట్ల గురించి కూడా మాట్లాడారు. తనను తాను పర్ఫెక్ట్ సివిల్ సర్వెంట్గా, క్లాసిక్ బ్యూరోక్రాట్గా అభివర్ణించుకున్నారు. సంగీతం తన ఒత్తిడిని తగ్గించే సాధనమని, తెలుగు సంగీతాన్ని కూడా తాను వింటానని చెప్పారు. వంట గురించి అడిగినప్పుడు, తన కుటుంబ సభ్యుల భద్రత, శ్రేయస్సు కోసం తాను వంట చేయనని సరదాగా చెప్పారు. ఫిట్నెస్కు సంబంధించి, తాను పెద్దగా డిసిప్లిన్డ్ కాదని, తమ తల్లిదండ్రులు మంచి జన్యువులను ఇచ్చారని అన్నారు. ఆహారాన్ని ఇష్టపడే వ్యక్తిగా, ముఖ్యంగా స్వీట్లను (బెంగాలీగా), తాను ఎక్కువగా ఇష్టపడతానని చెప్పారు. అప్పుడప్పుడు అర గంట తేలికపాటి వ్యాయామాలు చేస్తానని, తమ నాన్న నేర్పిన ‘ఫౌజీ మౌంటెన్ క్రంచ్’ (20 సిటప్లు) అన్నీంటికీ పని చేస్తుందని, అది మానసిక ఆరోగ్యానికి కూడా మంచిదని, తక్కువ ఖర్చుతో కూడుకున్నదని అన్నారు. స్వీయ దయను అలవరచుకోవాల్సిన అవసరాన్ని ఆమె నొక్కి చెప్పారు. ఈ రోజుల్లో యువత తమ శరీరాలపై చాలా ఒత్తిడి పెడుతున్నారని, దీని వల్ల చిన్న వయసులోనే గుండెపోటు, ఇతర ఆరోగ్య సమస్యలు వస్తున్నాయని ఆమె ఆందోళన వ్యక్తం చేశారు. అన్ని రకాల డైట్లకు తాను అభిమానిని కాదని, పరిమితులకు లోబడి అన్నీ తినాలని, ఎప్పుడైనా వ్యాయామం చేయాలనిపిస్తే చేయాలని సూచించారు. స్విమ్మింగ్ ఒక గొప్ప వ్యాయామమని, అది మోకాళ్లకు కూడా మంచిదని చెప్పారు. ఈ సంవత్సరం తనకు 47 ఏళ్లు వస్తాయని, అందుకు గర్విస్తున్నానని ఆమె తన ప్రయాణం గురించి తెలిపారు.
