Andhra Pradesh: ఛీ.. ఛీ.. ఎంత పని చేశావ్‌.. భార్యపై అనుమానంతో 9 నెలల పసిపాపను..

అనుమానం పెనుభూతమైంది.. తనకు పుట్టలేదన్న అనుమానంతో తొమ్మిది నెలల చిన్నారికి యాసిడ్‌ పోశాడో తండ్రి.. తీవ్రమైన నొప్పితో అల్లాడిపోయిన ఆ పాప అపస్మారకస్థితిలోకి వెళ్ళిపోయింది. మెరుగైన వైద్యం కోసం ఆ చిన్నారిని గుంటూరుకు తరలించారు. ఒంగోలు మండలం కరవది గ్రామంలో జరిగిన ఈ దారుణ ఘటన ఆలస్యంగా వెలుగులోకి వచ్చింది. ఒంగోలు రూరల్ మండలం కరవది సమీపంలో రొయ్యల చెరువుల్లో పని చేసేందుకు మన్యంజిల్లా పాడేరు నుంచి మువ్వల భాస్కర్‌రావు, లక్ష్మి దంపతులు వచ్చారు. పది రోజుల క్రితం వచ్చిన ఈ దంపతులకు 9 నెలల చిన్నారి ఉంది. అయితే ఆ పాప తనకు పుట్టలేదన్న అనుమానం పెంచుకున్నాడు భాస్కర్‌రావు. భార్యతో తరచూ గొడవలు పడేవాడు..

అయితే.. రొయ్యలకు వ్యాధులు రాకుండా ఉండేందుకు యాసిడ్‌ లాంటి పదార్ధం చెరువుల్లో వినియోగించేవారు. ఈ క్రమంలోనే.. ఈ యాసిడ్‌నే తొమ్మిది నెలల చిన్నారి వైష్ణవికి తాగించాడు భాస్కర్ రావు.. దీంతో ఒక్కసారిగా తీవ్రమైన నొప్పితో అల్లాడిపోయిన ఆ చిన్నారి అపస్మారకస్థితిలోకి వెళ్ళిపోయింది. చిన్నారి ఏడుపు చూసి వెంటనే భార్య లక్ష్మి, చుట్టుపక్కల వారు అక్కడకు చేరుకుని బిడ్డను ఏం చేశావంటూ తండ్రి భాస్కర్‌రావును ప్రశ్నించారు.

ఈ బిడ్డ తనకు పుట్టలేదని, తన ఊర్లో చాలా మంది తనకు చెప్పారంటూ భాస్కర్ రావు చెప్పాడు. అందుకే చంపేందుకు యాసిడ్‌ పోశానంటూ కర్కశంగా చెప్పాడు.. వెంటనే అప్రమత్తమైన స్థానికులు పాపను 108 వాహనంలో చిన్నారిని ఒంగోలు రిమ్స్‌ తరలించి చికిత్స అందించారు. అనంతరం మెరుగైన వైద్యం కోసం గుంటూరు జిజిహెచ్‌కు తరలించారు.

భాస్కరరావుకు మొత్తం నలుగురు సంతానం కాగా చివరగా వైష్ణవి పుట్టింది. అల్లారుముద్దుగా ఉన్న ఆ చిన్నారి తనకు పుట్టలేదన్న అనుమానంతో తండ్రి భాస్కర్‌రావు ఈ దారుణానికి ఒడిగట్టాడు. తన భర్త ఇంత దారుణానికి పాల్పడతాడని తాను ఊహించలేదని ఆ తల్లి కన్నీరుమున్నీరుగా విలపిస్తోంది. తనకు పుట్టలేదన్న అనుమానంతోనే చిన్నారికి యాసిడ్‌ తాగించానని భాస్కర్‌రావు ఎలాంటి పశ్చాతాపం లేకుండా చెబుతుండటం అందరినీ విస్మయానికి గురిచేస్తోంది.. ఇంతటి దారుణానికి పాల్పడిన భాస్కర్ రావుపై చర్యలు తీసుకోవాలని స్థానికులు కోరుతున్నారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..