Andhra Pradesh: పోలీసుల అధికారిక లాంచనాల నడుమ డాన్ అంత్యక్రియలు.. అసలు ఎవరీ డాన్..?

ఏలూరు జిల్లాలో ఎక్కడ హత్యలు జరిగినా, దొంగతనాలు జరిగినా, పేలుళ్ళు జరిగిన ఆ డాన్‌దే కీలక పాత్ర. 2013 లో మైనబాద్ లో శిక్షణ పొందిన డాన్ అప్పటి నుండి ఏలూరు జిల్లాలో తన కార్యకలాపాలు కొనసాగించాడు. అయితే ఇటీవల డాన్ తీవ్ర అనారోగ్యానికి గురికావడంతో మృతి చెందాడు. ఏలూరు జిల్లా రిజర్వ్ పోలీస్ మైదానం అవరణంలో డాన్‌కు పోలీస్ అధికార లాంఛనాల మద్య అంత్యక్రియలు నిర్వహించారు. జిల్లా ఎస్పీ మేరీ ప్రశాంతి తోపాటు జిల్లా పోలీసు ఉన్నతాధికారులు అంత్యక్రియలకు హాజరయ్యారు. డాన్‌కి ఘన నివాళులర్పించారు.

అసలు ఎవరీ డాన్.. పోలీసుల అధికారిక లాంచనాల నడుమ డాన్ అంత్యక్రియలకు జరగటం ఏంటి అనుకుంటున్నారా..? డాన్ ఒక పోలీసు జాగిలం. 2012 జూలై 01న జన్మించిన జాగిలాంకు డాన్‌గా నామకరణం చేశారు. అయితే 2013 లో హైదరాబాద్‌లో శిక్షణ పొందింది ఈ డాన్. శిక్షణ అనంతరం డాన్‌ను ఏలూరు జిల్లాలో నియమించారు. ఈ పోలీసు జాగిలం డాన్ 2013 లో శిక్షణలోనే గోల్డ్ మెడల్ సాధించి తనకంటూ ఓ గుర్తింపు తెచ్చుకుంది.

ఏలూరు జిల్లాలోని చేబ్రోలు పోలీస్ స్టేషన్ పరిధిలో గతంలో జరిగిన జంట హత్యకేసులను ఛేదించింది. ద్వారకాతిరుమల పోలీస్ స్టేషన్ పరిధిలో బాలిక హత్య కేసును ఛేదించి, వృత్తిలో ఉత్తమ నైపుణ్యాన్ని సంపాదించింది డాన్. రిజర్వ్ పోలీస్ హెడ్ కానిస్టేబుల్ షరీఫ్ ఈ డాగ్ ను హెండల్ చేసేవారు. హత్య, దొంగతనం వంటి నేరం జరిగిన ప్రదేశంలో సాక్ష్యాలను కనిపెట్టడం, పేలుడు పదార్థాల గుర్తింపు, నేరాలు ఛేదించుటలో తన వంతు ప్రతిభ కనబరుస్తూ, ఉన్నత అధికారులతో అనేక ప్రశంసలు అందుకుంటూ పోలీసు శాఖలో 12 ఏళ్ల పాటు సేవలందించింది.

ఏలూరు రిజర్వ్ పోలీస్ మైదానంలో జరిగిన డాన్ అంత్యక్రియల్లో జిల్లా ఎస్పీ మేరీ ప్రశాంతి పాల్గొన్నారు. భౌతిక కాయంపై పూల మాల వేసి నివాళులర్పించారు. డాన్ సేవలను మరువలేనివంటూ జిల్లా ఎస్పీ మేరీ ప్రశాంతి కొనియాడారు. వీఐపీ, వీవీఐపీల పర్యటనల సందర్భంలో బందోబస్తులో అంకితభావంతో విధులు నిర్వర్తిస్తూ మన్నలను పొందిందని ఎస్పీ ప్రశంసించారు. డాన్ అకాల మరణం జిల్లా పోలీస్ శాఖకు తీరనిలోటని సంఘీభావం తెలిపారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి…