Andhra News: సీఎం మాటిస్తే సీన్ ఇలా ఉంటది.. దటీజ్ సీబీఎన్

సీఎం చంద్రబాబు మంగళవారం పల్నాడు జిల్లా యలమందలో పెన్షన్ల పంపిణీలో పాల్గొన్నారు. గ్రామానికి చెందిన ఏడుకొండలు ఇంటికి వెళ్లి కాఫీ పెట్టి ఇచ్చి ఆయన ఆర్థిక పరిస్థితిపై ఆరా తీశారు. ఏడుకొండలు సైకిల్ షాపు నడుపుకుంటున్నట్లు చెప్పాడు. ఆపై ఏం కావాలని చంద్రబాబు అడిగ్గా.. సైకిల్, మోటారు వాహానాలకు గాలి పెట్టేందుకు అవసరమైన ఎయిర్ కంప్రెసర్ కావాలని కోరాడు. ఆ తర్వాత ఇంటిని కూడా చంద్రబాబు పరిశీలించారు.

అనంతరం ప్రజా వేదిక సమావేశంలో ఏడు కొండలు ఆర్థిక పరిస్థితిని వివరించిన సీఎం ఏడుకొండలు వృత్తికి ఉపయోగపడే ఎయిర్ కంప్రెసర్ ప్రభుత్వమే కొని ఇస్తుందని హామీ ఇచ్చారు. అంతేకాకుండా ఐదారు లక్షల రూపాయల ఖర్చైనా ఇంటి నిర్మాణం చేయిస్తామన్నారు‌. ప్రభుత్వం నుంచి ఇవ్వాల్సిన మొత్తాన్ని ఇస్తూనే పార్టీ నుండి కూడా అందిస్తామని ప్రకటించారు. ఆ తర్వాత తాను ఇచ్చిన హామీలను అమలు చేయాలంటూ కలెక్టర్ అరుణ్ బాబుకు ప్రత్యేకంగా చెప్పారు.

సీఎం సమావేశంలో ప్రకటించడంతో ఆ సమావేశం పూర్తయ్యేలోపే ఐదు లక్షల రూపాయల చెక్ అందించారు. అయితే ఏడుకొండలు సైకిల్ షాపుకు అవసరమైన ఎయిర్ కంప్రెసర్‌రను కలెక్టర్ అరుణ్ బాబు జాప్యం చేయకుండా బుధవారం అందించారు. స్వయంగా కలెక్టర్ అరుణ్ బాబే ఏడుకొండలు ఇంటికి వెళ్లి ఎయిర్ కంప్రెసర్ పరికరాన్ని ఇచ్చారు. అరవై వేల రూపాయల విలువైన కంప్రెసర్ అందివ్వటంతో ఆ కుటుంబం సంతోషం వ్యక్తం చేసింది. రెండు మూడు నెలల సమయం పడుతుందని అంతా అనుకున్నా సీఎం హామీ ఇచ్చిన వెంటనే రెండు హామీలు అమలు కావడంతో ఆ కుటుంబ సభ్యులు తబ్బిబ్బైపోతున్నారు. సీఎం చంద్రబాబుకు రుణపడి ఉంటామంటున్నారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..