అరసవల్లి సూర్యనారాయణ స్వామికి అపురూప ఆభరణాల సమర్పణ.. విలువెంతో తెలుసా?

Arasavalli Surya Temple News: శ్రీకాకుళం జిల్లా అరసవల్లిలోని ప్రసిద్ధ శ్రీ సూర్యనారాయణ స్వామివారి ఆలయంలో భక్తి వైభవం వెల్లివిరిసింది. హైదరాబాద్‌కు చెందిన ఓ అజ్ఞాత భక్తుడు స్వామివారికి సుమారు రూ.2 కోట్ల విలువైన ఆభరణాలను సమర్పించి తన భక్తిని చాటుకున్నారు. స్వామివారి అలంకరణ కోసం ప్రత్యేకంగా తయారు చేయించిన ఈ ఆభరణాలు ఆలయానికి చేరుకోవడంతో భక్తుల్లో ఆసక్తి నెలకొంది.

భక్తుడు సమర్పించిన ఆభరణాల్లో రాగితో తయారు చేసిన మకర తోరణంతో పాటు వెండి కిరీటం, కవచం, కేయూరాలు, వాణీ చెంగులు, స్వామివారి పాదాలు, సనక-సనందన కవచాలు, మాథర, పింగళ కవచాలు, అశ్వపీఠం తదితరాలు ఉన్నాయి. వీటికి బంగారు తాపడం చేయించి అత్యంత ఆకర్షణీయంగా తీర్చిదిద్దినట్లు ఆలయ వర్గాలు తెలిపాయి.

అంతేకాకుండా స్వామివారి పరివార దేవతలైన ఉషా, ఛాయా, పద్మినీ అమ్మవార్ల ఉత్సవమూర్తుల కోసం కూడా ప్రత్యేకంగా కవచాలు, హస్తాలు తదితర ఆభరణాలను తయారు చేయించి సమర్పించారు. భక్తుడు సమర్పించిన ఈ ఆభరణాలు సూర్యనారాయణ స్వామివారి అలంకరణకు మరింత శోభను తీసుకొచ్చాయి.

ఇవి కూడా చదవండి

మకరంలోకి రాహువు.. ఈ 3 రాశులకు ఉద్యోగం, డబ్బు విషయంలో అదృష్టం!

రాశుల ప్రకారం ఏ లోహం ధరిస్తే శుభం? మీ రాశికి బంగారమా.. వెండా..?

సప్త జ్యోతిర్లింగ దర్శన యాత్ర.. 11 రోజుల్లో 7 జ్యోతిర్లింగాలు..

కాకి శ్రాద్ధ ప్రసాదం తినలేదా? పితృ పక్షంలో ఇలా చేస్తే సరిపోతుందట

మంగళవారం ఆలయంలో ప్రత్యేక పూజలు నిర్వహించిన అనంతరం శ్రీ సూర్యనారాయణ స్వామివారిని ఈ నూతన ఆభరణాలతో అలంకరించారు. స్వామివారి దివ్య అలంకరణను దర్శించిన భక్తులు ఆధ్యాత్మికానందానికి లోనయ్యారు. సూర్యభగవానుడి కృపతో ఆరోగ్యం, ఆయురారోగ్యం, ఐశ్వర్యం కలుగుతాయని భక్తుల విశ్వాసం.

తమ పేరు, వివరాలను వెల్లడించకుండా ఓ భక్తుడు ఇంతటి విలువైన ఆభరణాలను స్వామివారికి సమర్పించడం భక్తి భావానికి నిదర్శనంగా నిలిచింది. దేవుడికి సమర్పించే కానుకలో విలువ కంటే భక్తి, విశ్వాసమే ముఖ్యమని భావించే సంప్రదాయానికి ఈ ఘటన మరో ఉదాహరణగా నిలిచింది.