వాటర్ పార్క్ లో ‘ సునామీ.’ చైనాలో ఇదేం మిస్టరీ ?

నార్తర్న్ చైనాలోని వాటర్ పార్క్ లో ఎప్పుడూ, ఎవరూ ఎరుగని ఓ విచిత్రమైన ప్రమాదం జరిగింది. ‘ షువాన్ ‘ పేరిట గల ఈ వాటర్ పార్క్ లో ఒక్కసారిగా ‘ సునామీ ‘ టైపులో నీళ్లు జలపాతంలా.. ఉబికి… దూసుకు వచ్చాయి. అంతే ! సరదాగా జలకాలాటలాడుతున్నస్విమ్మర్లు, పిల్లా, పెద్దా అంతా భయంతో పూల్ నుంచి బయటపడేందుకు ప్రయత్నించారు. వాటర్ పార్క్ లోని వేవ్ మెషిన్ పని చేయకపోవడంతో.. ఇలా కృత్రిమ సునామీ ముంచెత్తింది. అనుకోని ఈ సంఘటనలో నీటిలోనే దాదాపు ‘ తొక్కిసలాట ‘ వంటిది జరిగి.. 44 మంది గాయపడ్డారు. వేవ్ మెషిన్ నిర్వహిస్తున్న వ్యక్తి మద్యం తాగి ఉన్నాడని మొదట వార్తలు వచ్చాయి. అయితే ఇది నిజం కాదని ఆ తరువాత తెలిసింది. ఈ ఘటనలో పూల్ నుంచి బయట పడిన ఓ మహిళ కాళ్లకు తీవ్ర గాయాలై రక్తమోడాయి. గత ఆదివారం జరిగిందీ ఘటన. వీడియోలో ఇది వైరల్ అయింది. ఉన్నతాధికారులకీ విషయం తెలిసి ఈ వాటర్ పార్క్ ను మూసివేయించారు. దీనిపై విచారణకు ఆదేశించారు.