Russia Ukraine: యుద్ధంపై పుతిన్ కీలక వ్యాఖ్య.. జెలెన్స్కీతో మాట్లాడటానికి సిద్ధంగా ఉన్నా.. కానీ..!
శాంతిని నెలకొల్పడానికి యుద్ధమే పరిష్కారమైతే.. చరిత్ర వేలాది యుద్ధాలను చూసింది. కోట్లాది ప్రాణాలను కోల్పోయింది. కాని ఇప్పటికీ చాలా సమస్యలు పరిష్కరించబడలేదు. ఓ దేశం యుద్ధానికి దిగిందంటే.. శాంతి కోసమో.. పరిష్కారం కోసమో అయితే కాదు. దానికి మూడు కారణాలుంటాయి. ఒకటి రివేంజ్.. రెండోది రిటాలియేషన్.. మూడు హీరోయిజం.
డొనాల్డ్ ట్రంప్ అమెరికా అధ్యక్షుడైన తర్వాత, రష్యా, ఉక్రెయిన్ మధ్య జరుగుతున్న యుద్ధాన్ని ముగింపు పలికేందుకు చర్చలు ఊపందుకున్నాయి. తాజా పరిణామంలో, అవసరమైతే ఉక్రెయిన్ అధ్యక్షుడు వోలోడిమిర్ జెలెన్స్కీతో మాట్లాడటానికి సిద్ధంగా ఉన్నానని రష్యా అధ్యక్షుడు వ్లాదిమిర్ పుతిన్ అన్నారు. దీనిని క్రెమ్లిన్ ధృవీకరించింది.
మంగళవారం (ఫిబ్రవరి 18) సౌదీ అరేబియాలో రష్యన్ – అమెరికన్ దౌత్యవేత్తల సమావేశం జరిగిన సమయంలో అధ్యక్షుడు పుతిన్ ఈ ప్రకటన చేశారు. రష్యా, ఉక్రెయిన్ మధ్య జరుగుతున్న యుద్ధాన్ని ముగించేందుకు ఒక ఒప్పందానికి రావడం ఈ సమావేశం ముఖ్య ఉద్దేశ్యం. ఈ సమావేశంలో కనిపించిన ప్రత్యేక విషయం ఏమిటంటే, రష్యా-ఉక్రెయిన్ యుద్ధాన్ని ముగించడం గురించి చర్చ జరిగింది. కానీ ఉక్రెయిన్ దౌత్యవేత్తకు స్థానం ఇవ్వలేదు.
ఇదిలావుంటే, “మేము లేకుండా చర్చించిన ఏ ఒప్పందాన్ని లేదా చర్చలను మేము గుర్తించలేము” అని అధ్యక్షుడు జెలెన్స్కీ అన్నారు. జెలెన్స్కీ కూడా సౌదీ అరేబియాకు వెళ్లాల్సి ఉన్నప్పటికీ, రష్యన్ – అమెరికన్ దౌత్యవేత్తల మధ్య ఒక ముఖ్యమైన సమావేశం జరిగిన తర్వాత రోజు ఆయన వెళ్లనున్నారు. అధ్యక్షుడు జెలెన్స్కీ ప్రతినిధి సెర్గీ నైకిఫోరోవ్ తన పర్యటన సందర్భంగా రష్యా లేదా అమెరికా అధికారులను కలవబోనని అన్నారు. అధ్యక్షుడు జెలెన్స్కీ, ఆయన భార్య ఒలేనా జెలెన్స్కా యునైటెడ్ అరబ్ ఎమిరేట్స్, టర్కియేలకు వెళ్లే ముందు సౌదీ అరేబియాలో అధికారిక పర్యటనలో ఉంటారని ఆయన చెప్పారు.
ఉక్రెయిన్ యుద్ధానికి పరిష్కారం, కాల్పుల విరమణ సాధ్యమేనని పుతిన్ జెలెన్స్కీని కలవడానికి అంగీకరించడం ఒక సంకేతం. మూడు సంవత్సరాలుగా కొనసాగుతున్న ఈ సంఘర్షణ ప్రజల ప్రాణాలను బలిగొని, భారీ విధ్వంసానికి దారితీయడమే కాకుండా, ప్రపంచ ఆర్థిక వ్యవస్థపై కూడా తీవ్రమైన ప్రభావాన్ని చూపింది. డొనాల్డ్ ట్రంప్ కూడా వీలైనంత త్వరగా పరిష్కారం కనుగొనడం గురించి మాట్లాడుతున్నారు. అదే సమయంలో, రష్యా కూడా ఒక పరిష్కారం కనుగొనాలని సూచించింది. అయితే, ఈ పరిష్కారంలో యూరప్, నాటో దేశాలు భాగం కావడం రష్యాకు ఇష్టం లేదు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..