Russia Ukraine War: చెచెన్‌లను రంగంలోకి దింపిన రష్యా.. ఉక్రెయిన్‌కు సహాయంగా జర్మనీ, ఫ్రాన్స్‌

Russia Ukraine War:  రష్యా, ఉక్రెయిన్ మధ్య మూడో రోజు భీకర యుద్ధం కొనసాగుతోంది. రష్యా అధ్యక్షుడు వ్లాదిమిర్ పుతిన్ గెలుపు కోసం అన్ని విధాలుగా ప్రయత్నించేందుకు సిద్ధంగా ఉన్నట్లు తెలుస్తోంది. మీడియా కథనాల ప్రకారం, పుతిన్ ఇప్పుడు ‘వేటగాళ్లు’ అని కూడా పిలువబడే చెచెన్ ప్రత్యేక దళాలను యుద్ధ రంగంలోకి తీసుకువచ్చారు. చెచెన్ ప్రత్యేక దళాలకు నిర్దిష్ట ఉక్రెయిన్ అధికారులను పట్టుకోవడం లేదా చంపేయడం లేదంటే అప్పగించాలని రష్యా ఆదేశించింది. చెచెన్‌లు చెచన్యాలో ఉన్న ఫెడరల్ గార్డ్ సర్వీస్ సౌత్ బెటాలియన్‌కు చెందిన వారని భావిస్తున్నారు.

మరోవైపు ఉక్రెయిన్‌కు సాయం చేసేందుకు పలు దేశాలు ముందుకొచ్చాయి. జర్మనీ ప్రభుత్వం ఉక్రెయిన్‌కు ఆయుధాలను పంపడానికి ఆమోదించింది. అంతేకాదు రష్యా ‘స్విఫ్ట్’ బ్యాంకింగ్ వ్యవస్థపై కొన్ని ఆంక్షలకు మద్దతు ఇచ్చిందని శనివారం ధృవీకరించింది . జర్మనీలో తయారు చేసిన 400 యాంటీ ట్యాంక్ ఆయుధాలను ఉక్రెయిన్‌కు పంపేందుకు నెదర్లాండ్స్ ఆమోదం పొందుతున్నట్లు జర్మనీ ఆర్థిక, వాతావరణ మంత్రిత్వ శాఖ శనివారం సాయంత్రం ఒక ప్రకటనలో తెలిపింది. ఉక్రెయిన్‌పై రష్యా దాడి చేయడం దురదృష్ట ఘటన అని జర్మనీ ఛాన్సలర్ ఒలాఫ్ షుల్ట్జ్ అన్నారు. ఇది మన యుద్ధానంతర వ్యవస్థను బెదిరిస్తుంది. ఈ పరిస్థితిలో వ్లాదిమిర్ పుతిన్ దూకుడు సైన్యంతో పోరాడేందుకు ఉక్రెయిన్‌కు సహాయం చేయడం మన బాధ్యత అని ఆయన అన్నారు.

AFP వార్తా సంస్థ నివేదిక ప్రకారం, జర్మనీ 1,000 యుద్ధ ట్యాంక్ వ్యతిరేక ఆయుధాలను, 500 ‘స్టింగర్’ ఉపరితలం నుండి గగనతలానికి ప్రయోగించే క్షిపణులను ఉక్రెయిన్‌కు పంపనుంది. అదే సమయంలో, ఫ్రాన్స్ ఉక్రెయిన్‌కు మరిన్ని సైనిక సామగ్రిని ఇస్తుంది. రష్యాపై ఆంక్షలు విధిస్తుంది. ఈ విషయాన్ని అధ్యక్షుడు ఇమ్మాన్యుయేల్ మాక్రాన్ కార్యాలయాన్ని ఉటంకిస్తూ AFP పేర్కొంది.

అంతకుముందు, అమెరికా అధ్యక్షుడు జో బిడెన్ సైనిక సహాయం కోసం 350 మిలియన్ డాలర్లను విడుదల చేస్తున్నట్లు ప్రకటించారు. విదేశీ సహాయ చట్టం కింద సహాయాన్ని విడుదల చేయాలని బిడెన్ US విదేశాంగ మంత్రి ఆంటోనీ బ్లింకెన్‌ను ఆదేశించారు. ఉక్రెయిన్ రక్షణను దృష్టిలో ఉంచుకుని, వారికి సైనిక సహాయం అందించడానికి సహాయం మొత్తం ఇవ్వబడుతుంది. ఉక్రెయిన్ తీవ్ర ఇబ్బందుల్లో ఉన్న సమయంలో అమెరికా నుండి ఈ సహాయం వచ్చింది.

ఇదిలావుంటే, అమెరికా ప్రభుత్వం ఉక్రెయిన్ ప్రెసిడెంట్ వోలోడిమిర్ జెలెన్స్కీని దేశం విడిచి వెళ్ళవచ్చని ప్రతిపాదించింది. అయితే అతను దానిని సున్నితంగా తిరస్కరించారు. అమెరికాపై స్పందిస్తూ.. తనకు రైడ్ అవసరం లేదని, కావాలంటే మందుగుండు ఇవ్వమని అన్నారు. పారిపోయేవారిలో నేను ఒకడిని కాను అని చెప్పారు. పరిస్థితి ఎలా ఉన్నా నేను దేశం వదిలి పారిపోనని ఆయన స్పష్టం చేశారు.

Read Also…  Holding Companies: హోల్డింగ్ కంపెనీలు అంటే ఏమిటి.. అందులో పెట్టుబడి పెట్టడం లాభమా.. నష్టమా..