Bangladesh Hindu Attack: బంగ్లాదేశ్‌లో ఎన్నికలకు ముందు రెచ్చిపోతున్న మూకలు.. మరో హిందువు దారుణ హత్య

Bangladesh Hindu Attack

బంగ్లాదేశ్‌లో మరో హిందువు దారుణహత్యకు గురయ్యాడు. రెండు రోజుల క్రితం దుండగుల దాడిలో గాయపడ్డ బెంగాలీ హిందూ వ్యాపారవేత్త ఖోకోన్ దాస్ (50) చికిత్స పొందుతూ ఆస్పత్రిలో చనిపోయారని స్థానిక మీడియా నివేదించింది. డిసెంబర్ 31న బంగ్లాదేశ్‌లోని షరియత్‌పూర్ జిల్లాలో దుకాణం యజమాని అయిన దాస్‌ ఇంటికి తిరిగి వస్తుండగా కత్తితో పొడిచి, కొట్టి, పెట్రోల్ పోసి నిప్పంటించారు. చంద్రదాస్‌ క్యూర్‌బంగా బజార్‌లో ఔషధాలు, మొబైల్‌ బ్యాంకింగ్‌ వ్యాపారం చేస్తున్నారు. దుకాణాన్ని మూసి ఆటోలో ఇంటికి బయలుదేరగా.. మార్గమధ్యలో కొందరు దుండగులు ఆటోను ఆపారు. పదునైన ఆయుధాలతో చంద్రదాస్‌పై దాడి చేశారు. తరువాత తలపై పెట్రోల్‌ పోసి నిప్పంటించారు. వారి నుంచి తప్పించుకునేందుకు రోడ్డు పక్కనే ఉన్న చెరువులోకి దూకేశారు. తర్వాత స్థానికులు ఆయనను కాపాడి.. ఆస్పత్రికి తరలించారు. అక్కడి నుంచి ఢాకా మెడికల్ కాలేజీ ఆసుపత్రిలో చేర్చి చికిత్స అందిస్తున్నారు.. ఇంతలో పరిస్థితి విషమించడంతో అతను మరణించాడని కుటుంబసభ్యలు తెలిపారు. తమకు శత్రువులు ఎవరూ లేరని, ఆయనపై ఎందుకు దాడి చేశారో తెలియదని ఖోకన్‌ భార్య సీమా దాస్‌ పేర్కొన్నారు. తమకు న్యాయం కావాలని కోరారు.

విద్యార్థి నాయకుడు ఉస్మాన్‌ హాదీ హత్యతో దేశంలో ఉద్రిక్త పరిస్థితులు నెలకొన్నాయి. ఇది బంగ్లాదేశ్‌ను రాజకీయ గందరగోళంలోకి నెట్టివేసింది.. ఫిబ్రవరి 2026 సార్వత్రిక ఎన్నికలకు ముందు హింసాత్మక నిరసనలు, భారత వ్యతిరేక భావన పెరిగింది. ఇదే క్రమంలో దీపూదాస్ హత్య జరిగింది. కొన్ని రోజులకు సామ్రాట్‌ అనే వ్యక్తి గ్రామస్థుల మూక దాడిలో ప్రాణాలు కోల్పోయాడు. తరువాత రం బజేంద్ర బిశ్వాస్‌ అనే మరో వ్యక్తిని సహోద్యోగి కాల్చి చంపాడు. ఆ తర్వాత ఖోకన్‌పై దాడి జరగ్గా.. ఆయన కూడా చనిపోయాడు. కనోయిర్ యూనియన్ పరిధిలోని తిలోయ్ గ్రామంలో జరిగిన ఈ సంఘటన, బంగ్లాదేశ్‌లో మైనారిటీలను లక్ష్యంగా చేసుకుని ఇటీవల జరిగిన దాడుల్లో ఒకటి.. గత రెండు వారాల్లో హిందువుపై జరిగిన నాలుగో దాడి ఇదని స్థానిక మీడియా తెలిపింది.

బీజేపీ ఆగ్రహం..

ఈ దాడి భారతదేశంలో రాజకీయ ప్రతిచర్యలను రేకెత్తించింది.. భారతీయ జనతా పార్టీ పశ్చిమ బెంగాల్ యూనిట్ ఈ హత్యను బెంగాలీ హిందువులపై విస్తృత హింసలో భాగంగా పేర్కొంది. X లో పోస్ట్ చేసిన బీజేపీ పార్టీ, బంగ్లాదేశ్‌లో దీపు చంద్ర దాస్ హత్య తర్వాత ఖోకోన్ దాస్ మరణం సంభవించిందని పేర్కొంది.. 2023లో ముర్షిదాబాద్‌లో హరగోబింద దాస్, చందన్ దాస్ హత్యలతో సహా పశ్చిమ బెంగాల్‌లో జరిగిన సంఘటనలతో పోల్చింది. ఈ ప్రాంతం అంతటా బెంగాలీ హిందువులపై దాడులు నిరంతరాయంగా కొనసాగుతున్నాయని బిజెపి ఆరోపించింది.

హాది మరణం..

హాది మరణం భారతదేశానికి అనుకూలంగా భావించే ప్రధాన వార్తాపత్రిక కార్యాలయాలపై దాడులకు దారితీసింది.. భారత దౌత్య కార్యాలయాల సమీపంలో కూడా దాడులు జరిగాయి. భద్రతా సమస్యల దృష్ట్యా భారతదేశం బంగ్లాదేశ్‌లోని కొన్ని ప్రాంతాలలో తన వీసా కేంద్రాలను తాత్కాలికంగా మూసివేయవలసి వచ్చింది. 2026 ఫిబ్రవరిలో జరగనున్న జాతీయ ఎన్నికలకు ముందు బంగ్లాదేశ్ లో హింసలు చెలరేగడంపై పలువురు ఆందోళన వ్యక్తంచేస్తున్నారు.

పోలీసులకు బెదిరింపులు, హిందూ అధికారి హత్యపై వైరల్ వీడియో ఆగ్రహాన్ని రేకెత్తిస్తోంది

జూలై 2024 తిరుగుబాటుగా అభివర్ణించిన సమయంలో బంగ్లాదేశ్ యువ నాయకుడు ఒకరు హిందూ పోలీసు అధికారి హత్య గురించి గొప్పగా చెప్పుకుంటూ, చట్ట అమలు అధికారులను బహిరంగంగా బెదిరించడం చూసిన తర్వాత సోషల్ మీడియాలో వైరల్ అవుతున్న ఒక వీడియో ఆగ్రహాన్ని రేకెత్తించింది.

ఈ వీడియోను Xలో పరిశోధనాత్మక జర్నలిస్ట్, రచయిత సాహిదుల్ హసన్ ఖోకోన్ షేర్ చేశారు.. అతను స్పీకర్‌ను హబీగంజ్ జిల్లాకు చెందిన విద్యార్థి సమన్వయకర్తగా గుర్తించాడు.

ఆ క్లిప్‌లో, ఆ యువకుడు పోలీస్ స్టేషన్ ఇన్‌ఛార్జ్ అధికారిని బెదిరిస్తూ, స్టేషన్‌కు నిప్పు పెడతామని హెచ్చరిస్తున్నట్లు వినిపిస్తోంది. “జూలై ఉద్యమం” అని పిలవబడే సమయంలో, నిరసనకారులు ఇప్పటికే బనియాచాంగ్ పోలీస్ స్టేషన్‌ను తగలబెట్టారని అతను పేర్కొన్నాడు.

సబ్-ఇన్‌స్పెక్టర్ సంతోష్ భాభు హత్యను ప్రస్తావిస్తూ, “మేము హిందూ అధికారి SI సంతోష్‌ను తగలబెట్టాము” అని ఆ యువకుడు ఒక భయంకరమైన వాదన చేస్తాడు. అతను పోలీస్ స్టేషన్ లోపల కూర్చుని కనిపించినప్పటికీ, అతను స్పష్టంగా భయం లేదా పశ్చాత్తాపం లేకుండా ఆ ప్రకటన చేస్తున్నట్లు అనిపిస్తుంది. ఇలాంటి ఘటనలు హిందువులు, మైనార్టీల భద్రతపై ఆందోళనకు దారితీశాయి..