పిచ్చి పట్టిందా..? జైల్లో ఉంటావ్ జాగ్రత్త! ఇజ్రాయెల్ ప్రధానిపై ట్రంప్ సీరియస్.. కారణం?

ఇజ్రాయెల్ ప్రధానమంత్రి బెంజిమెన్ నెతన్యాహూకు ఒక పెద్దన్నలా ఉండే అమెరికా అధ్యక్షుడు డొనాల్డ్ ట్రంప్, ఇప్పుడు ఆయన పేరు ఎత్తితేనే అగ్గిలం మీద గుగ్గిలం అవుతున్నారు. సోమవారం నెతన్యాహూతో ట్రంప్ ఫోన్‌లో వాడివేడిగా మాట్లాడారని, లెబనాన్‌లో ఇజ్రాయెల్ కొనసాగిస్తున్న సైనిక దాడులను ఆయన తీవ్రంగా విమర్శించారని, అమెరికా అధికారులు, ఆ సంభాషణ గురించి తెలిసిన ఒక మూలాన్ని ఉటంకిస్తూ ఆక్సియోస్ నివేదిక పేర్కొంది. ఇజ్రాయెల్ చర్యలపై ట్రంప్ అసంతృప్తి వ్యక్తం చేశారని, కొనసాగుతున్న బాంబు దాడులు దేశ అంతర్జాతీయ ప్రతిష్టను దెబ్బతీస్తున్నాయని హెచ్చరించారని ఆ నివేదిక పేర్కొంది. ఆక్సియోస్ ఉటంకించిన వర్గాల ప్రకారం.. ట్రంప్ నెతన్యాహును అసాధారణంగా తీవ్రమైన పదజాలంతో మందలించి, పరిస్థితిని ఆయన నిర్వహించిన తీరును ప్రశ్నించారు.

“నీకు పిచ్చి పట్టింది. నేను లేకపోతే నువ్వు జైల్లో ఉండేవాడివి. నేను నిన్ను కాపాడుతున్నాను. ఇప్పుడు అందరూ నిన్ను ద్వేషిస్తున్నారు. దీని కారణంగా అందరూ ఇజ్రాయెల్‌ను ద్వేషిస్తున్నారు,” అని ట్రంప్, నెతన్యాహూతో అన్నట్లు ఆ నివేదిక పేర్కొంది. మరో రిపోర్ట్ ప్రకారం.. ట్రంప్ తీవ్ర ఆగ్రహంతో కనిపించారని, ఒకానొక సమయంలో నెతన్యాహుపై అరుస్తూ, నువ్వు అసలు ఏం చేస్తున్నావ్? అని గట్టిగా మందలించినట్లు తెలుస్తోంది. అలాగే బీరూట్‌పై దాడి చేస్తామని బెదిరింపులు కొనసాగితే అది ప్రపంచవ్యాప్తంగా ఇజ్రాయెల్‌ను మరింత ఏకాకిని చేస్తుందని ట్రంప్ హెచ్చరించినట్లు సమాచారం. ఈ సంభాషణ గురించి తెలిసిన మరో సోర్స్ ఆక్సియోస్‌కు తెలిపిన వివరాల ప్రకారం.. ఉద్రిక్తతలు పెరగడంపై తన ఆగ్రహాన్ని ప్రతిబింబిస్తూ, లెబనాన్‌లో ఇజ్రాయెల్ చర్యలకు ట్రంప్ వివరణ కోరారు.

లెబనాన్‌లో ఇజ్రాయెల్ సైనిక చర్యలకు ప్రతిస్పందనగా, అమెరికాతో కొనసాగుతున్న చర్చల నుంచి వైదొలగవచ్చని ఇరాన్ ఆ రోజు అంతకుముందు హెచ్చరించిన నేపథ్యంలో ఈ వాగ్వాదం జరిగింది. ఆక్సియోస్ ప్రకారం.. పౌర మరణాలు, హిజ్బుల్లా కార్యకర్తలతో సంబంధం ఉన్న భవనాలపై ఇజ్రాయెల్ దాడులు ట్రంప్ ఆందోళనలకు పాక్షికంగా కారణమయ్యాయి. బీరుట్‌లోని హిజ్బుల్లా లక్ష్యాలపై ఇజ్రాయెల్ ఇకపై దాడులకు ప్రణాళిక వేయడం లేదని ఆ నివేదిక పేర్కొంది. అయితే బయటికొచ్చిన ఈ నివేదికలకు పూర్తి విరుద్ధంగా ట్రంప్ ట్రూత్ సోషల్‌లో పోస్ట్ చేస్తూ.. తాను నెతన్యాహుతో చాలా మంచి సంభాషణ జరిపినట్లు, ఇజ్రాయెల్ ఇకపై లెబనాన్‌కు తన దళాలను పంపదని, అక్కడ ఉన్న వారిని వెనక్కి పిలిపించిందని తెలిపారు. తాను హిజ్బుల్లాతో కూడా ఇలాంటి చర్చలే జరిపినట్లు ట్రంప్ పేర్కొన్నారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి