Pulasa Fish: దొరక్క.. దొరక్క చిక్కిన పులస.. 2 కేజీల చేప ఎంత పలికిందో తెల్సా..?

అవును… పులస తినకపోతే ఆ పుట్టుకే వ్యర్థం అనేది గోదారోళ్లు చెప్పే మాట. కానీ… ఇప్పుడు పుస్తెలమ్మినా పులస తినే పరిస్థితుల్లేవు. ఆ లెవల్లో ఉంది పులసకున్న ఎమ్మార్పీ. లేటెస్ట్‌గా యానాం వశిష్ట గోదావరిలో మత్స్యకారుల వలకు 2 కిలోల పులస చేప చిక్కింది. యానం పుష్కరఘాట్ వద్ద ఓ మత్స్యకారుడి వలకు చిక్కిన పులస అతడి పంట పండించింది. రెండు కిలోల బరువున్న ఈ చేపకు వేలం వేయగా నాగలక్ష్మి అనే మహిళ 19 వేల రూపాయలకు కొనుగోలు చేశారు. ఆ తర్వాత రావులపాలేనికి చెందిన ప్రముఖ నాయకుడి కోసం ఓ వ్యక్తి ఆమె నుంచి 26 వేల రూపాయలకు ఆ చేపను కొనుగోలు చేశాడు. ఈ సీజన్‌లో పులసకు ఇంత ధర పలకడం ఇదే తొలిసారి. గోదావరికి ఎదురీదే పులస అత్యంత రుచికరంగా ఉంటుందని చెబుతారు. ఇటీవల కాలంలో పులస చేపలు చాలా అరుదుగా దొరకడంతో దీని ధర ఆకాశాన్ని అంటుతుంది. పులస ఇంత ధర పలకడానికి పులస రుచి ముందు మిగతా చేపల రుచి దిగదుడుపే కారణమట.