గాలిలోనే విరిగిన జిప్‌లైన్.. 40 అడుగుల ఎత్తు నుంచి పడిపోయిన యువకుడు.. ఒళ్లుగగుర్పాటుకు గురి చేస్తున్న సీన్!

కర్ణాటకలోని ప్రముఖ పర్యాటక కేంద్రం దండేలిలో జరిగిన జిప్‌లైన్ ప్రమాదం తీవ్ర కలకలం రేపింది. అడ్వెంచర్ రైడ్‌ను ఆస్వాదించేందుకు వెళ్లిన ఓ యువకుడు 40 అడుగుల ఎత్తు నుంచి కిందపడటంతో తీవ్రంగా గాయపడ్డాడు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారగా, అడ్వెంచర్ స్పోర్ట్స్‌లో భద్రతా ప్రమాణాలపై మరోసారి చర్చకు దారితీసింది.

విజయపురకు చెందిన కుబేర్ సుర్‌పురా తన సోదరుడు ప్రశాంత్‌తో కలిసి జూలై 3న దండేలిలోని ఓ రిసార్ట్‌కు వెళ్లాడు. అక్కడ జిప్‌లైన్ రైడ్‌లో పాల్గొన్న కుబేర్ గాలిలో ప్రయాణిస్తున్న సమయంలో అకస్మాత్తుగా భద్రతా లాక్ విరిగిపోవడంతో నియంత్రణ కోల్పోయాడు. సుమారు 30 – 40 అడుగుల ఎత్తు నుంచి నేలపై పడిపోయాడు. ఈ భయానక ఘటనను అతని సోదరుడు తన మొబైల్ ఫోన్‌లో చిత్రీకరించాడు. ఈ వీడియో ప్రస్తుతం సోషల్ మీడియాలో విస్తృతంగా చక్కర్లు కొడుతోంది. అయితే, వీడియో ప్రామాణికతపై స్వతంత్రంగా అధికారిక ధృవీకరణ ఇంకా వెలువడలేదు.

ప్రమాదం జరిగిన వెంటనే రిసార్ట్ సిబ్బంది కుబేర్‌ను దండేలి ప్రభుత్వ ఆసుపత్రికి తరలించారు. అనంతరం మెరుగైన వైద్యం కోసం విజయపురలోని ప్రైవేట్ ఆసుపత్రికి, అక్కడి నుంచి మహారాష్ట్రలోని ప్రత్యేక వైద్య కేంద్రానికి తరలించారు. వైద్యుల ప్రకారం, కుబేర్ రెండు చేతులు, రెండు కాళ్లలో తీవ్ర ఫ్రాక్చర్లు కాగా, నరాలు కూడా దెబ్బతిన్నాయి. ఇప్పటికే ఒక శస్త్రచికిత్స పూర్తికాగా, మరిన్ని శస్త్రచికిత్సలు అవసరమని వైద్యులు సూచించినట్లు కుటుంబ సభ్యులు తెలిపారు.

ఈ ఘటనపై కుబేర్ కుటుంబ సభ్యులు తీవ్ర ఆగ్రహం వ్యక్తం చేశారు. రిసార్ట్ యాజమాన్యం సరైన భద్రతా చర్యలు తీసుకోకపోవడం, పరికరాల నిర్వహణలో నిర్లక్ష్యం వహించడమే ప్రమాదానికి కారణమని ఆరోపించారు. ప్రమాదం తర్వాత చికిత్స ఖర్చులన్నింటినీ భరిస్తామని హామీ ఇచ్చిన రిసార్ట్ యాజమాన్యం, ఆ మాటను పూర్తిగా నిలబెట్టుకోవడం లేదని కుటుంబం ఆరోపిస్తోంది. అయితే ఈ ఆరోపణలను రిసార్ట్ మేనేజర్ ఖండించారు. సిబ్బంది నిర్లక్ష్యం వల్ల కాదు, సాంకేతిక లోపం కారణంగానే ఈ ప్రమాదం జరిగిందని ఆయన తెలిపారు. బాధ్యత నుంచి తప్పించుకోబోమని, త్వరలో బాధిత కుటుంబాన్ని కలిసి చికిత్స, ఇతర అంశాలపై చర్చిస్తామని వెల్లడించారు.

జిప్‌లైన్ అనేది రెండు ఎత్తైన ప్రదేశాల మధ్య బిగించిన బలమైన ఉక్కు తీగపై భద్రతా హార్నెస్‌తో గాలిలో వేగంగా ప్రయాణించే అడ్వెంచర్ క్రీడ. అడవులు, లోయలు, నదులపై నిర్వహించే ఈ రైడ్ పర్యాటకులను ఆకర్షించినప్పటికీ, పరికరాల నాణ్యత, భద్రతా ప్రమాణాలు, సాంకేతిక తనిఖీలు తప్పనిసరిగా ఉండాలని నిపుణులు సూచిస్తున్నారు. ఈ ఘటన నేపథ్యంలో అడ్వెంచర్ స్పోర్ట్స్ కేంద్రాల్లో భద్రతా ప్రమాణాల అమలుపై అధికారులు మరింత దృష్టి సారించాల్సిన అవసరం ఉందని అభిప్రాయాలు వ్యక్తమవుతున్నాయి.

వైరల్ వీడియో ఇక్కడ చూడండి..

Why you always need to be cautious when it comes to this stuff.

Poor guy, if he had just moved forward by a few feet he would have ended up on the grass which would have been better.

Incident occurred at Starling River Resort, Dandeli.#accident #karnataka #adventuresports pic.twitter.com/uzNHR6BUH9

— Sidharth Shukla (@sidhshuk) July 19, 2026

మరిన్ని జాతీయ వార్తల కోసం ఇక్కడ క్లిక్ చేయండి..