ఓరీ దేవుడో.. బాల్కనీ నుంచి గుట్కా ఉమ్మితే 11,000 వోల్ట్స్‌ కరెంట్ తగిలి వ్యక్తి మృతి!
మధ్యప్రదేశ్‌లోని విదిశలో అత్యంత విచిత్రమైన, విషాదకరమైన సంఘటన చోటుచేసుకుంది. మూడో అంతస్తు బాల్కనీలో నిలబడి గుట్కా నములుతూ ఉమ్మివేసిన 65 ఏళ్ల ప్రభులాల్ గుప్తా అనే వ్యక్తి విద్యుదాఘాతంతో ప్రాణాలు కోల్పోయాడు. అతను ఉమ్మిన ఉమ్మి నేరుగా బాల్కనీకి అతిసమీపంలో వెళుతున్న 11,000 వోల్ట్ల (11కేవీ) హై-టెన్షన్ విద్యుత్ తీగను తాకడంతో ఈ ఘోర ప్రమాదం సంభవించింది. ఇళ్ల మీదుగా ప్రమాదకరంగా వెళ్తున్న విద్యుత్ తీగలపై విద్యుత్ శాఖకు ఎన్నోసార్లు ఫిర్యాదు చేసినా పట్టించుకోలేదని స్థానికులు ఆగ్రహం వ్యక్తం చేస్తున్నారు. అసలేం జరిగింది పూర్తి వివరాల్లోకి వెళితే..
Updated on: Oct 26, 2026 | 9:04 AM
ప్రపంచంలో ఎన్నో రకాల విచిత్ర ప్రమాదాలు జరుగుతుంటాయి. కానీ, ఎవ్వడూ ఊహించని విధంగా కేవలం గుట్కా ఉమ్మివేయడం వల్ల ఓ వ్యక్తి ప్రాణాలు కోల్పోయిన ఉదంతం మధ్యప్రదేశ్‌లో వెలుగుచూసింది. ఈ విస్తుపోయే ఘటన మధ్యప్రదేశ్‌లోని విదిశ జిల్లాలో చోటుచేసుకుంది. 11,000 వోల్ట్ల హై-టెన్షన్ విద్యుత్ తీగ ప్రాణాలను హరించిన ఈ అనూహ్య ఘటన ప్రస్తుతం దేశవ్యాప్తంగా సంచలనంగా మారింది.
అసలేం జరిగింది?
విదిశ జిల్లాకు చెందిన 65 ఏళ్ల ప్రభులాల్ గుప్తా అనే వ్యక్తి మేస్త్రీగా పనిచేస్తూ, స్థానికంగా ఒక అద్దె ఇంట్లో నివసిస్తున్నాడు. సంఘటన జరిగిన రోజు అతను తన ఇంటి మూడో అంతస్తు బాల్కనీలో నిలబడి గుట్కా నములుతూ బయటకు ఉమ్మాడు. అయితే ఆ సమయంలో బాల్కనీకి అతి సమీపంగా వెళ్తున్న 11 కేవీ (11,000 వోల్ట్లు) హై-టెన్షన్ విద్యుత్ తీగపైకి ఆ ఉమ్మి పడింది.
ఎలక్ట్రికల్ నిపుణులు, శాస్త్రవేత్తల విశ్లేషణ ప్రకారం, ఉమ్మిలో తేమ, లవణాలు అధికంగా ఉంటాయి. ఇవి విద్యుత్‌ను సులభంగా ప్రసరింపజేస్తాయి. బాల్కనీకి హై-టెన్షన్ లైనంత దగ్గరగా ఉండటం వల్ల, ఉమ్మి ద్వారా ఏర్పడిన మార్గం గుండా విద్యుత్ ప్రవహించి కరెంట్ షాక్‌కు గురిచేసింది. ఈ ప్రమాదంలో ప్రభులాల్ గుప్తా తీవ్రమైన కాలిన గాయాలతో ప్రాణాలు కోల్పోయాడు.
స్థానికుల ఆగ్రహం, అధికారుల నిర్లక్ష్యం
ఈ ఘటన స్థానికంగా తీవ్ర కలకలం రేపింది. ఇళ్ల మధ్యలో, బాల్కనీలకు అతి సమీపంగా హై-టెన్షన్ విద్యుత్ తీగలు, ట్రాన్స్‌ఫార్మర్లు ప్రమాదకరంగా ఉన్నాయని విద్యుత్ శాఖ అధికారులకు గతంలో ఎన్నోసార్లు ఫిర్యాదు చేసినా పట్టించుకోలేదని స్థానికులు ఆరోపించారు. ఇంటి యజమానితో పాటు మృతుడి కుటుంబ సభ్యులు కూడా అధికారుల నిర్లక్ష్యమే ఈ ప్రాణనష్టానికి కారణమని ఆగ్రహం వ్యక్తం చేస్తున్నారు. సమాచారం అందుకున్న వెంటనే పోలీసులు సంఘటనా స్థలానికి చేరుకుని దర్యాప్తు చేపట్టారు. చెడు అలవాట్లు ఆరోగ్యానికే కాకుండా, ఇలాంటి అప్రమత్తత లోపాల వల్ల ప్రాణాలకే ముప్పు తెస్తాయని ఈ ఘటన మరోసారి నిరూపించింది.
