Telangana RTC: తెలంగాణ ఆర్టీసీ బస్సుల్లో ఛార్జీలు పెరిగాయా..? ఇదిగో క్లారిటీ
తెలంగాణలో మరో సారి ఆర్టీసీ బస్సు చార్జీలు వార్తలు వైరల్ అవుతున్నాయి. ఈ వార్తల్లో వాస్తవం లేదని.. టీజీఎస్ఆర్టీసీ వెల్లడించింది. హైవేలపై టోల్ చార్జీలు పెంచుతూ కేంద్రం ఇటీవల నిర్ణయం తీసుకోవడంతో.. టోల్ సెస్ మాత్రమే పెంచినట్లు వివరించింది.
Updated on: Jun 12, 2024 | 9:52 PM
తెలంగాణ రాష్ట్ర రోడ్డు రవాణా సంస్థ(టీజీఎస్ఆర్టీసీ) బస్సుల్లో సాధారణ ఛార్జీలు పెరిగాయని జరుగుతున్న ప్రచారంలో ఏమాత్రం వాస్తవం లేదని సంస్థ యాజమాన్యం తెలిపింది. సాధారణ చార్జీలు యథాతథంగానే ఉన్నాయని వెల్లడించింది. హైవేలపై టోల్ చార్జీలను పెంచుతూ కేంద్ర ప్రభుత్వం ఇటీవల నిర్ణయం తీసుకున్నట్లు వివరించింది. ఆ పెంచిన టోల్ చార్జీల మేరకు టికెట్ లోని టోల్ సెస్‌ను సంస్థ సవరించడం జరిగిందని టీజీఎస్ఆర్టీసీ పేర్కొంది. ఈ సవరించిన టోల్ సెస్ ఈ నెల 3వ తేదీ నుంచే అమల్లోకి వచ్చినట్లు తెలిపింది. టోల్ ప్లాజాలున్న రూట్లలోనే టోల్ సెస్‌ను యాజమాన్యం సవరించింది. సాధారణ రూట్లలో టికెట్ ఛార్జీల్లో ఎలాంటి మార్పుల్లేవు.
టీజీఎస్ఆర్టీసీ సాధారణ బస్ ఛార్జీలను పెంచిందని వాస్తవాలు తెలుసుకోకుండా ఉద్దేశ్యపూర్వకంగా సోషల్ మీడియాలో దుష్ప్రచారం చేయడం మంచిది కాదని సంస్థ హెచ్చరించింది. సంస్థ ప్రతిష్టకు భంగం కలిగించే విధంగా తప్పుడు ప్రచారం చేసే వారిపై పోలీస్ శాఖ సహకారంతో చట్ట ప్రకారం టీజీఎస్ఆర్టీసీ చర్యలు తీసుకుంటుందని వెల్లడించింది.
మరిన్ని తెలంగాణ వార్తల కోసం ఇక్కడ క్లిక్ చేయండి…
