Caste Census: మొత్తం 75 ప్రశ్నలు.. ఫొటోలు తీయరు, అడగరు.. కులగణన సర్వే గురించి క్లియర్ కట్ సమాచారం మీకోసం
సమగ్ర సర్వేకు కౌంట్‌డౌన్‌ స్టార్ట్‌ అయ్యింది.. తెలంగాణ వ్యాప్తంగా కులగణన సర్వే జరగనుంది.. ప్రతి 150 ఇళ్లకు ఒక పర్యవేక్షణాధికారి ఉంటారు.. ఈ సర్వేలో 56 ప్రధాన, 19 అనుబంధ ప్రశ్నలతో కలిపి మొత్తం 75 ప్రశ్నలు ఉంటాయి.. అయితే, సర్వేలో భాగంలో ఇంటికి వచ్చిన అధికారులు ఎలాంటి ప్రశ్నలు అడుగుతారు..? ఇంట్లో అందరూ ఉండాలా..? సమాధానాలు చెబితే సరిపోతుందా..? పూర్తి వివరాలను తెలుసుకోండి..
Updated on: Nov 05, 2024 | 7:43 PM
కులగణన.. తెలంగాణలో ఇప్పుడిదో హాట్ టాపిక్‌. ఒకేఒక్క సర్వేతో కులాల లెక్క తేలుస్తామన్న కాంగ్రెస్‌ ప్రభుత్వం.. అందుకు నవంబర్‌-6ను డేట్‌గా ఫిక్స్‌ చేసింది. అంటే రేపే. మూడువారాల పాటు సాగే ఈ ప్రక్రియకోసం 50వేలమందికి పైగా సిబ్బంది పనిచెయ్యబోతున్నారు. ప్రైమరీ స్కూళ్లకు ఒంటిపూట బడులను పెట్టి మరీ వేలాదిమంది ఉపాధ్యాయులను లెక్కలు తీసే పనికి వాడబోతోంది ప్రభుత్వం. ఈ మూడు వారాల్లో. సదరు సిబ్బంది ఏదో ఒకరోజు మీ ఇంటికొస్తారు. సామాజిక, ఆర్థిక, విద్య, ఉపాధి, రాజకీయ, కుల సమాచారాన్ని సమగ్రంగా సేకరిస్తారు.
ప్రతి 150 ఇళ్లకు ఒక పర్యవేక్షణాధికారి కూడా ఉంటారు. ప్రత్యేకంగా సర్వే కిట్లు ఉన్నాయి. 56 ప్రధాన, 19 అనుబంధ ప్రశ్నలతో కలిపి మొత్తం 75 ప్రశ్నలతో సమగ్ర సమాచారాన్ని తీసుకుంటారు. పార్ట్‌-1, పార్ట్‌-2 కింద ఎనిమిది పేజీల్లో ఈ సమాచారాన్ని పూరిస్తారు. మొదటి భాగం (పార్ట్‌-1)లో కుటుంబ యజమాని, సభ్యుల వ్యక్తిగత వివరాలు తెలపాల్సి ఉంటుంది. పార్ట్‌-1లో మొత్తం 60 ప్రశ్నలు ఉంటాయి. రెండో భాగంలో ఆస్తులు, అప్పులు, ఇంటికి సంబంధించిన ప్రశ్నలు ఉన్నాయి.
ఈ విషయాలను గుర్తుపెట్టుకోండి..
ఈ సర్వేలో ప్రధాన ప్రశ్నలతోపాటు 19 ఉప ప్రశ్నలకు జవాబులు ఇవ్వాల్సి ఉంటుంది. సమగ్ర సర్వేకి వచ్చే సిబ్బంది మిమ్మల్నిగానీ, మీ కుటుంబీకులను గానీ ఫోటోలు తీయరు. అడగరు. ఎలాంటి ధృవీకరణ పత్రాలు తీసుకోరు. కుటుంబంలో అందరూ ఉండాల్సిన అవసరంలేదు. కుటుంబ యజమాని అందుబాటులో ఉండి వివరాలు చెబితే సరిపోతుంది. ముందుగా జిల్లా, మండలం, పంచాయతీ, మున్సిపాలిటీ, వార్డ్‌ నంబర్‌, ఇంటి నంబర్‌ వివరాలను ఎన్యుమరేటర్లు నమోదు చేస్తారు. కులం.. యజమాని.. కుటుంబ సబ్యులు.. విద్యార్హత, వృత్తి, వైవాహికస్థితి, వార్షికాదాయం, ఐదేళ్లలో తీసుకున్న రుణాలు, ఇంటి విస్తీర్ణం, సదుపాయాల లాంటి వివరాలను, భూమి వివరాలను సమగ్ర ఇంటింటి కుటుంబ సర్వేలో భాగంగా సేకరిస్తారు.
Telangana Caste Census
వివరాలు ఎలా సేకరిస్తారంటే..
యజమాని వివరాలు, కుటుంబ సభ్యుల వివరాలు, రిజర్వేషన్ల నుంచి పొందిన విద్యా, ఉద్యోగ ప్రయోజనాలు.. ప్రభుత్వం నుంచి లబ్ధి పొందిన పథకాల పేర్లు, ఎస్టీ, ఎస్సీ, బీసీ, ఈబీసీ సర్టిఫికెట్లు తీసుకున్నారా..? సంచార తెగకు చెందివారా… కాదా..? అనే వివరాలను సర్వేలో నమోదు చేస్తారు. రాజకీయ నేపథ్యం, ప్రభుత్వ పదవులు, ఇతర దేశాలు, రాష్ట్రాలకు వలసలు.. ఉద్యోగాలు, వలస వెళ్లడానికి కారణాలు కూడా అడుగుతారు.
అంతేకాకుండా.. గత 5 ఏళ్లలో రుణాలు తీసుకుని ఉంటే.. ఏ అవసరం కోసం తీసుకున్నారు.. ఎక్కడి నుంచి తీసుకున్నారు..? వంటి వివరాలు పార్ట్‌-2లో పొందుపరిచారు. కుటుంబ సభ్యులందరి మొత్తం స్థిర, చరాస్తులతో ఇంటికి సంబంధించిన పూర్తి వివరాలు సేకరిస్తారు. వ్యవసాయ భూములు ఉంటే.. ధరణి పాస్‌బుక్‌ నంబర్‌తో పాటు భూమి రకం, నీటిపారుదల వనరు, కౌలు సాగుభూమి తదితర వివరాలను సేకరిస్తారు. చివరగా ఎన్యుమరేటర్‌కు అందించిన సమాచారం నిజమని ప్రకటిస్తూ కుటుంబ యజమాని సంతకం చేయాల్సి ఉంటుంది.
కులగణన.. తెలంగాణ సమగ్ర ఇంటింటి కుటుంబ సర్వే ఫామ్ కోసం ఇక్కడ క్లిక్‌ చేయండి..
బీసీలకు రిజర్వేషన్లు కల్పించడంలో భాగంగా.
స్థానిక సంస్థల్లో బీసీలకు 42 శాతం రిజర్వేషన్ ఇస్తామని హామీ ఇచ్చింది..కాంగ్రెస్‌ పార్టీ. కులగణన చేస్తామంటూ తన మేనిఫెస్టోలో కూడా ప్రకటించింది. అధికారంలోకి వచ్చాక అసెంబ్లీలో తీర్మానం చేయడమే గాక, కులగణనకు 150 కోట్లరూపాయలు కేటాయిస్తూ జీవోకూడా జారీ చేసింది రేవంత్ సర్కారు.
ఈ సర్వేతో పెనుమార్పులొస్తాయని ప్రభుత్వం చెబుతుంటే..విపక్షాలు మాత్రం పలు ప్రశ్నలు లేవనెత్తుతున్నాయి. అయితే ప్రభుత్వం ప్రతిష్టాత్మకంగా తీసుకున్న సర్వే ఎలా సాగబోతోంది? చివరికేం తేలబోతోంది? అన్నది పక్కన పెడితే సర్వే నేపథ్యంలో కాంగ్రెస్‌ అగ్రనేత రాహుల్‌ గాంధీ రాక ఆసక్తికరంగా మారింది.
మరిన్ని ప్రీమియం కథనాల కోసం…TV9 News యాప్‌ను డౌన్‌లోడ్ చేసుకోండి..
