Telangana News: చూడటానికి తియ్యటి చాక్లెట్స్‌లా ఉన్నాయి.. ఓపెన్ చేసి చూస్తే గుండె ధడేల్..!
అవి చూడటానికి తియ్యటి చాక్లెట్స్ లాగే ఉంటాయి.. చూస్తే తినాలి అనిపించేంత అందంగా ఉంటాయి.. అవే గంజాయి చాక్లెట్లు.. హైదరాబాద్‌లో పోలీసులు దాడులు నిర్వహించి భారీగా గంజాయి చాక్లెట్లు స్వాధీనం చేసుకున్నారు.
Noor Mohammed Shaik | Edited By: Velpula Bharath Rao
Updated on: Dec 13, 2024 | 7:05 AM
చూడటానికి తియ్యటి చాక్లెట్స్ లాగే ఉంటాయి.. రంగుల కాగితం చుట్టి, చూస్తే తినాలి అనిపించేంత అందంగా ఉంటాయి. కానీ, అవి బయట షాపుల్లో దొరికే చిన్న పిల్లలు తినే చాక్లెట్లు అనుకుంటే మీరు పొరబడినట్లే.. అచ్చంగా గంజాయి చాక్లెట్లు.. ఏకంగా 4 కేజీల, 957 గ్రాముల గాంజా చాక్లెట్స్ సీజ్ చేసి, అవి అమ్ముతున్న వ్యక్తిని పోలీసులు తాజాగా అరెస్ట్ చేశారు.
మేడ్చల్ జిల్లా బోడుప్పల్ ప్రాంతంలో ఎక్సైజ్ ఎన్‌ఫోర్స్‌మెంట్ బృందం రైడ్స్ చేపట్టింది. ఇందులో భాగంగా గాంజా చాక్లెట్స్ విక్రయిస్తున్న వీరేంద్ర పాండే అనే వ్యక్తిని పోలీసులు అదుపులోకి తీసుకున్నారు. అతని వద్ద నుంచి 4 కేజీల, 957 గ్రాముల గాంజా చాక్లెట్స్ సీజ్ చేశారు. నిందితుడు వీరేంద్ర పాండే బీహార్ రాష్ట్రం నుంచి ఈ గాంజా చాక్లెట్లను తీసుకొచ్చి ఇక్కడ హైదరాబాద్ నగరంలో గుట్టు చప్పుడు కాకుండా విక్రయిస్తున్నట్లు పోలీసులు వెల్లడించారు. ముఖ్యంగా వీటిని చిన్నపిల్లల వరకు చేరకుండా ఉండేందుకు కట్టడి చేశామని తెలిపారు. ఆపై సీజ్ చేసిన ప్రాపర్టీని, నిందితుడిని ఎక్సైజ్ ఎన్‌ఫోర్స్‌మెంట్ అధికారులు ఘట్కేసర్ ఎక్సైజ్ పోలీసులకు అప్పగించారు.
మరిన్ని తెలంగాణ వార్తల కోసం ఇక్కడ క్లిక్ చేయండి
