‘ఉద్యోగాల భర్తీపై కాంగ్రెస్‌వన్నీ ఒట్టి మాటలే’.. మాజీ మంత్రి హరీష్ రావు ఫైర్.!

చెప్పేది కొండంత, చేసేది గోరంత కూడా లేదన్నట్టుంది సీఎం రేవంత్ రెడ్డి తీరు ఉందని బీఆర్ఎస్ ఎమ్మెల్యే, మాజీ మంత్రి హరీష్ రావు అన్నారు. ఎల్బీ స్టేడియం వేదికగా నర్సింగ్ ఆఫీసర్లకు నియామక పత్రాల అందజేత పేరిట ఆర్భాటం చేశారన్నారాయన. అందరూ ఊహించినట్లుగానే తామే రిక్రూట్‌మెంట్ చేసినట్లు డబ్బా కొట్టుకున్నారని, ఎన్నికల ప్రచారంలో కేసీఆర్ ప్రభుత్వం నిరుద్యోగులను వంచిందని కల్లిబొల్లి మాటలు చెప్పిన రేవంత్ రెడ్డి, బీఆర్ఎస్ ప్రభుత్వ హయంలో జరిగిన నర్సింగ్ ఆఫీసర్ల భర్తీ ప్రక్రియను తమ ఘనతగా చెప్పుకునే ప్రయత్నం చేస్తూ తన అబద్దాల ప్రస్థానాన్ని కొనసాగిస్తున్నారని మండిపడ్డారు హరీష్ రావు.

ప్రభుత్వం వచ్చిన 50 రోజుల్లోనే స్టాఫ్ నర్స్ నోటిఫికేషన్ ఇచ్చి, నియామక పత్రాలు ఇచ్చారా అనేది రేవంత్ రెడ్డి చెప్పాలన్నారు. సొమ్మొక్కడిది.. సోకు ఇంకొకడిది.. అన్నట్టు ఉద్యోగ నియామక పత్రాలు ఇవ్వడంలో రేవంత్ వ్యవహరించిన తీరును తప్పుబడుతున్నామన్నారు హరీష్ రావు. కేసీఆర్ హయాంలో ఇచ్చిన నోటిఫికేషన్ ప్రకారమే ఈ నర్సుల నియామక పత్రాలు ఇచ్చిన విషయాన్ని మరచిపోవద్దని గుర్తు చేశారాయన. నర్సులుగా ఉద్యోగాలు పొందినవారికి కూడా వాస్తవాలు తెలుసని ఎద్దేవా చేశారు. తెల్లారితే ‘గ్రూప్-1’ నోటిఫికేషన్ ఇస్తారనుకున్న నిరుద్యోగుల ఆశలపై రేవంత్ రెడ్డి నీళ్లు చల్లారని.. అయన ప్రసంగంలో దీని గురించి ఒక్క మాట కూడా ప్రస్తావించలేదని ధ్వజమెత్తారు. ఎన్నికల సమయంలో ఫిబ్రవరి 1వ తేదీన గ్రూప్-1 నోటిఫికేషన్ ఇస్తామని ప్రచారం చేశారు. పత్రికల్లో మొదటి పేజీలో ప్రకటనలు గుప్పించారు. కానీ ఇప్పుడు నోరుమెదపడం లేదన్నారు.

మేం వాస్తవం చెబితే.. శాపనార్థాలు అని మాట్లాడారు, తప్ప నోటిఫికేషన్ల గురించి చెప్పలేదన్నారు మాజీ మంత్రి హరీష్ రావు. ఎన్నికల సమయంలో కాంగ్రెస్ ఇచ్చిన హామీలన్నీ నీటి మూటలే అని రేవంత్ రెడ్డి మరోసారి నిరూపించారని గుర్తు చేశారు. రూ. 2 లక్షల రుణమాఫీ, రైతుబంధు పెంపు, రూ. 500 లకు సిలిండర్, 4000 నెలవారీ పింఛన్, మహాలక్ష్మి ద్వారా రూ. 2500, 200 యూనిట్ల ఉచిత విద్యుత్, నిరుద్యోగ భృతి వంటి అమలు కానీ హామీల లిస్ట్‌లో నేడు జాబ్ క్యాలెండర్ కూడా చేరిందన్నారు. అసలు ఉద్యోగాల గురించి, నిరుద్యోగుల బాధల గురించి మాట్లాడే హక్కు కాంగ్రెస్ పార్టీకి ఎక్కడిదని దుయ్యబట్టారు హరీష్ రావు. 2004 నుంచి 2014 వరకు కాంగ్రెస్ తెలంగాణ ప్రాంతంలో 10 వేల ఉద్యోగాలు మాత్రమే భర్తీ చేసిందా.. కాదా.? అప్పుడు నిరుద్యోగ యువతను మోసం చేసింది చాలక.. ఇప్పుడు మరోసారి మోసం చేయడానికి ప్రయత్నం చేస్తున్నది ఎవరు.? అంటూ ఫైర్ అయ్యారు. ఉద్యోగ నియామకాల్లో బీఆర్ఎస్ ప్రభుత్వం రికార్డు సృష్టించింది. తొమ్మిదనరేళ్లలో లక్షా 65 వేల ఉద్యోగాలను భర్తీ చేయగా, మరో 40 వేల పోస్టుల భర్తీ ప్రక్రియ వివిధ దశల్లో ఉన్నది వాస్తవం కాదా.? కేసీఆర్ ప్రభుత్వం మీద ఉద్యోగాల భర్తీకి సంబంధించి.. రేవంత్ మాట్లాడినదంతా వట్టి డొల్ల అని నేటి కార్యక్రమం రుజువు చేసిందన్నారు. 2 లక్షల ఉద్యోగాల భర్తీకి కాంగ్రెస్ ప్రభుత్వం చేసిన వాగ్ధానాన్ని నిలుపుకుంటే స్వాగతిస్తామన్నారు మాజీ మంత్రి హరీష్ రావు.