TGSRTC: ఎంజీబీఎస్, జేబీఎస్ తరహాలో హైదరాబాద్‌లో మరో భారీ బస్ టెర్మినల్.. ఎక్కడంటే..?

హైదరాబాద్ వాసులకు భారీ శుభవార్త. నగరంలో మరో భారీ బస్ టెర్మినల్ నిర్మాణానికి టీజీఎస్ఆర్టీసీ అడుగులు వేసింది. ఎంజీబీఎస్, జేబీఎస్ తరహాలోనే పెద్ద బస్ టెర్మినల్ నిర్మించేందుకు ప్రణాళికలు రచిస్తోంది. ఈ కొత్త బస్ టెర్మినల్ 100 ఎకరాల్లో ఉంటుంది. జీడిమెట్లలోని గాజులరామారంలో దీనిని నిర్మించాలని భావిస్తున్నారు. ఇక్కడ అంతరాష్ట్ర బస్సుల కోసం ప్రత్యేక బస్ టెర్మినల్, సిటీ బస్సులకు మరో టెర్మినల్, ఎలక్ట్రిక్ బస్సుల కోసం ప్రత్యేక ఛార్జింగ్ స్టేషన్ వంటివి ఏర్పాటు చేయనున్నారు. ఇతర రాష్ట్రాల నుంచి వచ్చే బస్సుల కోసం ఈ ప్రత్యేక టెర్మినల్ ఉపయోగపడనుంది. ఇది నిర్మిస్తే ఎంజీబీఎస్, జేబీఎస్‌పై ఒత్తిడి తగ్గుతుంది.

100 ఎకరాలు కేటాయింపు

ఇక ఈ బస్ టెర్మినల్ కోసం ఇప్పటికే గాజులరామారంలో 100 ఎకరాల కేటాయింపు పూర్తయింది. ఈ మేరకు మేడ్చల్-మల్కాజ్ గిరి కలెక్టర్ ఈ భూమిని టీజీఎస్‌ఆర్టీసీకి కేటాయించారు. వీటిల్లో 30 ఎకరాలను అంతరాష్ట్ర బస్సుల కోసం, 20 ఎకరాలు సిటీ బస్ టెర్మినల్ కోసం కేటాయించారు. ఇక ఎలక్ట్రిక్ బస్సుల కోసం 10 ఎకరాలు కేటాయించారు. 15 ఎకరాల్లో ప్రత్యేక ఛార్జింగ్ స్టేషన్ ఉంటుంది. ఈ భారీ బస్ టెర్మినల్‌లో అత్యాధునిక సౌకర్యాలు అందుబాటులో ఉంటాయి. ఇక దుకాణాలు కూడా పెద్ద సంఖ్యలో ఉంటాయి. నగరంలోకి వచ్చే బస్సులను ఈ కొత్త టెర్మినల్‌కు మళ్లిస్తారు. దీని వల్ల ట్రాఫిక్ రద్దీ కూడా తగ్గుతుంది.

తగ్గనున్న ట్రాఫిక్ సమస్య

ప్రస్తుతం కూకట్ పల్లి, గాజులరామారం, పటాన్ చెర్వు, బీహెచ్ఈఎల్ వంటి ప్రాంతాల్లో బస్సులను ఆపివేస్తున్నారు. ఇక మహారాష్ట్ర, కర్ణాటక నుంచి వచ్చే బస్సులు కూడా రోడ్లపైనే నిలిపివేయడం వల్ల ట్రాఫిక్ సమస్యలు తలెత్తుతున్నాయి. జగద్దిరిగుట్లలో 60 బస్సులు నైట్ హాల్ట్‌లో ఉంటున్నాయి. దీంతొ కొత్త బస్సు టెర్మినల్ రాకతో సమస్య తొలగిపోనుంది. ఇక హైదరాబాద్‌లో కొత్త బస్ డిపోలను కూడా నిర్మించేందుకు ఆర్టీసీ సిద్దమవుతోంది. మరో 10 బస్ డిపోలను ఏర్పాటు చేయాలని కసరత్తులు చేస్తోంది. దీంతో 10 ఎకరాల్లో ఎలక్ట్రిక్ బస్ డిపోను ఏర్పాటు చేయనున్నారు. ఇక అండ్ గ్రౌండ్‌లో వాహనదారలు కోసం మల్టీలెవల్ పార్కింగ్ యార్డ్ కూడా అందుబాటులో ఉంచనున్నారు.