Hyderabad: తనతోనే ఉండాలంటూ వెంటపడ్డాడు.. మహిళ ఒప్పుకోకపోవడంతో ఏం చేశాడంటే..?

వివాహేతర సంబంధం నేపథ్యంలో జరిగిన ఘర్షణ ఓ నిండు ప్రాణాన్ని బలితీసుకుంది. హైదరాబాద్‌లో ఓ మహిళపై కత్తితో కిరాతకంగా దాడి చేసిన ఘటన తీవ్ర కలకలం రేపింది. ఈ దాడిలో తీవ్రంగా గాయపడిన బాధితురాలు ఆసుపత్రిలో చికిత్స పొందుతూ మరణించడంతో, పోలీసులు ఈ కేసును హత్య కేసుగా మార్చి విచారణ వేగవంతం చేశారు. కర్ణాటకలోని బీదర్ జిల్లాకు చెందిన దిలీప్ (28) బతుకుదెరువు కోసం నెల రోజుల క్రితం కుటుంబంతో కలిసి నగరానికి వచ్చి స్థిరపడ్డాడు. అతని భార్య అశ్విని (25), మరదలు అంజలి (23) కూడా వారితో పాటే నివసిస్తున్నారు. అంజలికి ఐదేళ్ల కుమారుడు ఉండ, ఆమె భర్త ఓ క్రిమినల్ కేసులో గత రెండేళ్లుగా జైలులో ఉంటున్నాడు. ఈ క్రమంలో అంజలి భర్త స్నేహితుడైన బీదర్‌కు చెందిన ఆటో డ్రైవర్ అశ్విన్ (25) తరచూ వారి ఇంటికి వచ్చేవాడు. ఆ పరిచయం కాస్తా అంజలి, అశ్విన్ మధ్య సన్నిహిత సంబంధానికి దారితీసింది.

ఇటీవల అశ్విన్‌ను మరో పెళ్లి చేసుకోవాలని అంజలి సూచించింది. కానీ ఆమెను వదులుకోవడానికి నిరాకరించిన అశ్విన్, తనతోనే కలిసి ఉండాలని తీవ్ర ఒత్తిడి తెచ్చాడు. అందుకు ఆమె అంగీకరించకపోవడంతో ఆమెపై కక్ష పెంచుకుని వెంటపడటం మొదలుపెట్టాడు. ఈ క్రమంలో అక్టోబర్ 10న మధ్యాహ్నం 3:30 గంటల ప్రాంతంలో హైదరాబాద్‌లోని దిలీప్ ఇంటికి వచ్చిన అశ్విన్, తన వెంట తెచ్చుకున్న అరటిపండ్లు కోసే కత్తితో అంజలి పొత్తికడుపులో బలంగా పొడిచాడు. దాడిని అడ్డుకునేందుకు యత్నించిన అశ్వినిపై కూడా దాడి చేయడంతో ఆమె కుడిచేతికి తీవ్ర గాయమైంది.

బాధితుల సమాచారంతో రంగంలోకి దిగిన పోలీసులు.. రక్తపు మడుగులో ఉన్న అంజలి, అశ్వినిలను మోతీనగర్‌లోని రివైవ్ ఆసుపత్రికి తరలించారు. తొలుత హత్యాయత్నం కింద కేసు నమోదు చేశారు. అయితే ఆసుపత్రిలో ప్రాణాలతో పోరాడిన అంజలి సోమవారం తెల్లవారుజామున 4:30 గంటలకు మృతి చెందింది. దీంతో పోలీసులు హత్య సెక్షన్ 103(1) BNSను చేర్చి కేసును దర్యాప్తు చేస్తున్నారు. నిందితుడిపై కఠిన చర్యలు తీసుకునేందుకు ఆధారాలు సేకరిస్తున్నారు.