Singapore Open: సెమీఫైనల్ చేరిన పీవీ సింధు.. క్వార్టర్స్‌లోనే ఇంటి బాట పట్టిన సైనా, ప్రణయ్..
రెండుసార్లు ఒలింపిక్ పతక విజేత, ప్రపంచ ఏడో ర్యాంకర్ అయిన సింధు.. దాదాపు రెండు నెలల తర్వాత తొలిసారి సెమీఫైనల్‌కు చేరుకుంది. చివరి సెమీ-ఫైనల్ మ్యాచ్ మేలో థాయిలాండ్ ఓపెన్‌లో జరిగింది.
Updated on: Jul 15, 2022 | 7:16 PM
బ్యాడ్మింటన్ కోర్టు నుంచి భారత్‌కు ఒక గుడ్‌న్యూస్, ఒక బ్యాడ్ న్యూస్ వచ్చింది. ఈ రోజుల్లో సింగపూర్ ఓపెన్ (Singapore Open)లో భారత్‌తో సహా ప్రపంచ వ్యాప్తంగా ఉన్న స్టార్ షట్లర్లు బిజీగా ఉన్నారు. టోర్నమెంట్‌లో ప్రస్తుతం తుదిదశ కోసం మ్యాచ్‌లు జరుగుతున్నాయి. ఇందులో భారత అగ్రశ్రేణి బ్యాడ్మింటన్ స్టార్ పీవీ సింధు(PV Sindhu) జులై 15 శుక్రవారం సెమీ-ఫైనల్‌కు చేరుకుంది. మూడు గేమ్‌ల పాటు హోరాహోరీగా సాగిన మ్యాచ్‌లో సింధు 17-21, 21-11, 21-19తో చైనా క్రీడాకారిణి హాన్ యుయ్‌పై విజయం సాధించింది. అయితే, రెండో అగ్రగామి భారత స్టార్ సైనా నెహ్వాల్(Saina Nehwal) పునరాగమనం క్వార్టర్ ఫైనల్‌లోనే ముగిసింది. ఉత్కంఠభరితంగా సాగిన మరో మ్యాచ్‌లో సైనా 13-21, 21-15, 22-20తో జపాన్‌కు చెందిన అయా ఒహోరి చేతిలో ఓడింది. దాదాపు 15 నెలల తర్వాత సైనా టోర్నీలో క్వార్టర్‌ఫైనల్‌కు చేరుకుంది.
రెండు నెలల్లో తొలి సెమీఫైనల్..
రెండుసార్లు ఒలింపిక్ పతక విజేత, ప్రపంచ ఏడో ర్యాంకర్ అయిన సింధు.. దాదాపు రెండు నెలల తర్వాత తొలిసారి సెమీఫైనల్‌కు చేరుకుంది. చివరి సెమీ-ఫైనల్ మ్యాచ్ మేలో థాయిలాండ్ ఓపెన్‌లో జరిగింది. ఇప్పుడు ఈ చైనా ప్రత్యర్థిపై రికార్డు 3-0గా మారింది. మేలో థాయ్‌లాండ్ ఓపెన్ తర్వాత సింధు తొలిసారి సెమీఫైనల్‌కు చేరుకుంది. ప్రస్తుతం టోర్నీలో మిగిలి ఉన్న ఏకైక భారత క్రీడాకారిణిగా మారింది. బర్మింగ్‌హామ్ కామన్వెల్త్ క్రీడలకు ముందు ఆమె టైటిల్ గెలుస్తుందో లేదో చూడాలి. ఆమె ఇప్పుడు అన్ సీడెడ్ సైనా కవాకమీతో తలపడనుంది.
అదే సమయంలో ప్రపంచ 19వ ర్యాంకర్‌తో జరిగిన తొలి గేమ్‌లో సింధు చాలా సమస్యలను ఎదుర్కొంది. డిఫెన్సివ్ గేమ్‌లో వెనుకబడినప్పటికీ, రెండో గేమ్‌లో విరామానికి మూడు పాయింట్ల ఆధిక్యాన్ని సంపాదించింది. విరామం తర్వాత క్రాస్ కోర్ట్ లో విజేత వరుసగా ఏడు పాయింట్లతో సమం చేయగా.. మూడో గేమ్ లో మ్యాచ్ ఉత్కంఠగా సాగినప్పటికీ సింధు సంయమనంతో ఆడి విజయం సాధించింది.
సైనా-ప్రణయ్‌ల ఓటమి..
లండన్ ఒలింపిక్ కాంస్య పతక విజేత సైనా క్వార్టర్ ఫైనల్స్‌లో ప్రపంచ 9వ ర్యాంకర్ హీ బింగ్ జియావోను ఓడించింది. కానీ, ఆ జోరును కొనసాగించలేకపోయింది. ఆమె జపాన్‌కు చెందిన అయా ఒహోరి చేతిలో 21-13, 15-21, 21-20 తేడాతో ఓడిపోయింది. మరోవైపు ఫామ్‌లో ఉన్న ప్రణయ్‌ను 12-21, 21-14, 21-18తో కోడై నారోక ఓడించాడు. డిసైడర్‌లో, ప్రణయ్ 7-18తో వెనుకంజలో నిలిచిన తర్వాత వరుసగా ఎనిమిది పాయింట్లతో పునరాగమనం చేశాడు. మ్యాచ్‌ను ముగించడానికి మ్యాచ్ పాయింట్లను సేవ్ చేశాడు. కానీ, గెలవలేకపోయాడు. డబుల్స్‌లో ఎంఆర్‌ అర్జున్‌, ధ్రువ్‌ కపిల జోడీ 10-21, 21-18, 21-17తో ఇండోనేషియాకు చెందిన రెండో సీడ్‌ జంట మహ్మద్‌ అహ్సన్‌-హెండ్రా సెటియావాన్‌ చేతిలో ఓడిపోయింది.
