IND Vs NZ: కెరీర్ ఖతం అనుకునేరు.. వాడు కోహ్లీ లెక్క.. ఫైనల్‌లో ఊహకందని ఊచకోత చూస్తారు.. ఖబర్దార్.!

అహ్మదాబాద్‌లో జరగనున్న టి20 ప్రపంచకప్ ఫైనల్ మ్యాచ్‌లో టీమిండియా న్యూజిలాండ్‌తో టైటిల్ పోరుకు సిద్ధమవుతోంది. 2026 టి20 ప్రపంచకప్‌లో భారత జట్టు అద్భుత ప్రదర్శనతో దూసుకువచ్చింది. ఈ కీలక ఫైనల్ మ్యాచ్ కోసం టీమిండియా తుది జట్టు కూర్పుపై విస్తృతంగా చర్చ జరుగుతోంది. ముఖ్యంగా, బ్యాట్స్‌మెన్ అభిషేక్ శర్మ స్థానంపై తీవ్ర స్థాయిలో ఊహాగానాలు నెలకొన్నాయి. ఈ టి20 ప్రపంచకప్‌లో అభిషేక్ శర్మ వరుసగా విఫలమవడంపై అభిమానుల నుంచి, కొంతమంది మాజీ క్రికెటర్ల నుంచి విమర్శలు వ్యక్తమయ్యాయి. అతడిని ఫైనల్ మ్యాచ్‌కు తప్పించాలనే డిమాండ్లు బలంగా వినిపించాయి. అయితే, భారత జట్టు యాజమాన్యం, కోచింగ్ సిబ్బంది మాత్రం భిన్నమైన వైఖరిని అవలంబించారు. ఫైనల్ వంటి పెద్ద మ్యాచ్‌లో అభిషేక్ శర్మకు అవకాశం ఇవ్వడానికే టీం మేనేజ్‌మెంట్ మొగ్గు చూపినట్లు సమాచారం. గౌతమ్ గంభీర్‌తో సహా జట్టు నాయకత్వం శర్మ సామర్థ్యంపై పూర్తి విశ్వాసంతో ఉన్నట్లు తెలుస్తోంది.

వరుస విజయాలతో అద్భుతమైన ఫామ్‌లో ఉన్న జట్టులో అనవసరమైన మార్పులు చేయడం వల్ల విజయంపై ప్రతికూల ప్రభావం పడే అవకాశం ఉందని భారత జట్టు యాజమాన్యం తీవ్రంగా ఆలోచించినట్లు పీటీఐ వెల్లడించింది. ఈ నిర్ణయం అభిషేక్ శర్మపై మరింత ఒత్తిడిని పెంచుతున్నప్పటికీ, అతడు తన సత్తా చాటుకోవడానికి ఇది ఒక సువర్ణావకాశం. ఒకవేళ అభిషేక్ శర్మ ఫైనల్‌లో తన స్థాయికి తగ్గ ప్రదర్శన చేసి రాణిస్తే, ప్రత్యర్థి న్యూజిలాండ్ జట్టుకు మ్యాచ్ లో గెలవడం కష్టతరం అవుతుంది. క్రీజ్‌లో అరగంట పాటు నిలబడినా స్కోర్‌బోర్డును ఆకాశానికి చేర్చే సామర్థ్యం అతడికి ఉంది. అంతకుమించి క్రీజ్‌లో ఉంటే మ్యాచ్ ఏకపక్షంగా మారే అవకాశం ఉంది.

ఇంగ్లాండ్‌పై సెమీ-ఫైనల్ విజయం అనంతరం సంజూ శాంసన్ కూడా అభిషేక్ శర్మ ఫైనల్ లో అద్భుతంగా రాణిస్తాడని ధీమా వ్యక్తం చేశాడు. మొత్తం మీద, టీ20 ప్రపంచ కప్ ఫైనల్ లో టీమిండియా తుది జట్టులో ఎటువంటి మార్పులు లేకుండానే బరిలోకి దిగనుంది. సెమీ-ఫైనల్ లో ఇంగ్లాండ్‌తో తలపడిన జట్టుతోనే న్యూజిలాండ్‌పై విజయం సాధించాలని భారత జట్టు యాజమాన్యం కృతనిశ్చయంతో ఉంది. ఈ నిర్ణయం ద్వారా టీమిండియా స్థిరత్వాన్ని, ఆటగాళ్లపై నమ్మకాన్ని ప్రదర్శిస్తోంది.

ఇది చదవండి: ‘ఫైనల్‌లో టీమిండియాను ఓడించే దమ్మున్నోళ్లం.. వాడికి కన్నీరే మిగులుతుంది..’