Shubman Gill: శుభమన్ గిల్ జట్టుకు దూరం కావడానికి కారణం ఏంటి? గంభీర్ సంచలన వ్యాఖ్యలు

Shubman Gill: భారత క్రికెట్ జట్టు త్వరలో అత్యంత ప్రతిష్టాత్మకమైన న్యూజిలాండ్ పర్యటనకు సిద్ధమవుతోంది. ఈ టూర్‌లో భాగంగా భారత్ జట్టు ఐదు టీ20లు, ఐదు వన్డేలతో పాటు రెండు టెస్ట్ మ్యాచ్‌లను ఆడనుంది. అయితే ఈ భారీ షెడ్యూల్‌కు సంబంధించి టీమిండియా హెడ్ కోచ్ గౌతమ్ గంభీర్‎ ఒక ఆసక్తికరమైన, కీలకమైన ప్రణాళికను వెల్లడించారు. ముఖ్యంగా టెస్ట్ సిరీస్‌కు ఆటగాళ్లను మానసికంగా, శారీరకంగా సన్నద్ధం చేసేందుకు వన్డే సిరీస్‌లో కీలక మార్పులు చేయనున్నట్లు ఆయన పరోక్షంగా సంకేతాలు ఇచ్చారు.

వన్డేల చివరి మ్యాచ్‌ల నుంచి శుభ్‌మన్ గిల్‌కు విశ్రాంతి?

వన్డే సిరీస్ ముగిసిన వెంటనే టెస్ట్ సిరీస్ ప్రారంభం కానున్న నేపథ్యంలో.. రెడ్ బాల్ క్రికెట్ కోసం బ్యాటర్లను సిద్ధం చేయడం అత్యంత ముఖ్యమని గౌతమ్ గంభీర్‎ అభిప్రాయపడ్డారు. దీనికోసం టీమిండియా కెప్టెన్ శుభ్‌మన్ గిల్, కేఎల్ రాహుల్, యశస్వి జైస్వాల్, జస్ప్రీత్ బుమ్రా, మహమ్మద్ సిరాజ్, రవీంద్ర జడేజా, నితీష్ రెడ్డి వంటి కీలక ఆటగాళ్లను వన్డే సిరీస్ చివరి దశలో కొన్ని మ్యాచ్‌ల నుంచి రెస్ట్ ఇచ్చే అవకాశం ఉందని ఆయన తెలిపారు. వైట్ బాల్ క్రికెట్ నుంచి రెడ్ బాల్ క్రికెట్‌కు మారడానికి తగినంత సమయం దక్కాలనే ఈ నిర్ణయం తీసుకోనున్నారు.

టెస్ట్ క్రికెట్టే మా అత్యున్నత ప్రాధాన్యత

హాట్‌స్టార్‌తో జరిగిన ప్రత్యేక ఇంటర్వ్యూలో గౌతమ్ గంభీర్ మాట్లాడుతూ.. టెస్ట్ క్రికెట్ ప్రాముఖ్యతను నొక్కిచెప్పారు. బలమైన టెస్ట్ టీం ఉన్న దేశమే క్రికెట్‌లో ఎప్పటికీ అగ్రగామిగా నిలవగలదని ఆయన స్పష్టం చేశారు. కొత్త ఆటగాళ్లకు కూడా టెస్ట్ క్రికెట్ విలువను అర్థమయ్యేలా చేయడమే తమ ప్రధాన లక్ష్యమని తెలిపారు. టీ20, వన్డేల నుంచి నేరుగా టెస్ట్ మ్యాచ్‌లలో ఆడటం అంత సులభం కానందున, సరైన సన్నాహకాలు ఉండాలని గంభీర్‎ గట్టిగా నమ్ముతున్నారు.

భవిష్యత్తులో ఆటగాళ్ల నిరంతర రొటేషన్

ప్రస్తుత ఆధునిక క్రికెట్‌లో అన్ని ఫార్మాట్లలోనూ ఒకే జట్టుతో కొనసాగడం అసాధ్యమని గంభీర్‎ స్పష్టం చేశారు. రాబోయే రోజుల్లో అన్ని ఫార్మాట్లలో ఆడే ఆటగాళ్ల సంఖ్య చాలా తక్కువగా ఉంటుందని తెలిపారు. వర్క్ మేనేజ్‌మెంట్, ఫిట్‌నెస్‌ను దృష్టిలో ఉంచుకుని ఆటగాళ్లను ఎప్పటికప్పుడు రొటేట్ చేయడం తప్పనిసరి అని ఆయన పేర్కొన్నారు. కివీస్ గడ్డపై భారత్ టెస్ట్ సిరీస్‌ను కైవసం చేసుకోవడానికి కోచ్ గంభీర్‎ వేస్తున్న ఈ ప్లాన్ ఎంతవరకు వర్కౌట్ అవుతుందో వేచి చూడాలి.

మరిన్ని క్రికెట్ వార్తల కోసం ఇక్కడ క్లిక్ చేయండి..