Team India : గెలుపు వెనుక దాగున్న లోపాలు..రెండో వన్డేలో టీమిండియాకు ఈ 3 ప్రాబ్లమ్స్ చాలా డేంజర్

Team India : భారత క్రికెట్ జట్టు నవంబర్ 30న సౌతాఫ్రికాతో జరిగిన తొలి వన్డే మ్యాచ్‌లో 17 పరుగుల తేడాతో విజయం సాధించింది. ఇప్పుడు మూడు మ్యాచ్‌ల ఈ సిరీస్‌లో 2-0 ఆధిక్యం సాధించి సిరీస్‌ను కైవసం చేసుకోవడానికి డిసెంబర్ 3న రాయ్‌పూర్‌లో జరగబోయే రెండో వన్డేకు టీమిండియా సిద్ధమవుతోంది. తొలి మ్యాచ్‌లో విరాట్ కోహ్లీ (135 పరుగులు), కుల్దీప్ యాదవ్ (4 వికెట్లు) అద్భుతంగా రాణించారు. అయితే విజయం సాధించినప్పటికీ, జట్టు కూర్పులో కొన్ని లోపాలు స్పష్టంగా కనిపించాయి. రెండో వన్డేలో భారత జట్టు తప్పనిసరిగా మెరుగుపరుచుకోవాల్సిన ఆ 3 బలహీనతలు ఏంటో చూద్దాం.

రోహిత్-కోహ్లీ-రాహుల్‌పై అతిగా ఆధారపడటం

తొలి వన్డేలో భారత జట్టు 349 పరుగుల భారీ స్కోరు సాధించినప్పటికీ, ఎక్కువ పరుగులు కేవలం ముగ్గురు సీనియర్ ఆటగాళ్ల నుంచే వచ్చాయి. విరాట్ కోహ్లీ (135), కేఎల్ రాహుల్ (60), రోహిత్ శర్మ (57) కలిసి మొత్తం 252 పరుగులు చేశారు. జట్టులో 10 మంది బ్యాటింగ్ చేసినప్పటికీ, మిగిలిన బ్యాట్స్‌మెన్లు అందరూ కలిసి కేవలం 74 పరుగులు మాత్రమే చేయగలిగారు. మిడిల్ ఆర్డర్, లోయర్ మిడిల్ ఆర్డర్ బ్యాట్స్‌మెన్ల నుంచి పరుగులు రాలేదు. ప్రతిసారీ ముగ్గురు సీనియర్ల మీదే ఆధారపడటం మంచిది కాదు. రెండో వన్డేలో మిగిలిన భారతీయ బ్యాట్స్‌మెన్లు కూడా మెరుగైన ప్రదర్శన చేయాల్సిన అవసరం ఉంది.

బ్యాటింగ్ ఆర్డర్‌లో తప్పుడు నిర్ణయాలు

టెస్ట్ క్రికెట్‌లో బ్యాటింగ్ ఆర్డర్‌ను తరచుగా మార్చడంపై తీవ్ర విమర్శలు ఎదుర్కొంటున్న భారత జట్టు, వన్డే మ్యాచ్‌లోనూ అదే తప్పును పునరావృతం చేసింది. ఈ మ్యాచ్‌లో ఆల్-రౌండర్ వాషింగ్టన్ సుందర్‌ను బ్యాటింగ్ ఆర్డర్‌లో కేఎల్ రాహుల్ కంటే ముందు పంపించారు. ఈ వ్యూహం పూర్తిగా విఫలమైంది. సుందర్ కేవలం 13 పరుగులు చేసి అవుట్ అయ్యాడు. సుందర్ బ్యాటింగ్‌కు వచ్చినప్పుడు ఇంకా 23 ఓవర్లకు పైగా ఆట మిగిలి ఉంది. ఇన్నింగ్స్‌ను నిలబెట్టే ఉద్దేశంతో పంపినా, సుందర్ భారీ షాట్ ఆడబోయి వికెట్ కోల్పోవడం జట్టు వ్యూహాన్ని దెబ్బతీసింది. రాహుల్ లాంటి నిలకడైన ఆటగాడిని పక్కన పెట్టి సుందర్‌ను ముందు పంపడం సరైన నిర్ణయం కాదు.

డెత్ ఓవర్లలో బౌలింగ్ మెరుగుదల అవసరం

తొలి వన్డేలో భారత బౌలింగ్ దాడి అనుభవం లేమితో కనిపించింది.. ముఖ్యంగా ఇన్నింగ్స్ చివరి దశలో. సౌతాఫ్రికా ఆటగాడు కార్బిన్ బాష్ భారత బౌలర్లను ఒంటరిగా ఎదుర్కొని పరుగులు రాబట్టగలిగాడు. యువ పేసర్ హర్షిత్ రాణా తన డెత్ ఓవర్ బౌలింగ్ నైపుణ్యాలను మెరుగుపరుచుకోవాలి. సౌతాఫ్రికాకు చివరి 7 ఓవర్లలో 61 పరుగులు అవసరమైనప్పుడు, ఒక వైపు అర్ష్‌దీప్ సింగ్ కట్టుదిట్టంగా బౌలింగ్ వేసినా, రాణా తన చివరి 2 ఓవర్లలోనే 22 పరుగులు సమర్పించుకున్నాడు. ఈ విభాగంలో రెండో వన్డేలో భారత్ మరింత మెరుగ్గా రాణించాలి. రెండో వన్డేలో ఈ మూడు బలహీనతలను సరిదిద్దుకుంటేనే, టీమిండియా సౌతాఫ్రికా పై 2-0 ఆధిక్యంతో సిరీస్‌ను సులభంగా గెలవగలుగుతుంది. లేదంటే, జట్టుపై ఒత్తిడి పెరిగి సిరీస్ పోరాటంగా మారే అవకాశం ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..