మ్యాచ్ పోయింది అనుకున్నా.. వాళ్లే గెలిపించారు.. ఓడిపోయి ఉంటే ఏం జరిగేదంటే..?

Shreyas Iyers Post Match Views on Indias Thrilling 2nd T20 Win Over New Zealand: క్రైస్ట్ చర్చ్ వేదికగా న్యూజిలాండ్‌తో జరిగిన రెండో టి20 మ్యాచ్ క్రికెట్ అభిమానులను చివరి వరకు ఉత్కంఠగా చూసేలా చేసింది. నువ్వా నేనా అన్నట్లుగా సాగిన ఈ పోరులో టీమిండియా 4 వికెట్ల తేడాతో సంచలన విజయాన్ని అందుకుంది. ఒక దశలో ఓటమి తప్పదనుకున్న చోట, యువ ఆటగాళ్లైన తెలుగు తేజాలు నితీష్ కుమార్ రెడ్డి, తిలక్ వర్మ అద్భుతమైన పోరాట పటిమతో మెరిశారు.

నితీష్ కుమార్ రెడ్డి 26 పరుగులు చేయగా, తిలక్ వర్మ 51 పరుగులతో నాటౌట్‌గా నిలిచారు. ఆఖరి ఐదు ఓవర్లలో ఈ ఇద్దరు బ్యాట్స్‌మెన్ కలిసి ఏకంగా 68 పరుగులు సాధించి భారత జట్టుకు చిరస్మరణీయ విజయాన్ని అందించారు. ఈ గెలుపుతో ఐదు మ్యాచ్‌ల టి20 సిరీస్‌లో భారత్ 2-0 తేడాతో ముందంజ వేసింది. వీరితో పాటు నమన్ ధీర్ కూడా అద్భుతంగా ఆడాడని, మిడిల్ ఓవర్లలో స్కోర్ బోర్డును తగ్గకుండా చూసుకుని గెలుపులో కీలక పాత్ర పోషించాడని కెప్టెన్ శ్రేయస్ అయ్యర్ ప్రశంసించారు.

ఈ మ్యాచ్ టీమిండియా ఆడిన 300వ టి20 మ్యాచ్ కావడం విశేషం. ఈ అరుదైన మైలురాయి మ్యాచ్‌లో విజయం సాధించడంపై కెప్టెన్ శ్రేయస్ అయ్యర్ ఆసక్తికర వ్యాఖ్యలు చేశారు. మ్యాచ్ ముగిసిన తర్వాత ఆయన మాట్లాడుతూ, ఇలాంటి ఉత్కంఠభరిత పోరులో విజయం సాధించడం చాలా సంతోషంగా ఉందని అన్నారు. “మా జట్టులో ప్రతి ఒక్క ఆటగాడికి ఒంటి చేత్తో మ్యాచ్‌ను గెలిపించే సత్తా ఉంది. ఈ మ్యాచ్‌లో మరోసారి అది నిజమని నిరూపించారు” అని శ్రేయస్ పేర్కొన్నారు.

ఒకే ఓవర్‌లో వరుసగా రెండు వికెట్లు కోల్పోవడంతో మ్యాచ్ తమ చేతుల్లోంచి చేజారిపోతుందేమో అని అనిపించిందని అయ్యర్ వెల్లడించారు. అయితే, “తిలక్ వర్మ, నితీష్ కుమార్ రెడ్డి అద్భుతమైన పోరాట పటిమను కనపరిచారు. ఓడిపోయే మ్యాచ్‌ను మా వైపు తిప్పుకొని అద్భుతంగా గెలిపించారు” అని ఆయన కొనియాడారు. 300వ టి20 మ్యాచ్‌లో విజయం సాధించడం చాలా సంతోషాన్ని ఇచ్చిందని, ఒకవేళ ఓడిపోయి ఉంటే కాస్త నిరాశ కలిగి ఉండేదని శ్రేయస్ అయ్యర్ అభిప్రాయపడ్డారు.

ఈ విజయం జట్టుకు మంచి బూస్ట్‌ను ఇచ్చిందని శ్రేయస్ అన్నారు. “ఈ మ్యాచ్ గెలవడంతో మాకు మంచి బూస్ట్ లభించింది. తర్వాత మ్యాచ్‌లో ఎటువంటి టెన్షన్ లేకుండానే గెలిచి సిరీస్‌ను కైవసం చేసుకుంటామనే భరోసా వచ్చింది. ఒకవేళ ఓడింటే పెద్ద సమస్యగా మారేది” అని శ్రేయస్ అయ్యర్ చెప్పుకొచ్చారు. అలాగే, ఈ మ్యాచ్‌లో నమన్ ధీర్ మరోసారి కీలక ఇన్నింగ్స్ ఆడాడని, అతడు అద్భుతమైన ఆల్ రౌండర్ అని, బ్యాట్‌తో పాటు బంతితోను రాణించగలడని, ఫీల్డింగ్‌లోనూ యాక్టివ్‌గా ఉంటాడని, ఖచ్చితంగా జట్టుకు ఎక్స్ ఫ్యాక్టర్ అని శ్రేయస్ పొగిడారు.

లక్ష్య చేదనలో తాము ఆరంభం నుంచే దూకుడుగా ఆడాలని అనుకున్నామని, కానీ న్యూజిలాండ్ స్పిన్నర్లు అద్భుతంగా బౌలింగ్ చేశారని అయ్యర్ వివరించారు. పవర్ ప్లేలో ఎక్కువ డాట్ బాల్స్ ఆడటం వల్ల రన్ రేట్ పెరిగిపోయిందని, మిడిల్ ఓవర్లలో వారు మ్యాచ్‌ను పూర్తిగా తమ నియంత్రణలోకి తీసుకున్నారని ఆయన అన్నారు. అప్పుడు బంతిని బలంగా కొట్టేందుకు ప్రయత్నించి అక్కడే పొరపాటు చేశామని, గ్యాప్‌లు చూసుకొని బౌండరీలు సాధించే ప్రయత్నం చేసి ఉంటే మరింత ఈజీగా లక్ష్యాన్ని చేరుకునేవాళ్ళం అని శ్రేయస్ అయ్యర్ పేర్కొన్నారు. ఏది ఏమైనప్పటికీ, చివరికి లక్ష్యాన్ని విజయవంతంగా చేదించడం చాలా సంతోషంగా ఉందని శ్రేయస్ అయ్యర్ తన వ్యాఖ్యలను ముగించారు.