DC vs KKR: మరికొద్ది గంటల్లో బద్దలయ్యే టాప్ రికార్డ్స్ ఇవే! రహానే నుండి కోహ్లీ దోస్త్ వరకు..
ఢిల్లీ క్యాపిటల్స్ vs కోల్కతా నైట్రైడర్స్ మధ్య జరుగనున్న మ్యాచ్ రికార్డుల పండుగగా మారనుంది. అజింక్య రహానే, కుల్దీప్ యాదవ్, ఫాఫ్ డు ప్లెసిస్ లాంటి స్టార్ ప్లేయర్లు తమ తమ మైలురాళ్లను అధిగమించేందుకు సిద్ధంగా ఉన్నారు. అభిషేక్ పోరెల్, ట్రిస్టన్ స్టబ్స్ వంటి యువ ఆటగాళ్లు కూడా వ్యక్తిగత ఘనతలపై కన్నేశారు. ఈ మ్యాచ్ అభిమానులకు మరిచిపోలేని క్రికెట్ అనుభూతిని అందించనుంది.
ఐపీఎల్ 2025లో మంగళవారం ఢిల్లీలోని అరుణ్ జైట్లీ స్టేడియంలో ఢిల్లీ క్యాపిటల్స్ (DC) vs కోల్కతా నైట్రైడర్స్ (KKR) మధ్య జరగనున్న 48వ మ్యాచ్ అభిమానులను ఉత్కంఠకు గురి చేసేలా ఉంది. సాయంత్రం 7:30 గంటలకు ప్రారంభమయ్యే ఈ హై-ఆక్టేన్ మ్యాచ్ పాయింట్ల పట్టికపై మాత్రమే కాదు, వ్యక్తిగత రికార్డుల పరంగానూ భారీ అంచనాల నడుమ జరగనుంది. తొమ్మిది మ్యాచ్ల్లో ఆరు విజయాలతో ఢిల్లీ నాల్గవ స్థానంలో ఇప్పటికే కొనసాగుతుండగా, కోల్కతా మాత్రం మూడు విజయాలు, ఐదు ఓటములు, ఒక వర్షంతో రద్దైన మ్యాచ్తో వెనుకంజలో ఉంది. కానీ ఈ పోరులో వ్యక్తిగతంగా తమ మైలురాళ్లను అధిగమించేందుకు సిద్ధంగా ఉన్నారు.
ప్రఖ్యాత భారత బ్యాట్స్మన్ అజింక్య రహానే ఐపీఎల్లో 500 పరుగుల క్లబ్లో అడుగుపెట్టేందుకు కేవలం 87 పరుగుల దూరంలో ఉన్నాడు. ఇప్పటివరకు 194 మ్యాచ్లలో 4913 పరుగులు చేసిన రహానే ఈ మ్యాచ్లో చక్కటి ఇన్నింగ్స్తో ఈ ఘనతను సాధించే అవకాశం ఉంది. మరోవైపు, ఈ సీజన్లో మళ్లీ ఐపీఎల్ బాట పట్టిన కరుణ్ నాయర్ 50 సిక్సర్ల మైలురాయికి కేవలం మూడు సిక్సర్ల దూరంలో ఉన్నాడు. అరుణ్ జైట్లీ మైదానం పరిమిత బౌండరీలు ఉండటం వల్ల, ఈ అవకాశం అతనికి కలిసొచ్చేలా ఉంది.
ఇక దక్షిణాఫ్రికా యువ ఆటగాడు ట్రిస్టన్ స్టబ్స్ 50 ఐపీఎల్ బౌండరీలను పూర్తిచేసేందుకు మరో ఐదు ఫోర్లే అవసరం. ఈ స్థాయిలో తన స్థిరతను నిరూపించుకుంటున్న సమయంలో, ఈ మైలురాయిని చేరుకోవడం అతని ఆత్మవిశ్వాసాన్ని మరింత పెంచుతుంది. ఇక స్పిన్నర్ కుల్దీప్ యాదవ్ మాత్రం ఐపీఎల్లో 100 వికెట్లు తీసిన బౌలర్ల జాబితాలో చేరడానికి కేవలం ఒక వికెట్ దూరంలో ఉన్నాడు. తన ప్రత్యక్ష ఫామ్, అనుభవం, ఢిల్లీలోని అనుకూల పిచ్ల నేపథ్యంలో ఈ విజయాన్ని సాధించడం చాలా సాధ్యమే.
ఇంకా ఢిల్లీకి చెందిన యువ వికెట్కీపర్ బ్యాట్స్మన్ అభిషేక్ పోరెల్ తన టీ20 కెరీర్లో 50 సిక్సర్ల మార్కును చేరేందుకు కేవలం నాలుగు సిక్సర్ల దూరంలో ఉన్నాడు. అతని దూకుడు శైలిని తీసుకుంటే, ఈ మ్యాచ్లో అతను ఆ రికార్డును బద్దలు కొట్టే అవకాశం ఉంది. అదే సమయంలో, దక్షిణాఫ్రికా స్టార్ బ్యాట్స్మన్ ఫాఫ్ డు ప్లెసిస్ ఐపీఎల్లో తన 150వ మ్యాచ్ ఆడేందుకు సిద్ధమవుతున్నాడు. ఇప్పటివరకు 35.67 సగటుతో 4674 పరుగులు చేసిన ఈ క్లాసీ ఆటగాడు, ఈ ప్రత్యేక సందర్భాన్ని ప్రత్యేక ఇన్నింగ్స్తో గుర్తుంచుకోవాలని లక్ష్యంగా పెట్టుకున్నాడు.
ఈ నేపథ్యంలో DC vs KKR మ్యాచ్లో నేడు జరగబోయే పోరు కేవలం రెండు జట్ల మధ్య పోరాటం మాత్రమే కాకుండా, అనేక వ్యక్తిగత ఘనతలకు వేదికగా నిలవనుంది. అభిమానులకు ఈ మ్యాచ్ ఒక రికార్డుల పండుగగా మారే అవకాశం ఉందనే భావనతో అందరూ ఆసక్తిగా ఉన్నారు.
మరిన్ని ఐపీఎల్ వార్తల కోసం ఇక్కడ క్లిక్ చేయండి..