World Cup 2023: పాకిస్తాన్ ఆడే మ్యాచ్‌లపై ఉత్కంఠ.. వాళ్లు డిసైడ్ చేస్తేనే బరిలోకి.. లేదంటే వరల్డ్ కప్ నుంచి ఔట్?

Icc Wc 2023 Ind Vs Pak

వన్డే ప్రపంచ కప్(ICC ODI World Cup 2023) షెడ్యూల్ ప్రకటించిన తర్వాత భారత్‌లో ఈ టోర్నీ సన్నాహాలు కూడా వేగం పుంజుకున్నాయి. అలాగే ప్రపంచకప్ చరిత్రలో భారత గడ్డపైనే ప్రపంచకప్ నిర్వహిస్తున్న బీసీసీఐ.. మ్యాచ్ లు జరిగే మొత్తం 10 వేదికల తయారీపై దృష్టి సారించింది. అయితే ఈలోగా పాకిస్థాన్ భద్రతా బృందం భారత్‌లో పర్యటించనున్నట్లు సమాచారం. నివేదికల ప్రకారం, ఈ ప్రతినిధి బృందంలోని అధికారులు అన్ని వేదికల వద్ద భద్రత ఏర్పాట్లను తనిఖీ చేయడానికి పాకిస్తాన్ తన మ్యాచ్‌లు ఆడాల్సిన వేదికలను సందర్శిస్తారు. ఇది అన్ని వేదికల వద్ద తన ఆటగాళ్లకు, అభిమానులకు, మీడియాకు అందుబాటులో ఉన్న సౌకర్యాలను సమీక్షిస్తుంది. దాని నివేదికను పాకిస్తాన్ ప్రభుత్వానికి సమర్పిస్తుంది. ఈ ప్రతినిధి బృందం నివేదిక ఆధారంగా పాకిస్థాన్ జట్టును భారత్‌లో ప్రపంచకప్ ఆడేందుకు అనుమతించాలని పాకిస్థాన్ ప్రభుత్వం నిర్ణయించనున్నట్లు తెలిసింది.

వేదిక మార్పులపై డిమాండ్ ..

పాకిస్తాన్ ప్రతినిధి బృందం ఏదైనా ప్రదేశం భద్రత లేదా ఇతర సౌకర్యాలతో సంతృప్తి చెందకపోతే, అది తన నివేదికలో రాసి పాకిస్తాన్ ప్రభుత్వానికి సమర్పిస్తుంది. ఆ తరువాత, పాకిస్తాన్ ప్రభుత్వం ఈ విషయాన్ని పీసీబీకి తెలియజేస్తుంది. అంతిమంగా, పీసీబీ తన జట్టు వేదికలను మార్చమని ఐసీసీ లేదా బీసీసీఐకి రాతపూర్వక డిమాండ్ చేస్తుంది. వాస్తవానికి వేదిక మార్పుపై పాకిస్థాన్ ప్రతినిధి బృందం పట్టుబట్టే అవకాశాలున్నాయి. ఎందుకంటే గతంలో పాక్ బోర్డు 2 మ్యాచ్‌ల వేదికలను మార్చాలని డిమాండ్ చేసింది. ఇప్పుడు పాక్ ప్రతినిధి బృందం మద్దతుతో ఆ 2 వేదికలను మార్చాలని ఐసీసీపై ఒత్తిడి తెచ్చే అవకాశం ఉంది.

2 వేదికలు మార్చాలి..

ఆఫ్ఘనిస్థాన్‌తో చెన్నైలో, ఆస్ట్రేలియాతో బెంగళూరులో మ్యాచ్‌లు ఆడేందుకు పాకిస్థాన్ క్రికెట్ బోర్డు అభ్యంతరం వ్యక్తం చేసింది. ఈ మేరకు పీసీబీ ఐసీసీకి లేఖ కూడా రాసింది. కానీ, షెడ్యూల్‌ను ప్రకటించగానే పీసీబీ డిమాండ్‌ను ఐసీసీ తోసిపుచ్చింది. అయితే, ఇప్పుడు తన భద్రతా ప్రతినిధి బృందాన్ని ఉపయోగించి, పాకిస్తాన్ మరోసారి మ్యాచ్‌ల వేదికను మార్చడానికి బలవంతం చేయవచ్చు.

భద్రతా ప్రతినిధి బృందం ఎప్పుడు వస్తుందంటే?

విదేశాంగ, హోం మంత్రిత్వ శాఖలతో చర్చించిన తర్వాత పాకిస్థాన్ భద్రతా బృందం భారత్‌ను ఎప్పుడు సందర్శించాలనేది పీసీబీ నిర్ణయిస్తుంది. అలాగే భారత్‌కు వచ్చే పాక్ భద్రతా బృందం చెన్నై, బెంగళూరు, హైదరాబాద్, కోల్‌కతా, అహ్మదాబాద్‌లలో పాకిస్థాన్ మ్యాచ్‌లు జరిగే ప్రదేశాలను తనిఖీ చేస్తుంది. టీమ్‌ను భారత్‌కు పంపే ముందు ప్రభుత్వ అనుమతి కోసం పీసీబీ ప్రతినిధి బృందాన్ని పంపడం సాధారణ ఆచారం అని బీసీసీఐ వర్గాలు తెలిపాయి.

పాకిస్థాన్ ప్రపంచ కప్ షెడ్యూల్..

2023 ప్రపంచకప్‌లో పాకిస్థాన్ జట్టు 5 వేదికలపై 9 లీగ్ మ్యాచ్‌లు ఆడనుంది. పాకిస్థాన్ తొలి మ్యాచ్ అక్టోబర్ 6న క్వాలిఫయర్ 1తో, రెండో మ్యాచ్ అక్టోబర్ 12న క్వాలిఫయర్ 2తో ఆడనుంది. అక్టోబర్ 15న టీమ్ ఇండియాతో పాకిస్థాన్ జట్టు ఆడనుంది. ఈ మ్యాచ్ అహ్మదాబాద్‌లోని నరేంద్ర మోదీ స్టేడియంలో జరగనుంది. అక్టోబర్ 20న బెంగళూరులో ఆస్ట్రేలియాతో పాకిస్థాన్ జట్టు ఆడనుంది. అక్టోబర్ 23న చెన్నైలో ఆఫ్ఘనిస్థాన్‌తో పాకిస్థాన్ 5వ మ్యాచ్ జరగనుంది. పాకిస్థాన్ ఆరో మ్యాచ్ దక్షిణాఫ్రికాతో అక్టోబర్ 27న చెన్నైలో జరగనుంది. అక్టోబర్ 31న కోల్‌కతాలో బంగ్లాదేశ్‌తో పాకిస్థాన్ తలపడనుంది. నవంబర్ 4న బెంగళూరులో న్యూజిలాండ్‌తో పాకిస్థాన్ ఆడనుంది. నవంబర్ 12న కోల్‌కతాలో ఇంగ్లండ్‌తో పాకిస్థాన్ తలపడనుంది.

మరిన్ని క్రీడా వార్తల కోసం ఇక్కడ క్లిక్ చేయండి..