Unlucky Cricketer: ప్రపంచంలోనే అత్యంత దురదృష్టవంతుడైన క్రికెటర్..! విషయం తెలిస్తే జాలి పడాల్సిందే భయ్యా..

World Most Unlucky Cricketer: క్రికెట్ ప్రపంచంలో ప్రతి బ్యాట్స్‌మన్‌కు కొన్ని కలలు ఉంటాయి. సెంచరీ, డబుల్ సెంచరీ, ట్రిపుల్ సెంచరీ వంటి మైలురాళ్లను అందుకోవడం వారి లక్ష్యం. అయితే, ఒక్క పరుగు తేడాతో చరిత్ర సృష్టించే అవకాశాన్ని కోల్పోవడం కంటే దురదృష్టం మరొకటి ఉండదు. కాగా, టెస్ట్ క్రికెట్ లో 99 పరుగుల వద్ద ఔటైన 88వ బ్యాట్స్ మాన్ గా హ్యారీ బ్రూక్ నిలిచాడు. ఈ స్కోరు వద్దనే బ్యాట్స్ మెన్ అవుట్ అయ్యారని కాదు. కొంతమంది ఆటగాళ్లు డబుల్ సెంచరీ కూడా చేయకుండా 199 పరుగుల వద్ద పెవిలియన్ కు తిరిగి వచ్చారు. ఇప్పటివరకు 12 మంది ఆటగాళ్లు 199 పరుగుల వద్ద ఔటయ్యారు. నిజానికి, 1 ఆటగాడు 299 పరుగుల వద్ద పెవిలియన్ కు తిరిగి వచ్చాడు. ఇప్పటివరకు టెస్ట్ క్రికెట్ చరిత్రలో, ఒక బ్యాట్స్ మన్ ట్రిపుల్ సెంచరీ సాధించకుండా పోవడం ఒక్కసారి మాత్రమే జరిగింది. అలాంటి ఓ మరపురాని, విషాదకరమైన సంఘటనకు నిలువుటద్దం న్యూజిలాండ్ దిగ్గజ క్రికెటర్ మార్టిన్ క్రో. టెస్ట్ క్రికెట్ చరిత్రలో 299 పరుగుల వద్ద ఔటైన ఏకైక ఆటగాడిగా ఆయన చరిత్రలో నిలిచిపోయారు.

ఆ చారిత్రాత్మక ఇన్నింగ్స్..

1991లో శ్రీలంకతో వెల్లింగ్‌టన్‌లోని బేసిన్ రిజర్వ్ మైదానంలో జరిగిన టెస్ట్ మ్యాచ్ ఈ చారిత్రాత్మక ఘట్టానికి వేదికైంది. ఆ మ్యాచ్‌లో న్యూజిలాండ్ కెప్టెన్‌గా ఉన్న మార్టిన్ క్రో అద్భుతమైన పోరాట పటిమను ప్రదర్శించాడు. దాదాపు 10 గంటల పాటు క్రీజులో పాతుకుపోయి, 543 బంతులను ఎదుర్కొని శ్రీలంక బౌలర్లకు కొరకరాని కొయ్యగా మారాడు. ఈ క్రమంలో ఆండ్రూ జోన్స్‌తో కలిసి మూడో వికెట్‌కు రికార్డు స్థాయిలో 467 పరుగుల భాగస్వామ్యాన్ని నెలకొల్పాడు.

ఇవి కూడా చదవండి

ఒకరేమో కూల్ అండ్ కామ్.. మరొకరేమో ఫైర్ బ్రాండ్..: శుభ్మన్ గిల్

అరేవో ఆజామూ.. నాలుగోసారి WTC ఫైనల్‌కు నో ఛాన్స్

ఇంగ్లండ్‌తో సిరీస్‌కు ముందే టీమిండియాకు బ్యాడ్ న్యూస్..

ఆసీస్ దూల తీర్చుతోన్న ఆ శాపం.. హ్యాట్రిక్ ఐసీసీ ట్రోఫీలు మిస్

ఒక్క పరుగు ముందు ఆగిన రికార్డ్ ప్రస్థానం..

అందరి చూపు మార్టిన్ క్రో ట్రిపుల్ సెంచరీపైనే ఉంది. న్యూజిలాండ్ తరపున తొలి ట్రిపుల్ సెంచరీ వీరుడిగా నిలిచేందుకు ఆయన కేవలం ఒక్క పరుగు దూరంలో ఉన్నాడు. మైదానంలోని ప్రేక్షకులు, డ్రెస్సింగ్ రూమ్‌లోని సహచరులు ఉత్కంఠతో ఊపిరి బిగబట్టి చూస్తున్నారు. సరిగ్గా అదే సమయంలో శ్రీలంక కెప్టెన్ అర్జున రణతుంగ బౌలింగ్ చేయడానికి వచ్చాడు. ఆయన వేసిన ఓ సాధారణ బంతికి అనవసరమైన షాట్‌కు ప్రయత్నించిన క్రో, వికెట్ కీపర్‌కు క్యాచ్ ఇచ్చి వెనుదిరిగాడు.

ఆ ఒక్క క్షణం మైదానం మొత్తం నిశ్శబ్దంగా మారిపోయింది. 299 పరుగుల వద్ద ఔటైన మార్టిన్ క్రో తీవ్ర నిరాశతో పెవిలియన్ బాట పట్టాడు. చరిత్ర సృష్టించే అవకాశాన్ని చేజార్చుకున్న ఆ క్షణం క్రికెట్ చరిత్రలోనే అత్యంత దురదృష్టకరమైన సంఘటనలలో ఒకటిగా నిలిచిపోయింది.

ఏకైక ఆటగాడిగా విషాద రికార్డు..

టెస్ట్ క్రికెట్ చరిత్రలో సర్ డాన్ బ్రాడ్‌మాన్ ఒకసారి 299 పరుగులతో నాటౌట్‌గా నిలిచారు. కానీ, 299 పరుగుల వ్యక్తిగత స్కోరు వద్ద ఔటైన ఏకైక ఆటగాడు మాత్రం మార్టిన్ క్రోనే. ఈ విషాదకరమైన రికార్డు ఆయనను “ప్రపంచంలోనే అత్యంత దురదృష్టవంతుడైన క్రికెటర్”గా మార్చింది.

క్రో కేవలం 299 మాత్రమే కాదు..

మార్టిన్ క్రో కేవలం ఈ ఒక్క ఇన్నింగ్స్‌కే పరిమితం కాదు. ఆయన తన సొగసైన బ్యాటింగ్ శైలితో న్యూజిలాండ్ చూసిన అత్యుత్తమ బ్యాట్స్‌మెన్‌లలో ఒకరిగా గుర్తింపు పొందారు. 1992 ప్రపంచకప్‌లో తన వినూత్నమైన కెప్టెన్సీతో జట్టును సెమీ ఫైనల్స్‌కు నడిపించాడు. స్పిన్నర్‌తో బౌలింగ్ ప్రారంభించడం వంటి ఆయన వ్యూహాలు అప్పట్లో సంచలనం సృష్టించాయి.

క్యాన్సర్‌తో పోరాడి చివరి శ్వాస వరకు క్రికెట్‌పై తన ప్రేమను చాటుకున్న మార్టిన్ క్రో, ఈ క్రీడకు ఎంతో సేవ చేశారు. ఎన్ని ఘనతలు సాధించినా, క్రికెట్ అభిమానుల మదిలో ఆయన పేరు చెప్పగానే ముందుగా గుర్తొచ్చేది ఆ 299 పరుగుల దురదృష్టకర ఇన్నింగ్సే. అది ఆయన గొప్పతనాన్ని తగ్గించకపోయినా, ఆయనను ఓ విషాద నాయకుడిగా చరిత్రలో నిలబెట్టింది.