ప్లేయర్ ఆఫ్ ది సిరీస్ అవార్డ్.. కట్‌చేస్తే.. ఆ తర్వాత ఊహించని షాక్.. ఏకంగా 2 మ్యాచ్‌ల నిషేధం

Megan Schutt suspension: ఆస్ట్రేలియా మహిళల క్రికెట్ జట్టు సీనియర్ పేసర్ మేగన్ షుట్ (Megan Schutt)పై క్రికెట్ ఆస్ట్రేలియా (Cricket Australia) రెండు మ్యాచ్‌ల నిషేధం విధించింది. ప్రిస్క్రిప్షన్ మందుల వినియోగానికి సంబంధించి బోర్డు రూపొందించిన స్పోర్ట్స్ సైన్స్ అండ్ స్పోర్ట్స్ మెడిసిన్ (SSSM) మార్గదర్శకాలను పాటించకపోవడమే దీనికి కారణం. ఈ ఘటన పోటీకి వెలుపల జరిగిన ఒక్క సంఘటనగా క్రికెట్ ఆస్ట్రేలియా స్పష్టం చేసింది. ఇది పనితీరు మెరుగుపరిచే నిషేధిత పదార్థానికి సంబంధించిన కేసు కాదని కూడా తెలిపింది.

ఈ సస్పెన్షన్ కారణంగా 33 ఏళ్ల షుట్ రెండు కీలక మ్యాచ్‌లకు దూరం కానుంది. గురువారం న్యూజిలాండ్‌తో నార్త్ సిడ్నీ ఓవల్‌లో జరిగే మూడో టీ20 మ్యాచ్‌లో ఆమె ఆడలేరు. ఆస్ట్రేలియా ఇప్పటికే తొలి రెండు మ్యాచ్‌ల్లో విజయం సాధించి సిరీస్‌లో 2-0 ఆధిక్యంలో ఉంది.

అంతేకాదు, మహిళల బిగ్ బాష్ లీగ్ (WBBL)లో అడిలైడ్ స్ట్రైకర్స్ తరఫున కూడా షుట్ తొలి మ్యాచ్‌కు అందుబాటులో ఉండదు. అక్టోబర్ 31న మెల్‌బోర్న్ స్టార్స్‌తో జరిగే సీజన్ ఓపెనర్‌ను ఆమె మిస్ కానుంది. ఈ రెండు మ్యాచ్‌ల నిషేధం అంతర్జాతీయ, దేశవాళీ క్రికెట్‌కు వర్తిస్తుందని క్రికెట్ ఆస్ట్రేలియా పేర్కొంది.

ఈ నిర్ణయాన్ని షుట్ అంగీకరించింది. నిబంధనలకు అనుగుణంగా వ్యవహరించడంలో విఫలమైనందుకు ఆమె క్షమాపణలు తెలిపింది. ఆటగాళ్లకు స్పోర్ట్స్ సైన్స్ అండ్ స్పోర్ట్స్ మెడిసిన్ మార్గదర్శకాలపై క్రమం తప్పకుండా అవగాహన కల్పిస్తున్నారని, వాటిని పాటించడం తన బాధ్యత అని ఆమె పేర్కొంది.

ఇటీవల బంగ్లాదేశ్‌తో జరిగిన వన్డే సిరీస్‌లో షుట్ అద్భుత ప్రదర్శన చేసింది. మూడు మ్యాచ్‌ల్లో 10 వికెట్లు పడగొట్టి ‘ప్లేయర్ ఆఫ్ ది సిరీస్’ అవార్డును సొంతం చేసుకుంది. అలాంటి ఫామ్‌లో ఉన్న సమయంలో వచ్చిన ఈ రెండు మ్యాచ్‌ల సస్పెన్షన్ ఆమెకు కీలక దశలో ఎదురైన అనూహ్య విరామంగా మారింది.

క్రికెట్ ఆస్ట్రేలియా కూడా షుట్‌కు అవసరమైన మద్దతు కొనసాగిస్తామని తెలిపింది. అదే సమయంలో దేశానికి ప్రాతినిధ్యం వహించే ప్రతి ఆటగాడు వైద్య మార్గదర్శకాలు, బాధ్యతలకు అనుగుణంగా వ్యవహరించాల్సిన అవసరాన్ని స్పష్టం చేసింది.