ఈ ఒక్క మ్యాచ్ వదిలేయ్..వరుణదేవా!

ప్రతి నాలుగేళ్లకొకసారి వచ్చే వరల్డ్ కప్ కోసం సగటు క్రికెట్ అభిమాని ఎంతగానో ఎదురుచూస్తుంటాడు. అందునా భారత్-పాక్ మ్యాచ్ అంటే ఆ కిక్ వేరు. ప్రతి కంట్రీలోనూ క్రికెట్‌ను ఇష్టపడేవాళ్లు ఈ మ్యాచ్‌పై స్పెషల్ ఇంట్రస్ట్ చూపిస్తూ ఉంటారు. మరీ పిచ్చి ఉన్నవాళ్లు లైవ్ మ్యాచ్ చూడటం కోసం ఎంత ఖర్చు పెట్టైనా టికెట్లు కొంటారు. మరికొందరూ ఇంపార్టెంట్ పనులు కూడా వాయిదా వేసుకొని టీవీలకు అతుక్కుపోతారు. ఏది ఏమైనా భారత్-పాక్ మ్యాచ్ అంటే ఓ మినీ యుద్దమే.

తాజాగా వరల్డ్ కప్ 2019లో భాగంగా ఈరోజు ఈ రెండు జట్లు తలపడనున్నాయి. మరికొద్ది గంటల్లోనే క్రికెట్‌ ప్రపంచమంతా కళ్లప్పగించి చూస్తున్న మహా సంగ్రామం ప్రారంభం కానుంది. గత కొన్ని నెలల్లో ఇరు దేశాల మధ్య తలెత్తిన ఉద్రిక్తతల నేపథ్యంలో ఈ మ్యాచ్‌లో గెలుపు ఇరు దేశాల అభిమానులకూ ప్రతిష్టాత్మకంగా మారింది. పాక్‌ ఎంతో దూకుడుగా ఉన్న రోజుల్లోనూ ప్రపంచకప్‌లో ఆ జట్టుకు తలవంచని భారత్‌‌కు.. ప్రస్తుత పాక్‌ టీంతో పోలిస్తే భారత్‌కు విజయవకాశాలు మెండుగా ఉన్నాయి. ఈ మ్యాచ్‌ ఓడితే పాక్‌ సెమీస్‌ అవకాశాలు కష్టంగా మారుతాయి. కాబట్టి ఆ జట్టు అంత తేలిగ్గా మ్యాచ్‌ను వదిలే అవకాశం లేదు. మరోవైపు ఈ మ్యాచ్‌కు అన్నింటికి పెద్ద గండం వరుణుడు. వర్షం ఎఫెక్ట్ వల్ల ఓవర్లను కుదించే అవకాశాలు కూడా ఉన్నాయని స్పోర్ట్స్ ఎనలిస్టులు అభిప్రాయ పడుతున్నారు.

ఈ ప్రపంచకప్‌లో ఇప్పటికే ఏకంగా నాలుగు మ్యాచ్‌లు వర్షార్పణం అయ్యాయి. దీంతో క్రికెట్ అభిమానులకు తీవ్ర అసహనం వ్యక్తం చేస్తున్నారు. మాంచెస్టర్‌లో జరిగే ఈ మ్యాచ్‌కు కూడా వర్షం ముప్పు ఉందని వాతావరణ శాఖ చెప్తున్న వార్తలు ఆందోళన రేకెత్తిస్తున్నాయి. ప్రపంచకప్‌కే ఆకర్షణ అయిన ఈ మ్యాచ్‌ కూడా రద్దయితే టోర్నీ కళ తప్పడం ఖాయం. అందుకే ఈ మ్యాచ్‌ జరగాలని ఐసీసీ సైతం ఎంతగానో కోరుకుంటోంది. ఈ మ్యాచ్ జరగకపోతే.. ఐసీసీకి భారీ నష్టం కూడా వచ్చే అవకాశాలున్నాయి. మరోవైపు క్రికెట్ అభిమానులు సైతం వరుణుడికి పూజలు చేస్తున్నారు. ఈ ఒక్క మ్యాచ్‌ను వదిలేయవా వరుణదేవుడా! అంటూ ప్రార్థిస్తున్నారు. ఇదే సమయంలో వరల్డ్ కప్ షెడ్యూల్‌ను నిర్ణయించిన ఐసీసీని శాపనార్థాలు పెడుతున్నారు.