Jalaj Saxena : 500 వికెట్లు కొట్టేశాడు..7000 పరుగులు బాదేశాడు..39 ఏళ్ల వయసులోనూ నీ పవర్ తగ్గలేదు బాసూ

Jalaj Saxena : భారత దేశవాళీ క్రికెట్‌లో జలజ్ సక్సేనా పేరు వినబడని రికార్డు లేదు. తాజాగా రంజీ ట్రోఫీ 2026 సీజన్‌లో గోవాతో జరిగిన మ్యాచ్‌లో జలజ్ సక్సేనా సరికొత్త చరిత్ర సృష్టించారు. మహారాష్ట్ర జట్టుకు ప్రాతినిధ్యం వహిస్తున్న ఆయన, గోవా తొలి ఇన్నింగ్స్‌లో 6 వికెట్లు పడగొట్టి ప్రత్యర్థిని 209 పరుగులకే కట్టడి చేశారు. ఈ క్రమంలో దర్శన్ మిసల్ వికెట్ తీయడం ద్వారా ఫస్ట్ క్లాస్ క్రికెట్‌లో తన 500వ వికెట్‌ను పూర్తి చేసుకున్నారు. 34 ఓవర్లు వేసి 79 పరుగులిచ్చిన జలజ్, గోవా కెప్టెన్ స్నేహల్ కౌంత్కర్(73) సహా ఆరుగురు కీలక ఆటగాళ్లను పెవిలియన్‌కు పంపారు.

మధ్యప్రదేశ్‌లోని ఇండోర్‌లో 1986లో జన్మించిన జలజ్ సక్సేనా, 2005లో తన ఫస్ట్ క్లాస్ కెరీర్‌ను ప్రారంభించారు. గత రెండు దశాబ్దాలుగా నిలకడైన ప్రదర్శన ఇస్తున్నప్పటికీ, దురదృష్టవశాత్తూ ఆయనకు భారత జాతీయ జట్టులో ఎప్పుడూ చోటు దక్కలేదు. ఇప్పటివరకు 156 ఫస్ట్ క్లాస్ మ్యాచ్‌లు ఆడిన జలజ్, ఏకంగా 502 వికెట్లు తీశారు. ఇందులో ఒక ఇన్నింగ్స్‌లో 5 వికెట్లు 34 సార్లు, మ్యాచ్‌లో 10 వికెట్లు 10 సార్లు తీయడం విశేషం. కేవలం బంతితోనే కాదు, బ్యాట్‌తోనూ ఆయన అద్భుతాలు చేశారు. 236 ఇన్నింగ్స్‌ల్లో 7202 పరుగులు సాధించారు, ఇందులో 14 సెంచరీలు, 35 అర్ధ సెంచరీలు ఉన్నాయి.

పరిమిత ఓవర్ల క్రికెట్‌లోనూ జలజ్ తన ముద్ర వేశారు. 110 లిస్ట్-ఏ మ్యాచ్‌ల్లో 2080 పరుగులు చేయడంతో పాటు 123 వికెట్లు తీశారు. టీ20 ఫార్మాట్‌లో 79 మ్యాచ్‌లు ఆడి 86 వికెట్లు పడగొట్టారు. ఐపీఎల్‌లో 2021లో పంజాబ్ కింగ్స్ తరఫున అరంగేట్రం చేసినప్పటికీ, అక్కడ ఆయనకు పెద్దగా అవకాశాలు దక్కలేదు. అంతకుముందు ముంబై ఇండియన్స్ టీమ్‌లో కూడా ఆయన సభ్యుడిగా ఉన్నారు. డొమెస్టిక్ క్రికెట్‌లో అత్యుత్తమ ఆల్‌రౌండర్లలో ఒకరిగా ఉన్న జలజ్, ఈ వయసులోనూ యువకులతో పోటీపడుతూ ఫిట్‌నెస్‌ను కాపాడుకోవడం గమనార్హం.

ఒక దేశవాళీ క్రికెటర్ 500 వికెట్లు, 7000 పరుగులు సాధించడం అంటే అది సామాన్యమైన విషయం కాదు. భారత క్రికెట్ చరిత్రలో ఇలాంటి ఘనత సాధించిన అతికొద్ది మందిలో జలజ్ ఒకరు. గోవాతో జరిగిన మ్యాచ్‌లో ఓపెనర్ సుయశ్ ప్రభుదేసాయి వికెట్‌తో మొదలుపెట్టిన జలజ్, చివరకు గోవా బ్యాటింగ్ ఆర్డర్‌ను ఛిన్నాభిన్నం చేశారు. టీమిండియా సెలక్టర్ల దృష్టిలో పడకపోయినా, తన అంకితభావంతో రికార్డుల మీద రికార్డులు సృష్టిస్తూనే ఉన్నారు. ఆయన సాధించిన ఈ మైలురాయి చూసి మాజీ క్రికెటర్లు, నెటిజన్లు ప్రశంసల వర్షం కురిపిస్తున్నారు.

మరిన్ని క్రికెట్ వార్తల కోసం ఇక్కడ చూడండి..