IPL 2026 KKR vs LSG : ఈడెన్ గార్డెన్స్‌లో పావెల్ విధ్వంసం.. లక్నో ముందు 182 పరుగుల లక్ష్యం

IPL 2026 KKR vs LSG : ఐపీఎల్ 2026 సీజన్‌లో భాగంగా నేడు ఈడెన్ గార్డెన్స్‌లో జరిగిన 15వ పోరులో కోల్‌కతా నైట్ రైడర్స్ (KKR), లక్నో సూపర్ జెయింట్స్ (LSG) జట్లు హోరాహోరీగా తలపడ్డాయి. టాస్ గెలిచిన లక్నో బౌలింగ్ ఎంచుకోగా, నిర్ణీత 20 ఓవర్లలో కోల్‌కతా 4 వికెట్ల నష్టానికి 181 పరుగులు చేసింది. మొదటి గెలుపు కోసం తహతహలాడుతున్న కేకేఆర్ బ్యాటర్లు ఆరంభంలో తడబడినా, చివర్లో రోవ్‌మన్ పావెల్ విధ్వంసంతో గౌరవప్రదమైన స్కోరు సాధించారు.

ఆరంభంలోనే షాక్

కోల్‌కతా నైట్ రైడర్స్ ఇన్నింగ్స్ ఆరంభం అంత ఆశాజనకంగా సాగలేదు. ఓపెనర్ ఫిన్ అలెన్ (9) కేవలం రెండో ఓవర్లోనే ప్రిన్స్ యాదవ్ బౌలింగ్‌లో వెనుదిరిగాడు. అయితే, ఈ వికెట్ విషయంలో ఒక వివాదం తలెత్తింది. క్యాచ్ పట్టిన దిగ్వేశ్ రాఠీ కాలు బౌండరీ లైన్‌ను తాకినట్లు రీప్లేలో కనిపించినా, థర్డ్ అంపైర్ దానిని సరిగా చెక్ చేయకుండానే అవుట్ ఇవ్వడం చర్చనీయాంశమైంది.

రహానే-రఘువంశీ పోరాటం

ఒక వికెట్ పడ్డా కెప్టెన్ అజింక్య రహానే తన క్లాస్ బ్యాటింగ్‌తో జట్టును ఆదుకున్నాడు. 24 బంతుల్లో 41 పరుగులు చేసిన రహానే, యువ ప్లేయర్ రఘువంశీతో కలిసి ఇన్నింగ్స్‌ను చక్కదిద్దాడు. రఘువంశీ 33 బంతుల్లో 45 పరుగులు చేసి హాఫ్ సెంచరీకి చేరువలో సిద్ధార్థ్ బౌలింగ్‌లో అవుట్ అయ్యాడు. రహానే కూడా దిగ్వేశ్ రాఠీ బౌలింగ్‌లో షమీకి క్యాచ్ ఇచ్చి పెవిలియన్ చేరాడు. దీంతో కేకేఆర్ ఒక దశలో స్కోరు వేగం తగ్గింది.

పావెల్ వీరవిహారం

అభిమానులు ఎంతో ఆశగా ఎదురుచూసిన రింకూ సింగ్ (4) ఈ మ్యాచ్‌లో విఫలమయ్యాడు. ఆవేష్ ఖాన్ వేసిన అద్భుతమైన బంతికి రింకూ క్లీన్ బౌల్డ్ కావడంతో కేకేఆర్ కష్టాల్లో పడింది. అయితే, ఈ దశలో క్రీజులోకి వచ్చిన రోవ్‌మన్ పావెల్ లక్నో బౌలర్లపై విరుచుకుపడ్డాడు. కేవలం 17 బంతుల్లోనే 32 పరుగులు చేసిన పావెల్, 17వ ఓవర్లో ప్రిన్స్ యాదవ్ బౌలింగ్‌లో ఒక సిక్స్, ఒక ఫోర్‌తో 17 పరుగులు రాబట్టాడు. అతనికి జతగా కామెరూన్ గ్రీన్ (19) సహకరించడంతో కేకేఆర్ స్కోరు 180 మార్కును దాటింది.

అబ్బుర పరిచిన లక్నో బౌలర్లు

లక్నో బౌలర్లలో అవేశ్ ఖాన్ ఒక వికెట్ తీసి చాలా పొదుపుగా బౌలింగ్ చేశాడు. ప్రిన్స్ యాదవ్, సిద్ధార్థ్, దిగ్వేశ్ రాఠీ చెరో వికెట్ పడగొట్టారు. మహమ్మద్ షమీ వికెట్లు తీయలేకపోయినా, పరుగులను నియంత్రించడంలో కీలకంగా వ్యవహరించాడు. 182 పరుగుల లక్ష్యంతో బరిలోకి దిగుతున్న లక్నో సూపర్ జెయింట్స్ ఈ ఛేజింగ్‌ను ఎలా పూర్తి చేస్తుందో చూడాలి.

మరిన్ని క్రీడా వార్తల కోసం ఇక్కడ క్లిక్ చేయండి..