IPL 2025: లక్నోతో మ్యాచ్‌లో గుజరాత్ స్పెషల్ లావెండర్ జెర్సీ! కారణం ఏంటో తెలుసా?

Gujarat Titans Lavender Jersey

గుజరాత్ టైటాన్స్ మే 22న నరేంద్ర మోడీ స్టేడియంలో లక్నో సూపర్ జెయింట్స్‌తో జరిగే మ్యాచ్‌లో ఒక ప్రత్యేక లావెండర్ జెర్సీని ధరించనున్నారు. ఇది కేవలం ఒక స్టైల్ స్టేట్మెంట్ మాత్రమే కాదు, ఒక సామాజిక సందేశాన్ని పంచుకునే ప్రయత్నం. క్యాన్సర్‌పై విజయం సాధించిన పౌరులకు గౌరవంగా, అలాగే క్యాన్సర్‌పై అవగాహన పెంచే ఉద్దేశంతో గుజరాత్ టైటాన్స్ ఈ లావెండర్ జెర్సీని ధరించనున్నారు. “బలం అనేది ఆటలో మాత్రమే కాదు, ఒక లక్ష్యం కోసం నిలబడటం కూడా అంతే” అనే సందేశంతో GT తమ ట్విట్టర్ హ్యాండిల్‌లో ఈ విషయాన్ని అభిమానులకు తెలియజేశారు.

ఇది గుజరాత్ టైటాన్స్ తరపున లావెండర్ జెర్సీ ధరించడం వరుసగా మూడో సంవత్సరం కావడం గమనార్హం. 2023లో హార్దిక్ పాండ్యా నేతృత్వంలోని జట్టు తొలిసారిగా ఈ ట్రెండ్‌ను ప్రారంభించింది. ఆ సమయంలో నరేంద్ర మోడీ స్టేడియంలో సన్‌రైజర్స్ హైదరాబాద్‌తో జరిగిన మ్యాచ్‌లో గుజరాత్ లావెండర్ జెర్సీతో మైదానంలో అడుగుపెట్టింది. ఈ జెర్సీ క్యాన్సర్‌పై పోరాడుతున్న వారికి సంఘీభావంగా, అలాగే జీవితం పట్ల ఆశావహ దృక్పథాన్ని ప్రదర్శించే సంకేతంగా నిలిచింది.

అయితే ఐపీఎల్ చరిత్రలో లావెండర్ జెర్సీ ధరించిన మొదటి జట్టు గుజరాత్ టైటాన్స్ కాదు. 2015లో ఢిల్లీ క్యాపిటల్స్ (అప్పుడు ఢిల్లీ డేర్‌డెవిల్స్) ఈ ఆదర్శాన్ని ఆచరించి, క్యాన్సర్‌పై పోరాటం చేస్తున్న వంద మంది బాధితులను ఆ మ్యాచ్‌కు ఆహ్వానించి, లావెండర్ దుస్తులు ధరించి వారికి గౌరవంగా నివాళులర్పించింది. అప్పటి నుంచి ఐపీఎల్‌లో కొన్ని జట్లు తమ సామాజిక బాధ్యతలతో ముందడుగు వేస్తూ ప్రత్యేక జెర్సీలను దుస్తులుగా మార్చాయి.

ఇందుకు తాజా ఉదాహరణ RCB కూడా. 2025 ఐపీఎల్‌లో వారు ఆకుపచ్చ జెర్సీతో క్రీడాస్థలానికి వచ్చారు, ఇది పర్యావరణ పరిరక్షణ, ఆకుపచ్చ ప్రపంచం కోసం వారి చొరవకు ప్రతీకగా నిలిచింది. ఈ విధంగా, ఐపీఎల్ వేదికపై క్రికెట్ మాత్రమే కాకుండా, సామాజిక మౌలిక విలువలను పంచుకునే ప్రయత్నాలు కొనసాగుతుండటం ప్రశంసనీయమైన విషయం. గుజరాత్ టైటాన్స్ తమ లావెండర్ జెర్సీ ద్వారా ఆ ప్రయత్నానికి మరో అర్థవంతమైన అధ్యాయాన్ని జోడించారు.

మరిన్ని క్రికెట్ వార్తల కోసం ఇక్కడ క్లిక్ చేయండి..