Asia Cup 2025 Prize Money: భారీగా పెరిగిన ఆసియా కప్‌ ప్రైజ్ మనీ.. ఓడిన జట్టుపైనా కాసుల వర్షమే..?

Asia Cup 2025

Asia Cup 2025 Prize Money: ఆసియా కప్ 2025 మంగళవారం (సెప్టెంబర్ 9) నుంచి ప్రారంభమవుతుంది. మొదటి మ్యాచ్ ఆఫ్ఘనిస్తాన్ వర్సెస్ హాంకాంగ్ మధ్య జరుగుతుంది. సెప్టెంబర్ 10న, దుబాయ్ ఇంటర్నేషనల్ క్రికెట్ స్టేడియంలో భారత జట్టు యూఏఈతో తన మ్యాచ్‌లను ప్రారంభిస్తుంది. ఈ టోర్నమెంట్ సెప్టెంబర్ 28 వరకు కొనసాగుతుంది.

ప్రత్యేకత ఏమిటంటే ఈసారి భారత్, పాకిస్తాన్ మూడుసార్లు తలపడే అవకాశం ఉంది. ఈసారి ఆసియా కప్ టీ20 ఫార్మాట్‌లో జరగనుంది. ఇది వచ్చే ఏడాది భారత్, శ్రీలంకలో జరగనున్న ఐసీసీ టీ20 ప్రపంచ కప్ (ICC T20I World Cup 2026) సన్నాహానికి చాలా కీలకమైనదిగా పరిగణిస్తున్నారు.

నివేదికల ప్రకారం, 2025 సీజన్‌కు ప్రైజ్ మనీని కూడా పెంచారు. నివేదికల ప్రకారం, ఛాంపియన్ జట్టుకు దాదాపు రూ. 2.6 కోట్లు (సుమారు 300,000 US డాలర్లు), రన్నరప్ జట్టుకు దాదాపు రూ. 1.3 కోట్లు (150,000 US డాలర్లు) ఇవ్వనున్నారు. ఆసియా క్రికెట్ కౌన్సిల్ (ACC) నుంచి అధికారిక ధృవీకరణ ఇంకా రాలేదు. ఇది ధృవీకరించబడితే, గత ఆసియా కప్ కంటే ఇది భారీ పెరుగుదల అవుతుంది.

ఈసారి ఆసియా కప్ ట్రోఫీని గెలుచుకోవడానికి 8 జట్లు ఒకదానితో ఒకటి పోటీ పడనున్నాయి. భారత్, పాకిస్తాన్, శ్రీలంక, బంగ్లాదేశ్, ఆఫ్ఘనిస్తాన్ నేరుగా ఈ టోర్నమెంట్‌లో చోటు దక్కించుకున్నాయి. దీంతో పాటు, అసోసియేట్ దేశాల కోసం ACC ప్రీమియర్ కప్‌లో టాప్ 3 జట్లలో ఉన్న యూఏఈ, ఒమన్ , హాంకాంగ్ కూడా ఈ టోర్నమెంట్‌లో చోటు దక్కించుకున్నాయి.

ఆసియా కప్ గత ఛాంపియన్‌గా భారత జట్టు బరిలోకి దిగనుంది. ఇప్పటివరకు రికార్డు స్థాయిలో ఎనిమిది సార్లు ఆసియా కప్ గెలుచుకుంది. సూర్యకుమార్ యాదవ్ నాయకత్వంలో, విరాట్ కోహ్లీ, రోహిత్ శర్మ వంటి పెద్ద ఆటగాళ్ళు జట్టులో లేకపోయినా, ఈసారి కూడా తన బలాన్ని ప్రదర్శించడానికి భారత జట్టు ప్రయత్నిస్తుంది. సెప్టెంబర్ 10న యూఏఈతో భారత్ తన తొలి మ్యాచ్ ఆడనుంది . ఆ తర్వాత, సెప్టెంబర్ 14న దుబాయ్‌లో పాకిస్తాన్‌తో కీలక మ్యాచ్ జరుగుతుంది. దీనిని ప్రపంచం మొత్తం ఎంతో ఆసక్తిగా వీక్షిస్తుంది. గ్రూప్ దశలో చివరి మ్యాచ్‌ను అబుదాబిలోని షేక్ జాయెద్ స్టేడియంలో ఒమన్‌తో భారత్ ఆడనుంది.