World Record : 62 ఫోర్లు, 10 సిక్సర్లు..ఒక్కడే 501 పరుగులు…క్రికెట్ చరిత్రలో ఎవరికీ సాధ్యం కాని రికార్డ్

World Record : క్రికెట్ చరిత్రలో కొన్ని రికార్డులు వినడానికి అసాధ్యంగా అనిపిస్తాయి. కానీ ఒక బ్యాటర్ మైదానంలో దిగితే స్కోరు బోర్డు కూడా అలసిపోవాల్సిందే అని నిరూపించాడు వెస్టిండీస్ దిగ్గజం బ్రియాన్ లారా. సరిగ్గా 30 ఏళ్ల క్రితం ఆయన ఆడిన ఒక ఇన్నింగ్స్ ఇప్పటికీ క్రికెట్ ప్రపంచంలో ఒక అంతుచిక్కని అద్భుతంగా మిగిలిపోయింది. ఒక్కడే ఏకంగా 501 పరుగులు చేసి, బ్యాటింగ్‌కు కొత్త అర్థాన్ని నేర్పిన ఆ చారిత్రాత్మక ఘట్టం గురించి ఇప్పుడు తెలుసుకుందాం.

అది 1994వ సంవత్సరం. ఇంగ్లాండ్‌లో కౌంటీ క్రికెట్ మ్యాచ్ జరుగుతోంది. డర్హమ్, వార్విక్‌షైర్ జట్ల మధ్య పోరు మొదలైంది. మొదట బ్యాటింగ్ చేసిన డర్హమ్ జట్టు 8 వికెట్లకు 556 పరుగుల భారీ స్కోరు వద్ద ఇన్నింగ్స్ డిక్లేర్ చేసింది. జాన్ మోరిస్ డబుల్ సెంచరీతో చెలరేగడంతో డర్హమ్ గెలుపు నల్లేరు మీద నడకే అనుకున్నారు. కానీ, వార్విక్‌షైర్ తరపున మూడో నంబర్‌లో బ్యాటింగ్‌కు వచ్చిన బ్రియాన్ లారా మనసులో వేరే ప్లాన్ ఉంది. కేవలం 8 పరుగులకే జట్టు మొదటి వికెట్ కోల్పోయిన సమయంలో క్రీజులోకి వచ్చిన లారా, ఆ తర్వాత ఒక సునామీలా మారిపోయారు.

లారా బ్యాటింగ్ మొదలుపెట్టాక బంతి ఎప్పుడూ బౌండరీ లైన్ అవతలే కనిపించేది. డర్హమ్ బౌలర్లు ఎన్ని రకాలుగా ప్రయత్నించినా లారాను ఆపడం ఎవరి తరము కాలేదు. కేవలం 427 బంతుల్లోనే లారా అజేయంగా 501 పరుగులు సాధించారు. ఈ ఇన్నింగ్స్‌లో 62 ఫోర్లు, 10 సిక్సర్లు ఉన్నాయి. అంటే కేవలం బౌండరీల రూపంలోనే ఆయన 300 పైచిలుకు పరుగులు రాబట్టారు. డర్హమ్ టీమ్ మొత్తం కొట్టిన బౌండరీల కంటే, లారా ఒక్కడే ఎక్కువ బౌండరీలతో విరుచుకుపడ్డారు. ఫస్ట్ క్లాస్ క్రికెట్ చరిత్రలో ఒక బ్యాటర్ 500 పరుగుల మార్కును దాటడం ఇదే మొదటిసారి మరియు చివరిసారి కూడా.

లారా ఈ 501 పరుగుల ఇన్నింగ్స్ ఆడకముందు, పాకిస్థాన్ లెజెండ్ హనీఫ్ మొహమ్మద్ చేసిన 499 పరుగులే ప్రపంచ రికార్డుగా ఉండేది. కేవలం ఒక్క పరుగు తేడాతో హనీఫ్ 500 మార్కును మిస్ చేసుకోగా, లారా మాత్రం ఆ మైలురాయిని దాటి సరికొత్త చరిత్ర సృష్టించారు. లారా ఆడిన ఈ ఇన్నింగ్స్ టెక్నిక్, ఏకాగ్రత, శారీరక దృఢత్వానికి నిదర్శనంగా నిలుస్తుంది. టెస్ట్ క్రికెట్‌లో కూడా అత్యధిక వ్యక్తిగత స్కోరు (400 నాటౌట్) సాధించిన రికార్డు కూడా నేటికీ లారా పేరు మీదనే పదిలంగా ఉంది.

క్రికెట్ ప్రపంచంలో ఎప్పుడూ ఒక చర్చ జరుగుతూనే ఉంటుంది.. సచిన్ గొప్పా లేక లారా గొప్పా అని? సచిన్ టెండూల్కర్ తన నిలకడ, సెంచరీల సంఖ్యతో దేవుడిగా పేరు తెచ్చుకుంటే, లారా మాత్రం ఇలాంటి అసాధారణమైన భారీ ఇన్నింగ్స్‌లతో క్రికెట్ ప్రిన్స్ అనిపించుకున్నారు. ఇంగ్లాండ్‌పై 400 పరుగులు చేసినా, కౌంటీల్లో 501 పరుగులు చేసినా అది లారాకే సాధ్యం. 30 ఏళ్లు గడిచినా, టీ20ల యుగంలో కూడా ఈ 501 పరుగుల రికార్డు చెక్కుచెదరకుండా ఉందంటే అది లారా సృష్టించిన ప్రభంజనం ఎలాంటిదో అర్థం చేసుకోవచ్చు.

మరిన్ని క్రికెట్ వార్తల కోసం ఇక్కడ చూడండి