T20 World Cup: ఇషాన్, నిస్సంక ఎవర్రా.. టీ20 ప్రపంచకప్ 2026లోనే తోపు ఈ ఓపెనర్.. అన్ని మ్యాచ్‌ల్లో నాటౌటే..!

Brian Bennett 175 Not Out: ఇషాన్ కిషన్, సాహిబ్‌జాదా ఫర్హాన్, పథుమ్ నిస్సాంక లాంటి స్టార్ బ్యాట్స్‌మెన్లు హాట్ టాపిక్ గా మారిన సమయంలో, ఓ ఓపెనర్ మాత్రం నిశ్శబ్దంగా అరుదైన ఘనత సాధించాడు. టీ20 వరల్డ్ కప్ 2026లో జింబాబ్వే అద్భుత ప్రయాణానికి కేంద్రబిందువుగా నిలిచిన ఓపెనర్ బ్రియన్ బెన్నెట్, ఇప్పటివరకు ఒక్కసారి కూడా ఔటవకుండా రికార్డు సృష్టిస్తున్నాడు.

ప్రపంచంలోని అత్యుత్తమ టీ20 బ్యాటర్లు ఆడుతున్న ఈ టోర్నమెంట్‌లో బెన్నెట్ గ్రూప్ దశలో ఆరో అత్యధిక పరుగులు చేసిన బ్యాటర్‌గా నిలవడమే కాకుండా, ఇప్పటివరకు ఔటవ్వకపోవడం విశేషం. మూడు ఇన్నింగ్స్‌లలో బెన్నెట్ 175 పరుగులు సాధించాడు. ఆస్ట్రేలియా, శ్రీలంకపై జింబాబ్వే సాధించిన విజయాల్లో అతడు కీలక అజేయ అర్ధశతకాలతో జట్టును గెలిపించాడు.

ప్రస్తుత టీ20 వరల్డ్ కప్‌లో 100కి పైగా పరుగులు చేసి కూడా ఒక్కసారి కూడా ఔటవ్వని ఏకైక బ్యాటర్ బెన్నెట్ మాత్రమే. మరింత ఆసక్తికరమైన విషయం ఏమిటంటే, అతడు ఈ 175 పరుగులను ఒక్క సిక్సు కూడా కొట్టకుండా సాధించాడు.

దక్షిణాఫ్రికా వెటరన్ డేవిడ్ మిల్లర్ కూడా ఇప్పటివరకు ఔటవ్వలేదు. అయితే అతడు మూడు మ్యాచ్‌ల్లో 83 పరుగులే చేశాడు (హయ్యెస్ట్ స్కోర్ 39). ఈ నేపథ్యంలో బెన్నెట్ ఘనత మరింత ప్రత్యేకంగా నిలుస్తోంది.

భారత్‌కు చెందిన ఇషాన్ కిషన్, పాకిస్థాన్‌కు చెందిన సాహిబ్‌జాదా ఫర్హాన్, శ్రీలంకకు చెందిన పథుమ్ నిస్సాంక తమ భారీ ఇన్నింగ్స్‌లతో వార్తల్లో నిలుస్తుండగా, బెన్నెట్ మాత్రం నిశ్శబ్దంగా పరుగులు సాధిస్తూ జింబాబ్వే సూపర్–8 దశకు అజేయంగా చేరడంలో కీలక పాత్ర పోషించాడు.

ఐర్లాండ్‌పై 48తో టోర్నమెంట్‌ను ప్రారంభించిన బెన్నెట్, 13.3 ఓవర్లలోనే మ్యాచ్ ముగించడంలో జట్టుకు దోహదం చేశాడు. ఆపై ఆస్ట్రేలియాపై 56 బంతుల్లో 64 చేసి జింబాబ్వేకు చారిత్రక విజయాన్ని అందించాడు. ఐర్లాండ్‌తో మరో మ్యాచ్ వర్షం కారణంగా రద్దయినా, సహ–ఆతిథ్య శ్రీలంకపై 48 బంతుల్లో 63*తో 179 పరుగుల కఠిన లక్ష్యాన్ని ఛేదించడంలో కీలకంగా నిలిచాడు.

క్రీజ్ ఒక చివర స్థిరంగా నిలబడుతూ బెన్నెట్ చూపిస్తున్న పోరాటంతో జింబాబ్వే మిగతా బ్యాటర్లు స్వేచ్ఛగా ఆడగలుగుతున్నారు. ఓపెనింగ్ పార్ట్నర్ టాడివానాషే మారుమాని ఈ వరల్డ్ కప్‌లో 155 స్ట్రైక్‌రేట్‌తో రాణిస్తున్నాడు. కెప్టెన్ సికందర్ రజా కూడా దాదాపు 183 స్ట్రైక్‌రేట్‌తో కీలక కేమియో ఇన్నింగ్స్‌లు ఆడుతున్నాడు.