మంగళవారం ఏం చేయాలి? ఏం చేయకూడదో తెలుసా..? ఇలా చేస్తే సిరిసంపదలు ఖాయం!

హిందూ మతంలో వారంలోని ప్రతి రోజుకు ఒక ప్రత్యేక ప్రాధాన్యత ఉంది. ఇక, మంగళవారం అనేది జ్యోతిష్య శాస్త్రంలో కుజ గ్రహంతో అనుసంధానించబడిన ఒక ముఖ్యమైన రోజు. కుజుడు ధరిత్రీ పుత్రుడుగా పరిగణించబడతాడు. భూమిపై నివసించే ప్రతి ఒక్కరిపై కుజుని ప్రభావం అధికంగా ఉంటుందని విశ్వసిస్తారు. కుజుడు ప్రమాదాలకు, కలహాలకు, నష్టాలకు కారకుడిగా చెప్పబడతాడు. అందుకనే, సాధారణంగా కుజగ్రహ ప్రభావం ఉండే మంగళవారం నాడు ఎలాంటి శుభకార్యాలను ప్రారంభించరు. ఈ రోజున కొన్ని పనులను నివారించడం, మరికొన్నింటిని ఆచరించడం ద్వారా ప్రతికూల ప్రభావాలను తగ్గించుకోవచ్చని ధర్మశాస్త్రాలు సూచిస్తున్నాయి.

మంగళవారం నాడు చేయకూడని పనులు:

ఈ రోజున గోళ్లు కత్తిరించడం, క్షవరం చేయించుకోవడం వంటి పనులు నిషిద్ధం. మంగళవారం అప్పు ఇస్తే, ఆ డబ్బు తిరిగి రావడం చాలా కష్టం అవుతుందని నమ్ముతారు. అదేవిధంగా, అప్పు తీసుకుంటే అది అనేక బాధలకు, అనవసరమైన ఖర్చులకు దారితీసి, అప్పు తీరకపోవచ్చనే ప్రమాదం ఉంది. కొత్త బట్టలు ధరించడం కూడా ఈ రోజున మంచిది కాదని చెబుతారు. అత్యవసరమైతే తప్ప, మంగళవారం ప్రయాణాలు పెట్టుకోకూడదు. మంగళవారం ఉపవాసం చేసేవారు రాత్రిపూట ఉప్పు వేసిన పదార్థాలను తినకూడదు. తలంటు స్నానం కూడా మంగళవారం రోజున చేయకూడదు. అయితే, దైవ కార్యాలకు, విద్య లేదా వైద్య సంబంధిత అవసరాల కోసం రుణాలు ఇవ్వడం ఎప్పుడైనా ఆమోదయోగ్యం.

మంగళవారం నాడు చేయవలసిన పనులు:

మంగళవారం ఆంజనేయస్వామిని ధ్యానించడం ద్వారా ధైర్యం చేకూరి, చేపట్టిన పనులు సులభంగా నెరవేరుతాయి. అలాగే సుబ్రహ్మణ్యస్వామిని ఆరాధించడం వల్ల కుజగ్రహ ప్రభావం వల్ల కలిగే ప్రమాదాలను నివారించవచ్చు. కాళికాదేవిని ధ్యానించడం ద్వారా శత్రువులపై విజయం కలుగుతుందని విశ్వసిస్తారు. ఈ రోజున ఎరుపు రంగు దుస్తులు ధరించడం, ఎరుపు రంగు పువ్వులతో తమ ఇష్టదైవాన్ని ప్రార్థించడం మంచి ఫలితాలను ఇస్తుంది. అయితే, జాతకంలో కుజగ్రహం వక్రదృష్టితో ఉన్నట్లయితే ఎరుపు రంగు దుస్తులను ధరించరాదని గుర్తుంచుకోవాలి.

హనుమంతుడు, సుబ్రహ్మణ్యస్వామి ఆరాధన

మంగళవారం అప్పు తీరిస్తే ఆ అప్పు తొందరగా తీరిపోతుందని చెబుతారు. మంగళవారం నాడు తమ బ్యాంకు ఖాతాలో కొంత డబ్బును జమ చేయడం వల్ల అది వృద్ధి చెందుతూ ఉంటుందని నమ్మకం. మధ్యాహ్నం 3:00 గంటల నుంచి 4:30 గంటల వరకు ఉండే రాహుకాలంలో దుర్గాదేవిని దర్శించడం, దుర్గా స్తోత్రాలను పారాయణం చేయడం వల్ల ఆధ్యాత్మిక శక్తి పెరుగుతుంది. హనుమంతుడికి సింధూరంతో పూజించటం, సుబ్రహ్మణ్యస్వామికి 11 ప్రదక్షిణలు చేయడం వల్ల దోష ప్రభావాలు తగ్గి శుభాలు కలుగుతాయి. ఈ ఆచరణల ద్వారా మంగళవారం ప్రతికూల ప్రభావాలను తగ్గించుకొని, సిరిసంపదలు, అనుకూల ఫలితాలను పొందవచ్చు.

(Disclaimer: ఈ వార్తలోని సమాచారం మత సంబంధమైన అంశాలపై ఆధారపడి ఉన్నాయి. పాఠకుల ఆసక్తి మేరకు అందించడం జరిగింది. దీనిని టీవీ9 తెలుగు ధృవీకరించదు.)