సోమవారం మారేడు ఆకులతో ఇలా చేస్తే.. అదృష్టం వెంటపడటం ఖాయం!

మారేడు చెట్టు హిందూ సంస్కృతిలో, ముఖ్యంగా శివారాధనలో అపారమైన ప్రాముఖ్యతను కలిగి ఉంది. దీని ఆకులను శివునికి ఎంతో ప్రీతికరమైనవిగా పురాణాలు చెబుతున్నాయి. మారేడు చెట్టు ఆకులతో లేదా కాయలతో శివుడిని పూజించడం వల్ల ఆర్థిక కష్టాలు, మానసిక అశాంతి వంటి ఇబ్బందులు శాశ్వతంగా తొలగిపోతాయని భక్తులు నమ్ముతారు. మారేడు చెట్టు సృష్టిలో ఒక గొప్పతనాన్ని కలిగి ఉంది. ఇది పూలు పూయకుండానే కాయలు కాస్తుంది. ఈ చెట్టును లక్ష్మీదేవి సృష్టించిందని, అందుకే దీని పండిన కాయను శ్రీ ఫలం అని పిలుస్తారని చెబుతారు. మారేడు కాయలోని గుజ్జును పూర్వం విభూతి వేసుకునేందుకు ఉపయోగించేవారు. ఆయుర్వేదంలో కూడా మారేడు ప్రధాన పాత్ర పోషిస్తుంది.

మారేడు దళం మూడుగా ఉంటుంది, అందుకే దీనిని త్రిదళం, త్రిగుణాకారం, త్రినేత్రం చ త్రియాయుధం, త్రిజన్మ పాప సంహారం, ఏకబిల్వం శివార్పణం అని స్తుతిస్తారు. పూజకు మూడు ఆకులు ఉన్న దళాలను మాత్రమే ఉపయోగిస్తారు. అరుణాచలంలో 3 లేదా 9 ఆకులు గల బహుబిల్వ దళాలు కూడా ఉంటాయి. పుష్పాలతో పూజ చేసేటప్పుడు తొడిమ లేకుండా పూజిస్తారు, కానీ మారేడు దళంతో పూజ చేసేటప్పుడు కాడను తీసివేయకుండా శివలింగంపై వేస్తారు. శాస్త్రం ప్రకారం, మారేడు దళం ఐదు లక్ష్మీ స్థానాలలో ఒకటి. మారేడు దళం ఈనె శివలింగానికి తగలడం ఐశ్వర్యప్రదం. ఐశ్వర్యం తగ్గినప్పుడు లేదా ఉద్యోగ సమస్యలు ఉన్నప్పుడు మారేడు దళాలతో శివునికి పూజ చేస్తారు.

మారేడు చెట్టు నియమాలు..

మారేడు చెట్టును ఇంట్లో పెంచుకోవచ్చు. అయితే, దళాలను కోయడానికి కొన్ని నియమాలు పాటించాలి. బుధ, శనివారాలలో మాత్రమే ఆకులను కోయాలి. అమావాస్య, పౌర్ణమి, సోమవారం, మంగళవారం, సంక్రాంతి, శివరాత్రి వంటి పండుగల రోజులలో కోయకూడదు. ఈ దళాలను ముందుగానే కోసి భద్రపరచుకోవాలి. ఒకరోజు అర్చన చేసిన దళాలను మరుసటి రోజు కడిగి తిరిగి ఉపయోగించవచ్చు.

మారేడు చెట్టుకి ప్రదక్షిణలు చేస్తే..

మారేడు చెట్టుకి ప్రదక్షిణలు చేస్తే మూడు కోట్ల మంది దేవతలకు ప్రదక్షిణ చేసినంత ఫలితం లభిస్తుంది. ఇంట్లో మారేడు చెట్టు ఉంటే, దాని కింద కూర్చొని జపం లేదా పూజ చేస్తే అపారమైన సిద్ధి కలుగుతుంది. ఒక యోగ్యుడైన వ్యక్తికి మారేడు చెట్టు కింద శుభ్రం చేసి, ఆవు పేడతో అలికి, పీట వేసి భోజనం పెడితే కోటి మందికి భోజనం పెట్టినంత ఫలితం వస్తుందని శాస్త్రంలో చెప్పబడింది.

దారిద్య్ర బాధలు తొలగిపోయి..

రోహిణి నక్షత్రం రోజున మారేడు చెట్టు కింద పూజ చేస్తే దారిద్ర్య బాధలు తొలగిపోయి, సిరిసంపదలు వృద్ధి చెందుతాయి. రోహిణి నక్షత్రం చంద్రునికి చెందినది, చంద్రుడిని ఆధిపత్యం వహించే దేవత శ్రీ మహాలక్ష్మి. కాబట్టి రోహిణి నక్షత్రం రోజు మారేడు చెట్టు వద్ద పూజ చేస్తే ఐశ్వర్యం స్థిరంగా నిలుస్తుంది.

మారేడు చెట్టు వద్ద పూజ చేసే విధానం:

చెట్టు మొదట్లో నీరు పోసి, ఆవు నెయ్యితో దీపారాధన చేసి, గంధపు అగర్‌బత్తీలను వెలిగించాలి. చెట్టు కింద కూర్చొని లక్ష్మీదేవికి సంబంధించిన అష్టోత్తరాన్ని పారాయణం చేయాలి. మూడు తమలపాకులు, రెండు తెలుపు/పచ్చి పోకల వక్కలు, రెండు అరటి పండ్లు, ఐదు రూపాయల దక్షిణతో తాంబూలం సమర్పించాలి. తమ దారిద్ర్య బాధలు తొలగిపోవాలని శివుడిని తలుచుకుంటూ సంకల్పం చెప్పుకోవాలి. ఆపై లక్ష్మీదేవికి సంబంధించిన ఏదైనా స్తోత్రాన్ని పారాయణం చేయాలి. పూజ తర్వాత, చినుగులు లేని మారేడు దళాలను రెండు లేదా మూడు ఇంటికి తెచ్చుకుని, ఒకటి బీరువాలో, మరొకటి కవర్‌లో ఉంచి జేబులో పెట్టుకుంటే డబ్బు స్థిరంగా నిలిచి ఆర్థిక ఇబ్బందులు తొలగిపోతాయని పండితులు సూచిస్తున్నారు.

(Disclaimer: ఇక్కడ అందించిన సమాచారం మతం, సాధారణ నమ్మకాల ఆధారంగా మాత్రమే అందించబడింది. ఈ సమాచారం ఖచ్చితంగా నిజం లేదా శాస్త్రీయంగా నిర్ధారితమైన సమాచారం అని భావించకండి. వ్యక్తిగత నిర్ణయాలు తీసుకునే ముందు సంబంధిత నిపుణులను సంప్రదించడం మంచిది.)