కాలానికి అధిపతి ‘సమయ్ దేవ్’.. కోరిక తీరితే గడియారం సమర్పించే అరుదైన శివాలయం ఎక్కడుందో తెలుసా?
Kanpur Samay Dev Temple: ఉత్తరప్రదేశ్లోని కాన్పూర్లో ఉన్న సమయ్ దేవ్ శివాలయం దేశంలోని అత్యంత అరుదైన శివాలయాల్లో ఒకటి. ఇక్కడ శివుడిని కాలానికి అధిపతిగా పూజిస్తూ, కోరిక నెరవేరిన తర్వాత గడియారాన్ని కానుకగా సమర్పించే విశిష్ట సంప్రదాయం ఉంది. ఈ ఆలయం వెనుక ఉన్న ఆసక్తికరమైన చరిత్ర, విశ్వాసాల గురించి తెలుసుకోండి.
Updated on: Jul 03, 2026 | 8:16 PM
దేశవ్యాప్తంగా శివునికి అంకితమైన ఎన్నో పురాతన, మహిమాన్విత ఆలయాలు ఉన్నాయి. ప్రతి ఆలయానికి ఒక ప్రత్యేక చరిత్ర, విశ్వాసం, ఆచార సంప్రదాయం ఉంటుంది. అలాంటి అరుదైన క్షేత్రాల్లో ఒకటి ఉత్తరప్రదేశ్లోని కాన్పూర్లో ఉన్న ‘సమయ్ దేవ్ శివాలయం’ (Kanpur Samay Dev Temple). ఈ ఆలయంలో శివుడిని కేవలం మహాదేవుడిగా మాత్రమే కాకుండా ‘కాలానికి అధిపతి’ అయిన “సమయ్ దేవ్”గా భక్తులు ఆరాధిస్తారు. ఇక్కడ మరో విశేషం ఏమిటంటే… శివారాధనతో పాటు గడియారాన్ని పూజించడం, కోరిక నెరవేరిన తర్వాత గడియారాన్ని కానుకగా సమర్పించడం అనే ప్రత్యేక సంప్రదాయం ఉంది.
కాలానికి అధిపతిగా శివుడు
హిందూ శాస్త్రాల ప్రకారం శివుడు కాలాన్ని నియంత్రించే మహాశక్తి. అందుకే ఆయనను మహాకాలుడు అని పిలుస్తారు. ఇదే భావనతో కాన్పూర్లోని ఈ ఆలయంలో శివుడిని “సమయ్ దేవ్”గా కొలుస్తారు. నవాబ్గంజ్ ప్రాంతంలోని ఓ పురాతన రావి చెట్టు కింద నిర్మించిన ఈ చిన్న ఆలయంలో శివలింగం ప్రతిష్ఠించబడింది. పరిమాణంలో చిన్నదైనా, ఈ ఆలయం భక్తుల విశ్వాసానికి పెద్ద కేంద్రంగా మారింది.
కోరిక నెరవేరితే గడియారం కానుక
ఈ ఆలయం ఒకేసారి పది మందికి కూడా సరిగా పట్టనంత చిన్నదిగా ఉంటుంది. అయినప్పటికీ, ప్రతి రోజూ పెద్ద సంఖ్యలో భక్తులు ఇక్కడికి చేరుకుంటారు. ముఖ్యంగా తమ కోరికలు నెరవేరాలని ప్రార్థించే వారు, కోరిక తీరిన తర్వాత కృతజ్ఞతగా గడియారాన్ని కానుకగా సమర్పించడం ఇక్కడి విశిష్ట సంప్రదాయం.
ప్రసాదంగానూ గడియారాలు..
ఇంకా ఆసక్తికరమైన విషయం ఏమిటంటే, భక్తులు సమర్పించే గడియారాల సంఖ్య ఎక్కువగా ఉండటంతో, ఆలయ నిర్వాహకులు అవసరమైన సందర్భాల్లో ఇతర భక్తులకు కూడా గడియారాలను ప్రసాదంగా అందజేస్తారని చెబుతారు. సమయ్ దేవ్ను భక్తితో ప్రార్థిస్తే జీవితంలోని ఆటంకాలు తొలగి, మంచి సమయం ప్రారంభమవుతుందని స్థానికుల నమ్మకం.
శ్రావణ మాసంలో ప్రత్యేక రద్దీ
శ్రావణ మాసంలో ఈ ఆలయానికి భక్తుల రద్దీ మరింత పెరుగుతుంది. సోమవారం రోజుల్లో ప్రత్యేక పూజలు నిర్వహిస్తారు. దూర ప్రాంతాల నుంచి కూడా భక్తులు వచ్చి శివారాధన చేసి, తమ మనోభీష్టాలు నెరవేరాలని ప్రార్థిస్తుంటారు.
ఆలయం వెనుక ఉన్న ఆసక్తికరమైన గాథ
స్థానిక కథనం ప్రకారం, కాన్పూర్కు చెందిన ఓ వ్యాపారవేత్త ఒకసారి గుజరాత్లోని సమయ్ దేవ్ ఆలయాన్ని సందర్శించాడు. అక్కడ తన వ్యాపారం విజయవంతమైతే, కాన్పూర్లో కూడా అలాంటి ఆలయాన్ని నిర్మిస్తానని మొక్కుకున్నాడు. అనంతరం ఆయన ఆశించిన విజయం సాధించడంతో, స్వగ్రామానికి తిరిగి వచ్చి నవాబ్గంజ్లో శివలింగాన్ని ప్రతిష్ఠించి సమయ్ దేవ్ ఆలయాన్ని నిర్మించాడు. అప్పటి నుంచి ఈ ఆలయం భక్తుల విశ్వాసానికి ప్రతీకగా నిలిచి, కాన్పూర్లోని ప్రముఖ శివక్షేత్రాల్లో ఒకటిగా ప్రసిద్ధి చెందింది. కాలానికి అధిపతిగా శివుడిని ఆరాధిస్తూ, గడియారాన్ని కానుకగా సమర్పించే ఈ విశిష్ట సంప్రదాయం కారణంగా ‘సమయ్ దేవ్ శివాలయం’ దేశంలోని అత్యంత అరుదైన శివాలయాల్లో ఒకటిగా గుర్తింపు పొందింది.
(Disclaimer: ఇక్కడ అందించిన సమాచారం మతం, సాధారణ నమ్మకాల ఆధారంగా మాత్రమే అందించబడింది.)
