YS Jagan Antarvedi visit: అంతర్వేది లక్ష్మీనరసింహస్వామి కొత్త రథాన్ని ప్రారంభించిన సీఎం జగన్, లైవ్ అప్డేట్స్

ముఖ్యమంత్రి వైఎస్‌ జగన్‌ తూర్పుగోదావరిజిల్లా ప్రఖ్యాత పుణ్యక్షేత్రం అంతర్వేది చేరుకున్నారు. ఉదయం 11.20 గంటలకు అంతర్వేది ఫిషింగ్‌ హార్బర్‌ దగ్గర హెలిప్యాడ్‌కు..

YS Jagan Antarvedi visit Live updates : తూర్పుగోదావరి జిల్లాలోని ప్రతిష్టాత్మక అంతర్వేది మహా క్షేత్రం శోభాయమానంగా వెలిగిపోతోంది. రథసప్తమి పర్వదినం ఒకవైపు,  లక్ష్మీనరసింహస్వామివారి నూతన రథం ప్రారంభోత్సవం మరోవైపుగా క్షేత్రం కనులవిందు చేస్తోంది.  ముఖ్యమంత్రి వైఎస్‌ జగన్మోహన్ రెడ్డి నూతన రథానికి పూజలు నిర్వహించి, భక్తులతో కలిసి రథాన్ని లాగి ప్రారంభోత్సవం చేశారు. కాగా,  సీఎం జగన్  ఈ ఉదయం 11.20 గంటలకు అంతర్వేది ఫిషింగ్‌ హార్బర్‌ దగ్గర హెలిప్యాడ్‌కు చేరారు.  11.35 గంటలకు శ్రీ లక్ష్మీనరసింహస్వామి ఆలయ రాజగోపురం వద్దకు చేరుకున్నారు. లక్ష్మీనరసింహ స్వామివారి దర్శనం, అర్చన, మంత్రపుష్పం సమర్పణ తదితర కార్యక్రమాల్లో సీఎం పాల్గొన్నారు. 12 గంటలకు శ్రీలక్ష్మీనరసింహస్వామి రథాన్ని ప్రారంభించారు. అంతర్వేది పర్యటన అనంతరం 1.30కి తాడేపల్లికి  తిరిగి చేరుకున్నారు జగన్.

ఇలా ఉండగా, గతేడాది సెప్టెంబర్‌ 5న అంతర్వేదిలో రథం దగ్ధమై, దీనిపై పెద్ద దుమారమే చెలరేగింది. ఈ ఘటన జరిగిన వెంటనే సీఎం స్పందించారు. కొత్త రథంతోనే ఉత్సవాలు నిర్వహిస్తామని ప్రకటించారు. రథం దగ్ధం కేసును సీబీఐకి అప్పగించాలని కేంద్రాన్ని కోరుతూ ప్రతిపక్షాల ఆరోపణలకు ఫుల్‌స్టాప్‌ పెట్టారు. ఈ విషయాన్ని ప్రతిష్టాత్మకంగా తీసుకున్న సీఎం ఈ కార్యక్రమం వెంటనే కార్యరూపం దాల్చేలా సెప్టెంబర్‌ 8న మంత్రుల బృందాన్ని ఏర్పాటు చేశారు. 95 లక్షల నిధులు మంజూరు చేశారు. స్వామి కల్యాణోత్సవాల సమయానికి కొత్త రథాన్ని సిద్ధం చేయాలనే సంకల్పంతో పనులు వేగవంతగా పూర్తి చేశారు.