Hill Stations: ముంబైకి వెళ్తే.. ఈ అందమైన హిల్ స్టేషన్లపై ఓ లుక్ వేయండి.. ట్రెక్కింగ్ కు బెస్ట్ ప్లేసెస్
మహారాష్ట్రలోని ఈ నాలుగు అందమైన హిల్ స్టేషన్లు పర్యాటకులకు అందమైన అనుభూతిని ఇస్తాయి. వారాంతాల్లో తమ స్నేహితులు, కుటుంబ సభ్యులతో కలిసి పర్వతాలలో సెలవులు గడపడానికి, నగరంలోని రోజువారీ పనికి సందడికి దూరంగా ప్రకృతికి దగ్గరగా గడపవచ్చు. మహారాష్ట్రంలో ముంబై పూణే వంటి నగరాలు మాత్రమే ఉన్నాయి అనుకుంటే.. ఈ అందమైన హిల్ స్టేషన్ల గురించి తెలుసుకోవలసిందే. ఇక్కడి ప్రకృతి దృశ్యాలు మిమ్మల్ని ఆకర్షిస్తాయి.
హిల్స్టేషన్లను సందర్శించాలని కోరుకుంటే మొదటగా గుర్తుకు వచ్చే పేర్లు ఉత్తరాఖండ్, హిమాచల్ ప్రదేశ్, జమ్మూ కాశ్మీర్. వేసవి కాలం లేదా శీతాకాలం కావచ్చు.. సీజన్ ఏదైనా సరే ప్రజలు హిల్ స్టేషన్లను సందర్శించడానికి ఇష్టపడతారు. ఎందుకంటే ఎత్తైన పర్వతాలు, అందమైన ప్రకృతి దృశ్యాలు ప్రజలను ఆకట్టుకుంటాయి. ముఖ్యంగా హడావిడి, ఒత్తిడితో నిండిన జీవితంలో ప్రజలు తమ కోసం తాము కొంత సమయం కేటాయించి కుటుంబ సభ్యులతో లేదా స్నేహితులతో హిల్ స్టేషన్లకు వెళ్లడానికి ఇష్టపడతారు.
నగరంలోని రద్దీకి దూరంగా హిల్ స్టేషన్లో ప్రశాంతమైన వాతావరణంలో గడపడం, స్వచ్ఛమైన గాలిని తీసుకోవడం మనస్సు, శరీరం రెండింటికీ మంచిది. అయితే మహారాష్ట్రలో కూడా చాలా అందమైన హిల్ స్టేషన్స్ కూడా ఉన్నాయని కొంతమందికి మాత్రమే తెలుసు.. మీరు ముంబైని సందర్శించడానికి వెళ్తున్నట్లు అయితే అక్కడ ఈ హిల్ స్టేషన్లను సందర్శించవచ్చు
లోనావాలా: లోనావాలా పేరు సినిమాలు చూసే వారికీ పరిచయమే.. ఈ పేరుని చాలాసార్లు విని ఉంటారు. ఇది మహారాష్ట్రలోని చాలా అందమైన హిల్ స్టేషన్. ప్రత్యేకించి ట్రెక్కింగ్ను ఇష్టపడేవారికి ఈ ప్రదేశం ఉత్తమమైనది. పచ్చని గడ్డి, ఎత్తైన పర్వతాలు, జలపాతాలు, గుహలతో పాటు ట్రెక్కింగ్, హైకింగ్ పాయింట్లు ఉన్నాయి. లోనావాలాలో అనేక రకాల సాహస కార్యకలాపాలు చేసే అవకాశం ఉంది. కోరేగాడ్ కోట, టైగర్ లీప్, డ్యూక్స్ నోస్ వంటి ప్రదేశాలను అన్వేషించవచ్చు. కొండ గుహల్లో ట్రెక్కింగ్ చేయవచ్చు. అంతేకాదు సరస్సులో బోటింగ్ చేయవచ్చు.
ఇగత్పురి: పూణే లేదా ముంబై పర్యటనకు వెళ్తే ఇగత్పురి హిల్ స్టేషన్ని సందర్శించవచ్చు. ఇక్కడి అందమైన ప్రకృతి దృశ్యాలు ప్రతి ఒక్కరి హృదయాన్ని గెలుచుకుంటాయి. ఘటందేవి ఆలయం, త్రింగల్వాడి కోట, అమ్రిషేశ్వర్ ఆలయం, మయన్మార్ గేట్, భట్సా రివర్ వ్యాలీ, ఇగత్పురి వాటర్ స్పోర్ట్స్ రతన్ఘర్ కోట, మానసదేవి ఆలయంతో పాటు, ఇక్కడ అతిపెద్ద విపస్సనా మెడిటేషన్ అకాడమీ కూడా ఉంది.
కోరోలి: కొరోలి హిల్ స్టేషన్ కూడా మహారాష్ట్రలో చాలా ప్రసిద్ధి చెందింది. ప్రశాంతమైన ప్రదేశానికి వెళ్లాలనుకుంటే ఇక్కడకు వెళ్లవచ్చు. ఈ హిల్ స్టేషన్లో పెద్దగా జనం కనిపించరు. ఇక్కడ పచ్చని పొలాలు ,అందమైన లోయలు ప్రతి ఒక్కరినీ ఆకర్షిస్తాయి. ఇక్కడి వాతావరణం అంతా ఆహ్లాదకరంగా ఉంటుంది. అయితే ఎక్కువగా సెప్టెంబరు నుంచి అక్టోబర్ వరకు, ఫిబ్రవరి నుంచి జూన్ వరకు, ఈ ప్రదేశాన్ని సందర్శించడం ఆనందాన్ని రెట్టింపు చేస్తుంది.
భండార్దర: ఈ హిల్ స్టేషన్ ముంబై నుండి 166 కి.మీ దూరంలో ఉంది. స్నేహితులు లేదా కుటుంబ సభ్యులతో కలిసి ఇక్కడకు వెళ్లేందుకు ఒక ప్రణాళికను రూపొందించుకోవచ్చు. ఇక్కడ, పచ్చని అడవులతో చుట్టుముట్టబడిన పర్వతాలు, అందమైన జలపాతాలు మనస్సును ఆకర్షిస్తాయి. మహారాష్ట్రలోని అత్యంత ఆకర్షణీయమైన హిల్ స్టేషన్లలో ఇది ఒకటి. ఇక్కడ మీరు ట్రెక్కింగ్ కూడా చేయవచ్చు. భండార్దరలో చూడదగ్గ అనేక అందమైన ప్రదేశాలు ఉన్నాయి. విల్సన్ డ్యామ్, గొడుగు జలపాతం, రంధా జలపాతం, ఆర్థర్ సరస్సు, మౌంట్ కల్సుబాయి, రతన్వాడి గ్రామం వంటి అనేక ప్రదేశాలను సందర్శించవచ్చు.