నిదానమే ప్రధానం.. దేనికైనా ఓపిక ఉండాలంటారు పెద్దోళ్లు. నానిని చూస్తుంటే ఇదే అనిపిస్తుందిప్పుడు. పాన్ ఇండియా అంటూ హడావిడి అస్సలు పడట్లేదు.. అలాగని ప్రపంచం ఫాలో అవుతున్న పాన్ ఇండియన్ మార్కెట్ వద్దనడం లేదు. దానికోసం సపరేట్గా ఓ ప్లాన్ ఫాలో అవుతున్నారు. మరి అదేంటి..? ఆయనేం చేస్తున్నారు..?
కరోనాకు ముందే పాన్ ఇండియన్ మార్కెట్ ఆప్షన్ మాత్రమే.. కానీ ఇప్పుడది అవసరం.. రేపటికి అత్యవసరంగా మారిపోతుందేమో..? అందుకే హీరోలంతా అటు వైపు పరుగులు తీస్తున్నారు. నాని కూడా దీనికి మినహాయింపేమీ కాదు.
ఈయన కూడా పాన్ ఇండియన్ మార్కెట్ దృష్టిలో పెట్టుకునే సినిమాలు చేస్తున్నారు కాకపోతే దానికోసం ప్రత్యేకంగా ఆ రూట్ ఫాలో అవుతున్నారు. ప్రభాస్, యశ్ మాదిరి అందరూ రాత్రికి రాత్రే పాన్ ఇండియన్ హీరోలైపోరు.
దానికి చాలా ఓపిక కావాలి.. నాని అదే చేస్తున్నారిప్పుడు.. నెమ్మదిగా ఒక్కో పావు కదుపుతున్నారు. శ్యామ్ సింగరాయ్తో తొలిసారి పాన్ ఇండియ కోసం ట్రై చేసారు.. ఆ తర్వాత దసరా, హాయ్ నాన్నకు ఇదే ఫార్ములా అప్లై చేసారు. మధ్యలో అంటే సుందరానికి సినిమాను కేవలం సౌత్లోనే విడుదల చేసారు.
పక్క ఇండస్ట్రీ ఆడియన్స్కు ఒక్కో సినిమాతో అలవాటవుతున్నారు నాని. తాజాగా సరిపోదా శనివారం తెలుగుతో పాటు హిందీలోనూ భారీగా విడుదలవుతుంది. ఒక్క సక్సెస్ చాలు తన మార్కెట్ పెరగడానికి అనేది నానికి కూడా బాగా తెలుసు. ఆ సక్సెస్ కోసమే ఓపిగ్గా వేచి చూస్తున్నారు న్యాచురల్ స్టార్. మొత్తానికి చూడాలిక.. నాని కోరుకున్న పాన్ ఇండియన్ మార్కెట్ ఏ సినిమాతో వస్తుందో..?