Home Loan: హోమ్ లోన్ తీసుకునే వారికి గుడ్‌న్యూస్.. ఆ ఒక్క పనితో బోలెడంత వడ్డీ మిగులు
ప్రస్తుత రోజుల్లో పెరుగుతున్న ఖర్చులు, అవసరాల నేపథ్యంలో రుణం తీసుకోవడం అనేది సర్వసాధారణంగా మారింది. ముఖ్యంగా ప్రతి ఒక్కరికీ చిరకాల కోరిక ఉన్న ఇంటి నిర్మాణ సమయంలో రుణం తీసుకోవడం అనేది తప్పనిసరి అవసరంగా ఉంటుంది. అయితే ఈ రుణం తీసుకునే సమయంలో కొన్ని జాగ్రత్తలు తీసుకుంటే పెద్ద మొత్తంలో సొమ్ము ఆదా చేసుకోవచ్చని నిపుణులు చెబుతున్నారు. ముఖ్యంగా ఇంటి రుణం పొందే సమయంలో ఫ్లోటింగ్ వడ్డీ రేటును ఎంచుకుంటే చాలా ప్రయోజనాలు ఉంటాయని వివరిస్తున్నారు. ఈ నేపథ్యంలో ఇంటి రుణం విషయంలో ఫ్లోటింగ్ వడ్డీ రేటును తీసుకోవడం వల్ల కలిగే ప్రయోజనాలను తెలుసుకుందాం.
హోమ్‌లోన్ తీసుకునే వారు ఫ్లోటింగ్ రేటుతో రుణాన్ని ఎంచుకుంటే చెల్లించే వడ్డీ రేటు స్థిర వడ్డీరేటుతో పోల్చుకుంటే తక్కువగా ఉంటుంది. ఈ రేటు బెంచ్ మార్క్ రేటుకు సంబంధించి కదలిక ఆధారపడి ఉంటుంది.
బేస్ రేటు అంటే బ్యాంకులు విధించే బెంచ్ మార్క్ రేట్.. ఈ రేటు కంటే తక్కువకు బ్యాంకులు రుణాన్ని అందించవు. అయితే బేస్ రేటు సవరించినప్పుడు ఫ్లోటింగ్ రేటు కూడా మారుతూ ఉంటుంది. ఒక్కోసారి స్థిర వడ్డీ రేటుతో పోల్చుకుంటే ఫ్లోటింగ్ రేటు కాస్త ఎక్కువగా ఉండే అవకాశం ఉంటుంది.
భవిష్యత్‌లో ఇంటి రుణాలపై వడ్డీ రేటు తగ్గుతాయని హోమ్‌లోన్ ఖాతాదారులు అనుకుంటే ఫ్లోటింగ్ వడ్డీ రేటు ఎంచుకోవాలని నిపుణులు చెబతున్నారు. అయితే ఫ్లోటింగ్ వడ్డీ రేట్లు స్థిర వడ్డీ రేటుతో పోల్చుకుంటే ఒకటి నుంచి రెండు శాతం వరకు తక్కువగా ఉంటాయి.
ఫ్లోటింగ్ వడ్డీ రేటుతో రుణం పొందడం వల్ల ఈఎంఐలు తరచూ మారుతూ ఉంటాయి. అందువల్ల రుణం తీసుకునే ముందు ఫ్లోటింగ్ వడ్డీ రేటు, స్థిర వడ్డీ రేటును బేరీజు వేసుకుని ఏది బాగుంటుందో? నిపుణులను సంప్రదించి రుణం పొందడం మేలు.
బ్యాంకులు గృహరుణాలపై వడ్డీ రేట్లు తగ్గిస్తే ఫ్లోటింగ్ వడ్డీ రేట్లు కూడా తగ్గుతాయి. ముఖ్యంగా చాలా బ్యాంకులు ఫ్లోటింగ్ రేటు హోమ్‌లోన్స్‌కు సంబంధించి ముందస్తు చెల్లింపులపై జరిమానా విధించవు. అందువల్ల గృహ రుణాన్ని ముందుగానే చెల్లిస్తామని అనుకునే వారు ఫ్లోటింగ్ వడ్డీ రేటుతో రుణం పొందడం ఉత్తమం.