Bride Father: కూతురు మెహందీ ఫంక్షన్ లో డ్యాన్స్ చేస్తూ తండ్రి మృతి.. వధువుకి నాన్న గురించి చెప్పకుండా పెళ్లి చేసిన మేనమామ ఎక్కడంటే..
కూతురికి పెళ్లి చేసి.. మరో ఇంటికి పంపే ఆనంద క్షణాల కోసం ఎంతో ఆతృతగా ఎదురుచూస్తారు.. అయితే కూతురి పెళ్లి జరుగుతుందన్న ఆనందం ఆ తండ్రి పూర్తిగా అనుభవించనేలేదు. తన కుమార్తె వివాహాన్ని ఆసాంతం చూడకుండానే తనువు చాలించాడు ఓ తండ్రి.
Updated on: Dec 13, 2022 | 3:31 PM
సృష్టిలో తియ్యండి తండ్రి కూతుళ్ల మధ్య ప్రేమ.. వీరిద్దరి మధ్య ఉన్న బంధం గురించి ఎంత చెప్పినా తక్కువే.. కూతురు అంటే తండ్రికి మరో అమ్మే.. అసలు కూతురుపై తండ్రి ప్రేమ గురించి ఎంత చెప్పినా ఇంకా చెప్పాల్సింది ఉందేమో అనిపిస్తుంది కూడా. ఆ కూతురికి నాన్న అంటే ఆకాశమంత ప్రేమ. ఇంటిలో కూతురు మహారాణి.. లక్ష్మీదేవి తన ఇంట్లో నడయాడుతుందని నాన్న తన కూతురిని ఎంతో గారంగా పెంచుకుంటాడు. తనకు కూతురు పుట్టినపట్టి నుంచి మరో ఇంటికి కోడలుగా అడుగు పెట్టేవరకూ అల్లారుముద్దుగా అరచేతుల్లో పెట్టుకుని పెంచుతాడు తండ్రి. కూతురికి పెళ్లి చేసి.. మరో ఇంటికి పంపే ఆనంద క్షణాల కోసం ఎంతో ఆతృతగా ఎదురుచూస్తారు.. అయితే కూతురి పెళ్లి జరుగుతుందన్న ఆనందం ఆ తండ్రి పూర్తిగా అనుభవించనేలేదు. తన కుమార్తె వివాహాన్ని ఆసాంతం చూడకుండానే మెహందీ ఫంక్షన్ రోజున తనువు చాలించాడు ఓ తండ్రి. అంతకంటే విషాదం ఏమిటంటే.. ఆ తండ్రి మరణించిన విషయం కూతురుకి తెలియనివ్వకుండా.. తండ్రికోరికను తీరుస్తూ మేనమామ పెళ్లి చేశాడు. మనసుని కదిలించే ఈ హృదయ విదారక సంఘటన ఉత్తరాఖండ్లో జరిగింది. వివరాల్లోకి వెళ్తే..
ఉత్తరాఖండ్ అల్మోరాలో పెళ్లి సందర్భంగా ఆ ఇంట్లో మెహందీ ఫంక్షను వైభవంగా జరుగుతోంది. డిసెంబర్ 12న వివాహం జరగాల్సి ఉంది. ఈ క్రమంలో డిసెంబర్ 11న మెహందీ ఫంక్షన్ నిర్వహించారు. ఈ కార్యక్రమంలో బంధుమిత్రులంతా ఆనందంగా డాన్స్ చేస్తున్నారు. వధువు తండ్రికూడా వారితో కలిసి డాన్స్ చేశారు. కూతురి వివాహం జరుగుతుందన్న ఆనందంలో ఆ తండ్రి ఎంతో సంబరంగా నృత్యం చేశారు. అయితే ఆ తండ్రి కుమార్తె వివాహం చూడకుండానే మృత్యు ఒడికి చేరుకున్నాడు. మెహందీ ఫంక్షన్లో డాన్స్ చేస్తుండగా గుండెపోటుకు గురై ఒక్కసారిగా కుప్పకూలిపోయాడు. హుటాహుటిన ఆస్పత్రికి తరలించారు. కానీ అప్పటికే ఆయన మృతిచెందినట్లు వైద్యులు నిర్ధారించారు.
అయితే, ఈ విషయం కుమార్తెకు చెబితే పెళ్లి ఆగిపోతుందని భావించిన కుటుంబ సభ్యులు పుట్టెడు దుఃఖాన్ని గుండెలోనే దాచిపెట్టుకుని నిర్ణయించిన ముహూర్తానికే ఓ ఫంక్షన్ హాల్లో వివాహం జరిపించారు. కన్యాదానాన్ని వధువు తండ్రి కాకుండా మేనమామ నిర్వహించేందుకు రావడంతో వధువుకు అనుమానం వచ్చింది. అయితే తన తండ్రికి ఆరోగ్యం బాలేదని, అత్యవసర పరీక్షల కోసం ఆస్పత్రికి వెళ్లారని చెప్పి కన్యాదానం జరిపించారు.
మరిన్ని జాతీయ వార్తల కోసం ఇక్కడ క్లిక్ చేయండి..
