ఎవుడ్రా నువ్వు ఇంత వయిలెంట్ ఉన్నావ్.. డ్యాన్స్ విషయంలో తేడా వచ్చి వరుడ్ని కొట్టి చంపాడు!

పెళ్లి ఊరేగింపులో డీజే పాటలకు అనుగుణంగా డాన్స్ చేయడం కొత్త విషయం కాదు, కానీ ఈ డాన్స్ చేస్తున్నప్పుడు రాజుకున్న చిన్న గొడవ, ఏకంగా వరుడి ప్రాణమే తీసింది. జైమాలా వేడుకలో డీజేపై డాన్స్ చేయడంపై జరిగిన వివాదంలో వరుడు మరణించిన ఘటన ఉత్తరప్రదేశ్‌ రాష్ట్రంలో వెలుగు చూసింది. గొడవ పడుతున్న వారికి సర్ధి చెప్పేందుకు వెళ్లి ప్రాణాలే కోల్పోయాడు.

గురువారం(జూన్ 07), ఘాజీపూర్‌లోని దిల్దార్‌నగర్ పోలీస్ స్టేషన్ ప్రాంతంలోని జగదీష్‌పూర్ గ్రామానికి చెందిన ఒక కుమార్తె వివాహం కోసం రేవతిపూర్ పోలీస్ స్టేషన్ ప్రాంతంలోని త్రిలోక్‌పూర్ గ్రామం నుండి ఒక వివాహ ఊరేగింపు జరిగింది. కుటుంబ సభ్యులు వివాహ బృందానికి ఘనంగా స్వాగతం పలికారు. ఆపై వివాహ బృందంలోని సభ్యులందరూ DJ పాటలకు డాన్స్ చేస్తూ అమ్మాయి ఇంటికి చేరుకున్నారు. ఇంతలో, ద్వార పూజ, తిలక్ వేడుక ముగిసిన తర్వాత, జయమాల వేడుక ప్రారంభం కానుంది. అదే సమయంలో, అమ్మాయి వైపు బంధువు ఒకరు DJకి డాన్స్ చేస్తూ వివాహ పార్టీ సభ్యులతో ఏదో విషయంలో గొడవకు దిగారు.

ఈ గొడవ చిలికి చిలికి గాలివానగా మారింది. వివాదం ముదరడంతో, వరుడి తండ్రి యువకులకు సర్ధి చెప్పేందుకు వెళ్ళాడు. కానీ అతని మాటలను అర్థం చేసుకోవడానికి బదులుగా, యువకులు అతన్ని కర్రలతో తీవ్రంగా కొట్టారు. తన తండ్రిని కొట్టడం చూసి, వరుడు రాకేష్ రామ్ అతన్ని రక్షించడానికి ముందుకు వచ్చాడు. తాగిన మైకంలో ఉన్న నిందితులు వరుడి తండ్రిని వదిలి వరుడిని కర్రలతో కొట్టారు. ఇంతలో, చేతిలో అక్రమ ఆయుధం పట్టుకున్న ఒక యువకుడు వరుడి తలపై తుపాకితో కొట్టాడు. దీంతో వరుడు తీవ్రంగా గాయపడి అపస్మారక స్థితిలో పడిపోయాడు.

ఆతురుతలో, కుటుంబ సభ్యులు వరుడిని ఘాజీపూర్ మెడికల్ కాలేజీకి తీసుకెళ్లారు. అక్కడ వైద్యులు అతన్ని ట్రామా సెంటర్‌కు పంపారు. ఆసుపత్రిలో చికిత్స పొందుతూ, వరుడు రాకేష్ శుక్రవారం(జూన్ 06) రాత్రి మరణించాడు. ఈ హఠాత్ పరిణామంతో రెండు కుటుంబాలు శోకసంద్రంలో మునిగిపోయాయి. ఈ వివాహానికి సంబంధించిన వీడియో కూడా వైరల్ అవుతోంది. ఇందులో ఒక యువకుడు చేతిలో తుపాకీ పట్టుకుని డాన్స్ చేస్తున్నట్లు స్పష్టంగా కనిపిస్తుంది.

ఈ సంఘటనకు సంబంధించి, ఈ తుపాకీతో వరుడి తలపై కొట్టారని స్థానికులు చెబుతున్నారు. దీని తర్వాత, వరుడు కోమాలోకి వెళ్లిపోయాడు. ఈ ఘటనకు సంబంధించి కేసు నమోదు చేసిన పోలీసులు చర్యలు చేపట్టారు. ఘాజీపూర్‌లోని ఫుల్లి కెనాల్ సమీపంలో నిందితుడు విశాల్‌ను అరెస్టు చేసి జైలుకు పంపారు. అతని నుంచి అక్రమ తుపాకీ, లైవ్ కార్ట్రిడ్జ్‌ను పోలీసులు స్వాధీనం చేసుకున్నారు.

మరిన్ని క్రైమ్ వార్తల కోసం ఇక్కడ క్లిక్ చేయండి..