Red Panda: డార్జిలింగ్‌లో అరుదైన ఎర్ర పాండా జననం.. అంతరించి పోతున్న ఈ పాండా ప్రత్యేకతలు ఏంటంటే..

Red Panda: పాండా అనగానే మనకు వెంటనే నలుపు, తెలుపు రంగులో చూడముచ్చటగా కనిపించే రూపం గుర్తొస్తుంది. అయితే పాండాలు ఈ రంగులోనే కాకుండా ఎరుపు రంగులో కూడా ఉంటాయని మీకు తెలుసా.?

Red Panda

Narender Vaitla |
Updated on: Jul 23, 2021 | 5:49 AM

Red Panda: పాండా అనగానే మనకు వెంటనే నలుపు, తెలుపు రంగులో చూడముచ్చటగా కనిపించే రూపం గుర్తొస్తుంది. అయితే పాండాలు ఈ రంగులోనే కాకుండా ఎరుపు రంగులో కూడా ఉంటాయని మీకు తెలుసా.? పునుగు పిల్లిలను పోలి ఉండే ఈ పాండాలు అత్యంత అరుదుగా కనిపిస్తుంటాయి. అసలు పాండాలే అరుదుగా ఉంటాయంటే ఈ ఎర్ర పాండాలు మరీ అరుదుగా కనిపిస్తుంటాయి. ప్రస్తుతం ఈ పాండాల ఉనికి ప్రశ్నార్థకంగా మారుతోంది. ఇప్పటికే ఈ రెడ్ పాండా అత్యంత అరుదైన జంతువు జాబితాలో చేరిపోయింది. ఇదిలా ఉంటే తాజాగా వెస్ట్‌ బెంగాల్‌లో యేషి అనే ఓ రెడ్‌ పాండా బుల్లి పాండాకు జన్మనిచ్చింది. డార్జిలింగ్‌లోని పద్మజా నాయుడు హిమాలయన్‌ జులాజికల్‌ పార్కులో ఈ చిన్న పాండా జన్మించింది. ప్రస్తుతం తల్లి పాండా.. బుజ్జి పాండా ఆరోగ్యంగా ఉన్నాయని. ఈ సీజన్‌లో జన్మించిన పాండాల సంఖ్య 5కు చేరిందని జూ డైరెక్టర్‌ ధర్మ్‌డియో రాయ్‌ తెలిపారు.

West Bengal: A female red panda, Yeshi, gave birth to a cub at Padmaja Naidu Himalayan Zoological Park in Darjeeling

“Both mother and cub are doing fine. This is the fifth birth of a red panda cub in this season,” says Zoo Director Dharmdeo Rai pic.twitter.com/m1wyRHJ5Mm

— ANI (@ANI) July 22, 2021

ఈ పాండాల ప్రత్యేకత ఏంటంటే..

అత్యంత అరుదుగా కనిపించే రెడ్‌ పాండాలు ముఖ్యంగా పశ్చిమబెంగాల్‌, డార్జిలింగ్‌ లాంటి కొన్ని ప్రాంతాల్లో మాత్రమే జీవిస్తున్నాయి. ప్రస్తుతం ఈ పాండా సంఖ్య ప్రపంచ వ్యాప్తంగా చాలా తక్కువగా ఉంది. ఇక ఈ పాండాలు చాలా బద్దకమైనవి చెబుతుంటారు. ఈ బద్దకమే ఆ జాతి ఉనికి ప్రశ్నార్థకంగా మారడానికి కారణమని నిపుణులు అభిప్రాయపడుతున్నారు. క్రూర జంతువులు దాడికి దిగినా ఇవి పారిపోవంటా. మొదట్లో వీటిలో పోరాటశైలి ఉన్నప్పటికీ అనంతరం ఆ లక్షణాలను కోల్పోయాయి. నిజానికి రెడ్ పాండాలు తొలుత మాంసాహారిగా ఉండేవి కానీ కాల క్రమేణా శాఖహారీగా మారిపోయాయి. ఇవి అలా ఎందుకు మారాయన్న దానిపై ఇప్పటికీ ఎలాంటి ఆధారాలు లభించలేవు. అంతరించి పోతున్న ఈ జాతిని కాపాడుకోవడం కోసం ఇండియన్ వెటరినరి రీసెర్చ్ ఇన్ స్టిట్యూట్ తన వంతు ప్రయత్నాలు చేస్తోంది. పశ్చిమ బెంగాల్, సిక్కింలలోని కొన్ని ఎర్ర పాండాలు కెనైన్ డిస్టెంపర్ అనే వైరస్ బారిన పడ్డాయని ఐవీఆర్ఐ తెలిపింది. ఈ పరిస్థితుల్లో కనీసం కృత్రిమ పద్ధతుల్లో అయినా వీటి సంఖ్యను పెంచేందుకు ఐవీఆర్ఐ ప్రయత్నిస్తోంది.

Red Panda Rare