Early Vascular Ageing: వయసు 35.. రక్తనాళాలు 55! ‘ఎర్లీ వాస్కులర్ ఏజింగ్’ అంటే ఏంటో తెలుసా?

అంటే, మీ పుట్టినరోజు సర్టిఫికేట్ ప్రకారం మీ వయసు 35 ఏళ్లే కావచ్చు, కానీ మీ రక్తనాళాలు మాత్రం 55 ఏళ్ల వృద్ధుడిలా ముడతలు పడి, స్టిఫ్ గా మారిపోయి ఉండవచ్చు. ఈ ‘సైలెంట్ కిల్లర్’ నిపుణులు ఏమంటున్నారో తెలుసుకుందాం.. ఆయన ఒక సాఫ్ట్‌వేర్ ఇంజనీర్, వయసు 32 ఏళ్లు. జిమ్‌కు వెళ్తాడు, చూడటానికి చాలా ఆరోగ్యంగా కనిపిస్తాడు. కానీ, అకస్మాత్తుగా ఒకరోజు గుండెపోటుతో ఆసుపత్రిలో చేరాడు.

పరీక్షలు చేసిన డాక్టర్లు షాక్ అయ్యారు. ఆయన రక్తనాళాలు ఒక 50 ఏళ్ల వ్యక్తికి ఉండాల్సినంత గట్టిగా, మందంగా మారిపోయాయి. “నేను బాగానే ఉన్నాను కదా, నాకెందుకు ఇలా జరిగింది?” అన్నది ఆయన ప్రశ్న. ఇక్కడే మనకు ‘క్రోనోలాజికల్ ఏజ్’ (క్యాలెండర్ వయసు) మరియు ‘బయోలాజికల్ ఏజ్’ (శరీర అవయవాల వయసు) మధ్య తేడా అర్థమవుతుంది.

ఏమిటీ వ్యత్యాసం?

మాక్స్ సూపర్ స్పెషాలిటీ హాస్పిటల్ డైరెక్టర్ డాక్టర్ వివేక్ కుమార్ ప్రకారం.. క్రోనోలాజికల్ ఏజ్ అంటే మీరు పుట్టినప్పటి నుంచి గడిచిన ఏళ్లు. కానీ, బయోలాజికల్ ఏజ్ అనేది మీ జీవనశైలిని బట్టి మీ అవయవాలు ఎంత ఆరోగ్యంగా ఉన్నాయో చెబుతుంది. ఆధునిక ఒత్తిడి, చెడు అలవాట్ల వల్ల నేటి యువతలో రక్తనాళాలు వాటి సహజమైన స్థితిస్థాపకతను కోల్పోయి, త్వరగా ముసలిబారిపోతున్నాయి.

ఆరోగ్యకరమైన ధమనులు రబ్బరులా సాగుతూ రక్తప్రసరణను సులభతరం చేస్తాయి. కానీ ఈ కింది కారణాల వల్ల అవి ‘స్టిఫ్’ గా మారుతున్నాయి.

• నిశ్చల జీవనశైలి‌‌- గంటల తరబడి కూర్చుని పని చేయడం.
• ఆహారపు అలవాట్లు- అతిగా ప్రాసెస్ చేసిన ఆహారం, ఉప్పు, చక్కెర తీసుకోవడం.
• మానసిక ఒత్తిడి- హై-స్ట్రెస్ జాబ్స్ వల్ల విడుదలయ్యే హార్మోన్లు రక్తనాళాల లోపలి పొరను దెబ్బతీస్తాయి.
• నిద్రలేమి & ధూమపానం- ఇవి రక్తనాళాల్లో వాపును పెంచి, రక్తప్రసరణను అడ్డుకుంటాయి.

భ్రమలో బ్రతకొద్దు..

“నేను ఆరోగ్యంగానే ఉన్నాను, నాకు ఏ సమస్య లేదు” అనుకోవడం అతిపెద్ద పొరపాటని డాక్టర్ ముకేశ్ గోయల్ హెచ్చరిస్తున్నారు. ధమనులు దెబ్బతింటున్నప్పుడు ఎటువంటి నొప్పి లేదా సంకేతాలు కనిపించవు. నేరుగా గుండెపోటు లేదా స్ట్రోక్ రూపంలోనే అది బయటపడుతుంది. డయాబెటిస్, హైబీపీ ఉన్నవారిలో ఈ ముప్పు ఇంకా ఎక్కువ.

శుభవార్త ఏంటంటే.. కాలెండర్ వయసును వెనక్కి తిప్పలేం కానీ, బయోలాజికల్ ఏజ్ మార్చుకోవచ్చు!

• వ్యాయామం‌‌- రోజూ కనీసం 30 నిమిషాల ఏరోబిక్ వ్యాయామం ధమనుల ఫ్లెక్సిబిలిటీని పెంచుతుంది.
• సరైన ఆహారం- ఆకుకూరలు, పండ్లు, నట్స్ వంటివి ఇన్ఫ్లమేషన్ తగ్గిస్తాయి.
• నిద్ర- రోజుకు 7-8 గంటల గాఢ నిద్ర హార్మోన్లను సమతుల్యం చేస్తుంది.
• రెగ్యులర్ చెకప్స్- 30 ఏళ్లు దాటిన వారు క్రమం తప్పకుండా గుండె పరీక్షలు చేయించుకోవడం అవసరం.

గుండె ఆరోగ్యం అనేది కేవలం వృద్ధులకు సంబంధించిన విషయం కాదు. మీరు ఎంత కాలం జీవిస్తారనేది మీ పుట్టిన తేదీ నిర్ణయించదు, మీ రక్తనాళాల ఆరోగ్యం నిర్ణయిస్తుంది. కాబట్టి, నేటి నుండే మీ జీవనశైలిని మార్చుకోండి. గుర్తుంచుకోండి, నివారణ అనేది ఎప్పుడూ చికిత్స కంటే మిన్న!