Longevity Tips: రాత్రిపూట ఈ 5 నియమాలు పాటిస్తే మీ ఆయుష్షు పెరుగుతుంది..
ఆరోగ్యంగా ఉండాలంటే పౌష్టికాహారం, వ్యాయామం ఎంత ముఖ్యమో, సరిగ్గా నిద్రపోవడం కూడా అంతే అవసరం. నిజానికి, ఆయుష్షును పెంచడంలో వ్యాయామం కంటే గాఢ నిద్ర ఎక్కువ ప్రభావం చూపుతుందని ఆరోగ్య నిపుణులు చెబుతున్నారు. నేటి ఉరుకుల పరుగుల జీవితంలో చాలా మంది నిద్రను నిర్లక్ష్యం చేస్తున్నారు. తగినంత నిద్ర లేకపోవడం వల్ల ఆయుష్షు తగ్గడమే కాకుండా, అనేక దీర్ఘకాలిక వ్యాధులు చుట్టుముట్టే ప్రమాదం ఉంది. మరి ఎక్కువ కాలం జీవించడానికి రాత్రిపూట ఎలాంటి నియమాలు పాటించాలో ఇప్పుడు తెలుసుకుందాం.
మంచి నిద్ర అనేది కేవలం విశ్రాంతి మాత్రమే కాదు, అది శరీరాన్ని మరమ్మత్తు చేసే సమయం. రాత్రిపూట కనీసం 7 నుండి 8 గంటల పాటు నిద్రపోయే వారిలో మధుమేహం, ఊబకాయం గుండె జబ్బుల ముప్పు చాలా తక్కువగా ఉంటుందని పరిశోధనలు వెల్లడిస్తున్నాయి. నిద్రలేమి సమస్యతో బాధపడేవారు తమ దినచర్యలో కొన్ని మార్పులు చేసుకోవడం ద్వారా సుఖ నిద్రను పొందవచ్చు. జీర్ణక్రియ నుండి మెదడు పనితీరు వరకు నిద్ర చూపే ప్రభావం మరియు నిద్రను మెరుగుపరిచే చిట్కాలు మీకోసం.
దీర్ఘాయువు కోసం అనుసరించాల్సిన నిద్ర నియమాలు:
నిద్ర సమయం: ప్రతిరోజూ రాత్రి కనీసం 7 నుండి 8 గంటల పాటు గాఢ నిద్ర అవసరం. ఇది మీ శరీర కణాలను పునరుజ్జీవింపజేసి ఆయుష్షును పెంచుతుంది.
రాత్రి భోజనం: పడుకోవడానికి కనీసం 2 గంటల ముందే భోజనం ముగించాలి. రాత్రిపూట తేలికపాటి ఆహారం తీసుకోవడం వల్ల జీర్ణక్రియ సులభమై త్వరగా నిద్ర పడుతుంది.
గ్యాడ్జెట్లకు దూరం: పడుకునే ముందు మొబైల్ ఫోన్లు, లాప్టాప్లు వాడటం మానేయాలి. వీటి నుండి వచ్చే నీలి కాంతి (Blue Light) మెదడును చురుగ్గా ఉంచి నిద్రకు కారణమయ్యే ‘మెలటోనిన్’ హార్మోన్ను అడ్డుకుంటుంది.
వ్యాధుల నివారణ: క్రమం తప్పకుండా మంచి నిద్ర పోవడం వల్ల రక్తపోటు నియంత్రణలో ఉంటుంది, తద్వారా గుండె సంబంధిత సమస్యల ముప్పు తగ్గుతుంది.
మానసిక ప్రశాంతత: నిద్రపోయే ముందు ధ్యానం చేయడం లేదా పుస్తకాలు చదవడం వల్ల మనస్సు ప్రశాంతంగా మారి గాఢ నిద్రకు దారితీస్తుంది.
నిద్ర అనేది ప్రకృతి మనకు ప్రసాదించిన వరం. దానిని సరైన పద్ధతిలో ఉపయోగించుకోవడం ద్వారా మనం వ్యాధులను దూరం చేసుకోవడమే కాకుండా, ఆరోగ్యకరమైన దీర్ఘాయువును సొంతం చేసుకోవచ్చు. రాత్రిపూట డిజిటల్ ప్రపంచానికి దూరంగా ఉండి, శరీరానికి తగినంత విశ్రాంతిని ఇవ్వండి.
గమనిక: ఇది కేవలం సమాచారం మాత్రమే. సంస్థ దీనికి బాధ్యత వహించదు. ఆరోగ్య సమస్యలు ఉన్నవారు వైద్యనిపుణుల సలహా తీసుకోవడం తప్పనిసరి.