టాటూ వేయించుకోవడం ఇష్టమా? మీ పర్సనాలిటీకి ఏది సెట్ అవుతుందో తెలుసా

టాటూ ఆర్టిస్టులు యువత ఆలోచనలకు అనుగుణంగా డిజైన్లను మారుస్తున్నారు. సాంప్రదాయిక చీరలు, హ్యాండ్‌లూమ్ నమూనాలు, ఎంబ్రాయిడరీ మోటిఫ్స్‌ను స్కిన్ మీదకు తీసుకురావడం ఇప్పుడు హాట్ ట్రెండ్. ఉదాహరణకు, పహెర్ వ్యవస్థాపకురాలు అంకితా కయాల్ తన ముంజేతిపై జామదాని, తంగాలియా, బాంధిని వంటి డిజైనర్ నమూనాలను టాటూగా వేయించుకుని అందరినీ ఆకట్టుకున్నారు. అలాగే ఉత్సవి ఝవేరి వంటి కళాకారులు కర్ణాటక కసూతి, బెంగాల్ కాంతా, గుజరాత్ తంగాలియా, పంజాబ్ ఫుల్కారి వంటి ఎంబ్రాయిడరీ నమూనాలను ‘Dori’ పేరుతో డిజిటల్ టాటూలుగా మారుస్తున్నారు. ఇది కేవలం ఒక డిజైన్ మాత్రమే కాదు, తరాల మధ్య ఉండే బంధాన్ని కలిపే అద్భుతమైన వారసత్వపు కళ అని చెప్పవచ్చు.

గొడ్నా కళ..

ధునిక టాటూల వెనుక పురాతన ‘గొడ్నా’ (హ్యాండ్ పోక్ టాటూలు) సంప్రదాయం కూడా దాగి ఉంది. బైగా, రబారీ, గారో, తోడా వంటి ఆదివాసీ సమాజాల్లో శతాబ్దాలుగా ఉన్న ఈ సంప్రదాయాన్ని ఆధునిక ఆర్టిస్టులు పునరుద్ధరిస్తున్నారు. ధాన్యాలు, పర్వతాలు, చేపలు, జాలరి వంటి రోజువారీ జీవితాన్ని ప్రతిబింబించే ఈ గొడ్నా నమూనాలు ఇప్పుడు ఆధునిక టాటూలుగా రూపాంతరం చెందాయి. ఈ కళాత్మక రూపాలు చీరలు, టెక్స్‌టైల్స్ నుంచి విస్తరించి, ఇప్పుడు చర్మంపై శాశ్వత అలంకారాలుగా మారుతున్నాయి.

ఈ ట్రెండ్ టాటూను కేవలం ఫ్యాషన్‌గా కాకుండా, సంస్కృతిని సంరక్షించే మాధ్యమంగా మారుస్తోంది. ఎంబ్రాయిడరీ, హ్యాండ్‌లూమ్, టాటూ కళలు ఇప్పుడు ఒకే తరహా విజువల్ భాషను పంచుకుంటూ, నూతన తరానికి కొత్త గుర్తింపును ఇస్తున్నాయి. ఒకప్పుడు గిరిజన తెగలకు మాత్రమే పరిమితమైన ఈ గొడ్నా సంప్రదాయం, నేడు ప్రపంచవ్యాప్తంగా ఆధునిక టాటూ అభిమానుల మనసులను గెలుచుకుంటోంది. మీ సంస్కృతిని, వ్యక్తిత్వాన్ని ప్రతిబింబించేలా ఏదైనా టాటూ వేయించుకోవాలని మీకు అనిపిస్తే, ఈ సంప్రదాయ కళాఖండాల వైపు ఒకసారి చూడండి.