ACల అవసరం లేకుండానే ఇల్లు కూల్గా ఉండాలా..! ఈ పని చేస్తే చల్లదనమే ఇక
ప్రస్తుత కాలంలో భానుడి భగభగలు ఏ రేంజ్లో ఉంటున్నాయో ప్రత్యేకంగా చెప్పనవసరం లేదు. ఉదయం పది గంటలకే ఎండలు మండిపోతున్నాయి. బయటకు రావాలంటేనే ప్రజలు జంకుతున్నారు. ముఖ్యంగా జైపూర్ వంటి నగరాల్లో ఉష్ణోగ్రతలు 40°C దాటిపోతుండటంతో, ఎయిర్ కండిషనర్ల వాడకం అనివార్యంగా మారుతోంది. అయితే, విద్యుత్ బిల్లులు భారం కాకుండా, పర్యావరణానికి హాని కలగకుండా, సహజ సిద్ధంగా ఇంటిని చల్లగా ఉంచుకునే ఒక అద్భుతమైన పద్ధతి ఇప్పుడు అందరి దృష్టిని ఆకర్షిస్తోంది. దాదాపు నాలుగు వేలకు పైగా కుటుంబాలు అనుసరిస్తున్న ఈ విధానంపై పారిశ్రామిక దిగ్గజం ఆనంద్ మహీంద్రా సైతం ఫిదా అయ్యి ప్రశంసల జల్లు కురిపించారు.
Updated on: May 26, 2026 | 7:20 AM
జైపూర్కు చెందిన ఒక స్టార్టప్ సంస్థ ఈ సమస్యకు రూఫ్టాప్ ఫార్మింగ్ సిస్టమ్స్తో ఒక చక్కటి పరిష్కారాన్ని అందించింది. ఇంటి పైకప్పులు అధిక వేడిని గ్రహించడం వల్ల గదులు భరించలేనంత వేడిగా మారుతాయి. ఈ స్టార్టప్ అందించే పోర్టబుల్ రూఫ్టాప్ గార్డెనింగ్ సెటప్ల ద్వారా పైకప్పులపై మొక్కలను పెంచుకోవచ్చు. వీరు అందించే లీక్-ప్రూఫ్ కంటైనర్లు, డ్రిప్ ఇరిగేషన్ డ్రేనేజీ వంటి సౌకర్యాల వల్ల ఇంటి నిర్మాణంలో పెద్దగా మార్పులు చేయాల్సిన అవసరం లేదు. పైకప్పుపై ఉండే ఈ పచ్చదనం సూర్యరశ్మిని గ్రహించి, ఇంటి లోపల ఉష్ణోగ్రతను తగ్గించడంలో కీలక పాత్ర పోషిస్తుంది. తద్వారా ఏసీల వాడకం తగ్గడమే కాకుండా, తాజా కూరగాయలు కూడా పండుతాయి.
ప్రశంసించిన ఆనంద్ మహీంద్రా..
ఈ వినూత్న ఉద్యమాన్ని సోషల్ మీడియా వేదికగా అభినందించారు ఆనంద్ మహీంద్రా. రాబోయే కాలంలో ఎండలు మరింత తీవ్రమయ్యే సూచనలు ఉన్నాయని, ఇలాంటి ఆలోచనా విధానాలే మనకు సరైన మార్గదర్శకాలుగా నిలుస్తాయని ఆయన పేర్కొన్నారు. విద్యుత్ను ఆదా చేయడమే కాకుండా, పర్యావరణహితంగా జీవనం సాగించేందుకు ఇది ఒక చక్కని మార్గమని నెటిజన్లు కూడా ఈ విధానాన్ని కొనియాడుతున్నారు.
కేవలం వేడిని తగ్గించడమే కాకుండా, పట్టణ ప్రాంతాల్లో ఖాళీగా ఉన్న మేడలను పచ్చని తోటలుగా మార్చడం వల్ల మానసిక ప్రశాంతతతో పాటు ఆరోగ్యకరమైన జీవనం సాధ్యమవుతుంది. పెరిగిన ఎండల తీవ్రతకు ఆందోళన చెందడం కంటే, ఇటువంటి పర్యావరణహితమైన పద్ధతులను అనుసరించడం ద్వారా మనం కూడా ప్రకృతికి దగ్గరగా ఉండవచ్చు. తక్కువ పెట్టుబడితో ఎక్కువ ప్రయోజనాలు పొందే ఈ రూఫ్టాప్ గార్డెనింగ్ విధానం ఇప్పుడు ప్రతి ఇంటికి అవసరమని నిపుణులు సూచిస్తున్నారు. మీ ఇంటిపై కూడా ఈ పద్ధతిని మొదలుపెట్టి, ఎండల నుంచి ఉపశమనం పొందడానికి ప్రయత్నించి చూడండి.
