హైదరాబాద్ నుంచి వర్షాకాలంలో వెళ్లాల్సిన 8 బెస్ట్ వీకెండ్ ట్రిప్స్.. ఈ అద్భుత ప్రదేశాలను అస్సలు మిస్ అవ్వకండి!
Hyderabad Monsoon Trips: వర్షాకాలంలో హైదరాబాద్ చుట్టుపక్కల ప్రకృతి కొత్త అందాలను సంతరించుకుంటుంది. అనంతగిరి కొండలు, బోగతా జలపాతం, కుంతల ఫాల్స్, శ్రీశైలం, అరకు లోయ సహా వీకెండ్ ట్రిప్కు అనువైన 8 అద్భుతమైన ప్రదేశాలను తెలుసుకుని మీ 2026 ట్రావెల్ బకెట్ లిస్ట్ను సిద్ధం చేసుకోండి.
Updated on: Jun 27, 2026 | 9:33 PM
రుతుపవనాల రాకతో హైదరాబాద్ పరిసర ప్రాంతాలు పచ్చదనంతో కళకళలాడుతున్నాయి. ఎండిపోయిన కొండలు పచ్చని ప్రకృతి ఒడిలో మునిగిపోతాయి. అడవులు కొత్త జీవం పోసుకుంటాయి. జలపాతాలు ఉధృతంగా ప్రవహిస్తూ కనువిందు చేస్తాయి. అలాంటి సమయంలో నగర జీవితపు హడావుడికి కాస్త విరామం ఇవ్వాలనుకునే వారికి వర్షాకాలం ఉత్తమ సమయం. పొగమంచుతో కప్పుకున్న కొండలు, ఉప్పొంగే జలపాతాలు, ఆధ్యాత్మిక క్షేత్రాలు, చారిత్రక ప్రదేశాలు.. హైదరాబాద్కు కొన్ని గంటల ప్రయాణ దూరంలోనే ఎన్నో అద్భుతమైన గమ్యస్థానాలు ఉన్నాయి. జంటలు, కుటుంబాలు, స్నేహితులు లేదా ఒంటరిగా ప్రయాణించే వారికి ఇవి మరపురాని అనుభూతిని అందిస్తాయి. 2026లో వీకెండ్ ట్రిప్ ప్లాన్ చేస్తున్నట్లయితే, హైదరాబాద్ నుంచి వర్షాకాలంలో తప్పక సందర్శించాల్సిన ఈ 8 ప్రదేశాలు మీ ట్రావెల్ బకెట్ లిస్ట్లో ఉండాల్సిందే.
1. అనంతగిరి కొండలు
హైదరాబాద్కు సుమారు 80 కిలోమీటర్ల దూరంలో ఉన్న అనంతగిరి హిల్స్ వర్షాకాలంలో ప్రకృతి ప్రేమికులకు స్వర్గధామంలా మారుతుంది. దట్టమైన అడవులు, పొగమంచు, స్వచ్ఛమైన గాలి, ఆహ్లాదకరమైన వాతావరణం ఇక్కడి ప్రత్యేకత. ట్రెక్కింగ్, ప్రకృతి నడకలు, ఫోటోగ్రఫీతో పాటు అనంత పద్మనాభ స్వామి ఆలయాన్ని కూడా సందర్శించవచ్చు.
2. బోగతా జలపాతం
‘తెలంగాణ నయాగరా’’గా పేరొందిన బోగతా జలపాతం వర్షాకాలంలో మరింత అందంగా కనిపిస్తుంది. ములుగు జిల్లా దట్టమైన అడవుల మధ్య ఉన్న ఈ జలపాతం భారీ నీటి ప్రవాహంతో పర్యాటకులను ఆకట్టుకుంటుంది. రోడ్ ట్రిప్లు, ప్రకృతి ఫోటోగ్రఫీకి ఇది అద్భుతమైన ప్రదేశం.
3. మల్లేల తీర్థం
నల్లమల అటవీ ప్రాంతంలో ఉన్న మల్లేల తీర్థం వర్షాకాలంలో చూడాల్సిన అద్భుతమైన జలపాతాల్లో ఒకటి. వందలాది మెట్లు దిగితే కనిపించే ఈ జలపాతం పచ్చని అడవుల నడుమ మనసుకు హాయిని కలిగిస్తుంది. చాలా మంది పర్యాటకులు ఈ ట్రిప్ను శ్రీశైలం దర్శనంతో కలిపి ప్లాన్ చేస్తారు.
4. నాగార్జున సాగర్
వర్షాకాలంలో కృష్ణా నది ఉప్పొంగి నాగార్జున సాగర్ ఆనకట్ట నిండుగా కనిపిస్తుంది. స్పిల్వే గేట్లు తెరిస్తే కనిపించే దృశ్యాలు పర్యాటకులను మంత్రముగ్ధులను చేస్తాయి. నాగార్జునకొండ మ్యూజియం, బౌద్ధ చారిత్రక అవశేషాలు, సరస్సు అందాలు ఈ ప్రయాణానికి ప్రత్యేక ఆకర్షణ.
5. హార్స్లీ హిల్స్
ఆంధ్రప్రదేశ్లోని హార్స్లీ హిల్స్ హైదరాబాద్కు సుమారు 540 కిలోమీటర్ల దూరంలో ఉంది. ఏడాది పొడవునా చల్లని వాతావరణం ఉండే ఈ హిల్ స్టేషన్ వర్షాకాలంలో మరింత అందంగా మారుతుంది. వ్యూ పాయింట్లు, జిప్లైనింగ్, ప్రకృతి ఫోటోగ్రఫీ, ప్రశాంతమైన నడకలు ఇక్కడి ప్రధాన ఆకర్షణలు.
6. అరకు లోయ
హైదరాబాద్కు కాస్త దూరంలో ఉన్నప్పటికీ వర్షాకాలంలో అరకు లోయ అందాలు వర్ణనాతీతం. కాఫీ తోటలు, గిరిజన మ్యూజియం, స్థానిక వంటకాలు, పచ్చని లోయలు పర్యాటకులను ఆకట్టుకుంటాయి. సొరంగాలు, వంతెనలు, కొండల మధ్యుగా సాగే అరకు రైలు ప్రయాణం జీవితంలో ఒకసారి తప్పక అనుభవించాల్సినది.
7. కుంటాల జలపాతం
తెలంగాణలోనే అత్యంత ఎత్తైన కుంటాల జలపాతం వర్షాకాలంలో ఉధృతంగా ప్రవహిస్తూ అద్భుతమైన దృశ్యాన్ని సృష్టిస్తుంది. ఆదిలాబాద్ జిల్లాలోని ఈ జలపాతం సుమారు 45 మీటర్ల ఎత్తు నుంచి కిందకు జాలువారుతుంది. ప్రకృతి ప్రేమికులు, ఫోటోగ్రాఫర్లు, అడ్వెంచర్ ప్రియులకు ఇది బెస్ట్ డెస్టినేషన్.
8. శ్రీశైలం
ఆధ్యాత్మికత, ప్రకృతి, అడవుల అందాలు కలిసిన ప్రదేశం శ్రీశైలం. నల్లమల అడవుల మధ్యలో ఉన్న ఈ క్షేత్రం వర్షాకాలంలో మరింత సుందరంగా కనిపిస్తుంది. మల్లికార్జున స్వామి ఆలయం దర్శనంతో పాటు పాతాళగంగ, అక్కమహాదేవి గుహలు, వ్యూ పాయింట్లు, బోటింగ్ వంటి అనుభవాలను కూడా ఆస్వాదించవచ్చు.
వర్షాకాలంలో ప్రయాణించే ముందు గుర్తుంచుకోవాల్సిన విషయాలు
- వాతావరణ సూచనలను ముందుగానే పరిశీలించండి.
- జారిపోని షూలు, రెయిన్కోట్ లేదా గొడుగు వెంట తీసుకెళ్లండి.
- జలపాతాల వద్ద ప్రమాదకర ప్రాంతాలకు వెళ్లకుండా జాగ్రత్తపడండి.
- అడవి ప్రాంతాల్లో స్థానిక అధికారుల సూచనలు తప్పనిసరిగా పాటించండి.
- వీకెండ్లలో రద్దీ ఎక్కువగా ఉండే అవకాశం ఉన్నందున ముందుగానే వసతి బుక్ చేసుకోవడం మంచిది.
ప్రకృతి అందాలను ఆస్వాదిస్తూ, ప్రశాంతమైన వీకెండ్ను గడపాలనుకుంటే.. ఈ వర్షాకాలంలో హైదరాబాద్కు సమీపంలోని ఈ ఎనిమిది అద్భుతమైన గమ్యస్థానాల్లో ఏదో ఒకదాన్ని మీ ట్రావెల్ లిస్ట్లో చేర్చండి.
